Abanyeshuri bakora ibizamini bya leta bisoza amashuri abanza biyongereyeho 25%

Yanditswe na Emma-Marie Umurerwa
Kuya 13 Ugushyingo 2017 saa 12:18
Yasuwe :
0 0

Hirya no hino mu gihugu tariki ya 13 Ugushyingo 2017 abanyeshuri barangije amashuri abanza bazindutse bajya gukora ibizamini bya Leta bisoza iki cyiciro, uyu mwaka bakaba bariyongereyeho 25%.

Imibare dukesha Ikigo cy’Igihugu gishinzwe guteza imbere uburezi REB, igaragaza ko mu mwaka wa 2016 abanyeshuri bakoze ibizami bya leta bageraga ku 194.679 bigaga ku bigo 2.626, abakobwa bari 101.364, abahungu ari 93.315.

Muri uyu mwaka wa 2017, abanyeshuri bakoze ibizamini ni 237.181 biga ku bigo 2.717, abakobwa ni 130.787, abahungu ni 106.394. Abakora ibizamini bose hamwe bakaba bariyongereyeho 25%. Muri aba hakaba harimo n’abana bagera kuri 16 bafungiye muri gereza ya Nyagatare nabo bakaba bakoze ibizami bisoza amashuri abanza.

Ku kigo cy’amashuri abanza cya St Famille mu Karere ka Nyarugenge mu Mujyi wa Kigali, aho IGIHE yageze hateraniye abanyeshuri bagera kuri 477 biga ku bigo bitatu byo muri ako Karere aribyo:APE Rugunga, St Famille hamwe n’abiga ku ishuri ribanza rya Marie Auxiliatrice. Ku rwego rw’igihugu ibizamini bikaba byatangirijwe mu Karere ka Nyagatare.

Mbere yo kwinjira mu kizamini, abanyeshuri bahabwa amabwiriza bari bugendereho, gukora ibizami bitonze kandi neza bakirinda gukopera cyangwa gukopeza. Nta mwarimu cyangwa umunyeshuri wari wemerewe kuvugana n’itangazamakuru.

Abanyeshuri basoza icyiciro rusange cy’amashuri yisumbuye, abakoze ibizami umwaka ushize wa 2016 ni 91.492, biga mu ku bigo 1.320. Abakobwa ni 49.986 , abahungu ni 41.506.

Mu gihe muri uyu mwaka wa 2017 abazabikora bose hamwe ari 98.268, biga ku bigo 1338. Abakobwa ni 51.618 abahungu ari 44.650. Abazakora ibizamini bakaba bariyongereyeho 8%.

Abakandida bigenga bagabanutseho 8.3%

Abanyeshuri basoza amashuri yisumbuye bakoze ibizamini bya Leta mu mwaka wa 2016 bageraga ku 41.719 bigaga ku bigo 40.931, abakobwa bari 21.945, abahungu bakaba 18.986. Abakandida bigenga bari 788.

Muri uyu mwaka wa 2017, abazakora bagera ku 44.037, biga ku bigo 763. Abakobwa ni 23.536 mu gihe abahungu ari 19.785, abakandida bigenga ni 716 bakaba baragabanutseho 8.3%.Muri rusange abazakora ibizamini bariyongereyeho 5.4%.

Ibizamini bisoza amashuri abanza bizakorwa iminsi bizasozwa ku wa Gatatu, hitegurwa gusoza umwaka w’amashuri wa 2017.

Abanyeshuri bagana aho ibizamini bibera
Ku ishuri rya Sainte Famille hamwe mu hari kubera ibizamini bisoza amashuri abanza mu Mujyi wa Kigali
Bamwe mu banyeshuri babanzaga kwibukiranya ibyo bize

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza