Abanyeshuri basaga 1000 ntibahawe amanota kubera uburiganya mu bizamini bya leta

Yanditswe na Philbert Girinema
Kuya 10 Mutarama 2017 saa 08:24
Yasuwe :
0 0

Minisiteri y’Uburezi yatangaje ko abanyeshuri bagera ku 1,079 mu bakandida bakoze Ikizamini gisoza amashuri abanza n’icyiciro rusange mu 2016 batazabona amanota yabo, kubera ko bagaragayeho imikorere inyuranye n’amabwiriza agenga ikizamini.

Ubwo iyi minisiteri yatangazaga ibyavuye mu manota y’abanyeshuri kuri uyu wa Mbere, Umuyobozi Ushinzwe ibizamini mu Kigo cy’Igihugu cy’Uburezi, REB, Emmanuel Muvunyi, yavuze ko ayo makosa atandukanye yagaragaye mu gihe cy’ikorwa ry’ibizamini no mu gihe cyo gukosora.

Muvunyi yavuze ko mu bizamini bisoza amashuri abanza hagaragaye ibibazo 614 mu gihe nko mu mwaka wabanje wa 2015 byari 455. Mu cyiciro rusange ho uwo mubare wikubye kabiri kuko wavuye kuri 206 mu 2015 ugera kuri 465 mu 2016.

Umunyamabanga wa Leta ushinzwe amashuri abanza n’ayisumbuye, Isaac Munyakazi, yavuze ko hari aho basangaga abanyeshuri binjiye mu kizamini bafite ibyo gukopereraho cyangwa mu gihe cyo gukosora bagasanga abantu bari begeranye basubije ibisa cyangwa batsinzwe ikibazo kimwe mu buryo bumwe.

Ati “Hari nk’abana bagiye bandika amazina, nimero, inyuma y’ikayi kandi kizira. Iyo kayi ntabwo ikosorwa kuko niba amabwiriza avuga ko nta hantu hagomba kuba hagaragara izina cyangwa nimero z’umwana, we akabyandikaho, twe tubifata nk’uburyo bwo gutega uzamukosora.”

“Hari ibihano bigomba gufatirwa abo byagaragaraho bose ko bagize uruhare mu gukopera cyangwa gukopeza abana. Abakopeye bo amanota yabo ntabwo bazayabona niyo mabwiriza twatanze, ariko abafashije gukopera, ibibazo twabonye bigaragaza ko hari ugukopera ariko byateguwe, ababigizenmo uruhare turi kubakurikirana.”

Muvunyi yavuze ko bakora ibishoboka kugira ngo hatabaho kuba umunyeshuri yahabwa amanota adakwiriye, cyane ko uretse amakosa y’umwana mu kizamini, no mu gihe cyo gukosora hari ubwo umukosozi ashobora gutanga amanota atandukanye n’ayo umwana yakoreye.

Ibyo ngo bikorwa hifashishijwe inteko y’abakosozi bagera kuri batandatu baba bicaranye, umuntu agakosora ikibazo kimwe agahereza undi ariko akabanza kugenzura niba amanota yatanzwe ku bibazo bibanza ari yo, na mbere y’uko amanota yemezwa hakabaho igenzura ryihariye.

Ati“Dukora ku buryo habamo umucyo, nta kubogama, ku buryo na babandi bashobora kuvuga ngo mwankosoye nabi, ayo nagombaga kubona siyo nabonye, iyo dusubiyemo tukareba ni gake usanga tubonye ibitandukanye n’ibyo twabonye mbere kubera iyo nzira tuba twaranyuzemo.”

Aya manota ashobora kurebwa hakoreshejwe uburyo bubiri, burimo ubwa SMS aho bandika P6 cyangwa S3 ku biga mu cyiciro rusange, bagasiga akanya, bagakurikizaho nimero umunyeshuri yakoreyeho ikizamini, bakohereza kuri 489; Cyangwa bagasura urubuga rwa REB, bakajya ahanditse ‘View Exam Results’ bagakurikiza amabwiriza.

Ku munyeshuri wagaragayeho amakosa mu bizamini we aho kuza amanota hahita haza ubutumwa buvuga ngo “Wahanwe kubera uburiganya mu kizamini.”

Mu mwaka ushize, mu mashuri abanza hiyandikishije abakandida 194 052 hakora 187 139, mu gihe mu cyiciro rusange hiyandikishije 90 759 hagakora 89 421. Mu mashuri abanza batsinze kuri 85.4%, mu mashuri yisumbuye batsinda kuri 89%.

Umunyamabanga wa Leta Ushinzwe amashuri abanza n’ayisumbuye, Isaac Munyakazi ashyikirizwa amanota n’Umuyobozi Mukuru mu kigo cy’Igihugu gishinzwe uburezi, REB, Gasana Janvier

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza