Abapolisi 160 b’u Rwanda basoje ubutumwa bw’amahoro muri Sudani y’Epfo (Amafoto)

Yanditswe na Evariste Nsengimana
Kuya 29 Mata 2019 saa 02:08
Yasuwe :
0 0

Itsinda ry’abapolisi 160 b’u Rwanda bari mu butumwa bw’amahoro muri Sudani y’Epfo, bagarutse mu Rwanda kuri uyu wa Mbere nyuma y’igihe kigera kumwaka bamaze mu butumwa muri icyo gihugu.

Saa 11h35 nibwo aba bapolisi bayobowe na ACP Emmanuel Karasi bageze ku Kibuga Mpuzamahanga cy’Indege cya Kigali, batwawe n’indege ya RwandAir.

ACP Karasi yavuze ko mu kazi bakoraga harimo gucunga umutekano w’abantu n’ibintu ariko cyane cyane uw’impunzi.

Ati "Ariko kubera ko hari ikibazo kiba cyarabaye mu gihugu, mwibanda ku mpunzi kuko nizo ziba zifite ikibazo gikomeye cyane ariko bitavuze ko n’abandi tutabacungira umutekano."

"Muri uko kurinda abaturage harimo ibikorwa bitandukanye nko kurinda inkambi batuyemo, gucunga umutekano no kurinda abakozi ba Loni, kugira ngo akazi kagende neza."

Yavuze ko banagiraga unwanya wo gucunga umutekano mu murwa mukuru Juba, bafatanyije n’inzego zishinzwe umutekano w’iki gihugu.

Yavuze ko we na bagenzi be bishimiye ko akazi batumwe bagakoze uko bikwiye kandi bakagaruka amahoro.

Mu bindi bikorwa bakoze bikomeye yavuzemo gucungira umutekano abanyeshuri barenga ibihumbi 14 bari mu bizamini bya Leta muri Sudani y’Epfo.

Ati "Urumva kiba ari igikorwa gikomeye, kugira ngo ubakure mu nkambi ubatware mu bice bavuyemo bahunze."

Umwe mu bapolisi bagize iri tsinda, CIP Niyonsaba Valens, yavuze ko “akazi kagenze neza, gihamya ni uko n’abo twatwakoreye bagize igihe cyo kudushima, batubwira ko ibyo twakoze n’abanyarwanda nta bandi bantu barabasha kubigeraho haba mu myitwarire cyangwa kubahiriza akazi nk’uko twabisabwaga."

Mugenzi we CIP Bampire Liberata yavuze ko yavuze ko bishimiye kuba bongeye kugaruka mu Rwanda kandi ubutumwa bagiyemo babukoze neza.

Ati "Turanezerewe, akazi katujyanye kari kenshi, twagakoraga amasaha yose, iminsi yose ntawo kuruhuka, ariko turangije neza inshingano zose twarazitunganyije."

Umuvugizi wa Polisi y’u Rwanda, CP John Bosco Kabera uri mu bayobozi bakuru ba Polisi bagiye kwakira abasoje ubutumwa, yabashimiye akazi n’ubwitange bagaragaje ubwo bari mu butumwa bw’amahoro muri Sudani y’Epfo.

Aba bapolisi basimburanye n’abandi 160 bagiyeyo mu gitondo cyo kuri uyu wa 29 Mata nabo bazamarayo umwaka.

U Rwanda ni igihugu cya kabiri mu kugira abapolisi benshi mu butumwa bw’amahoro, by’umwihariko ku mwanya wa mbere mu kugira abapolisikazi benshi. Rufite abapolisi barenga 1000 mu butumwa bw’amahoro muri Sudani, Haiti, Sudani y’Epfo, Repubulika ya Centre Afrika.

Indege yabazanye yahageze saa 11 h 35
ACP Karasi wari uyuboye itsinda niwe wasohotse mbere
Abapolisi 160 b’u Rwanda basoje ubutumwa bw’amahoro muri Sudani y’Epfo
CP Kabera aganiriza abapolisi basoje ubutumwa muri Sudani y'Epfo
Bahawe ikiganiro bageze ku kibuga cy'indege cya Kigali
Abandi bapolisi 160 boherejwe mu butumwa muri Sudani y'Epfo basimbura abamazeyo umwaka
Abapolisi bagiye gukomeza ubutumwa bw'amahoro bayobowe na ACP Claude Tembo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza