Abapolisi 82 basoje amahugurwa yo kurwanya iterabwoba yaberaga i Gishari

Yanditswe na IGIHE
Kuya 27 Gicurasi 2019 saa 07:54
Yasuwe :
0 0

Abapolisi 82 basoje amahugurwa yo kurwanya iterabwobo yaberaga mu kigo cy’amahugurwa ya gipolisi (PTS- Gishari) giherereye mu Murenge wa Gishari mu Karere ka Rwamagana.

Aya mahugurwa yasojwe kuri iki Cyumweru tariki ya 26 Gicurasi yari ayo kurwanya iterabwoba, yatangiye ku wa 19 Gicurasi yitabirwa n’abapolisi 82 baturutse mu mashami atandukanye agize Polisi y’u Rwanda.

Mu gusoza aya mahugurwa aba bapolisi berekanye imyiyerekano, ubuhanga mu kwirwanaho no kwirinda mu rwego rwo guhashya umwanzi, guhosha imyigaragambyo, gutabara abashimuswe n’imitwe y’iterabwoba ndetse no guhashya imitwe y’iterabwoba.

Muri aya mahugurwa bakaba barize amasomo atandukanye arimo, kurwanya imitwe y’iterabwoba, gutegura ibisasu, imyitozo ngororamubiri, imikoreshereze y’imbwa zisaka ibisasu, guhosha imyigaragambyo, n’ayandi.

Umuyobozi wa Polisi y’u Rwanda wungirije ushinzwe ibikorwa bya Polisi , DIGP Félix Namuhoranye, yashimiye aba bapolisi ubwitange n’umurava bagaragaje mu gihe cy’icyumweru bamaze babahabwa imyitozo yo kurwanya imitwe y’iterabwoba ndetse no gutabara abashimushe n’iyo mitwe.

Yagize ati “Mu by’ukuri iyi myitozo mwahawe n’iy’ibanze ibategurira kuzahabwa irushijeho kugira ngo murusheho gusobanukirwa no kumenya neza uburyo mwarwanya imitwe y’iterabwoba ndetse no gutabara abashimuswe n’ibyihebe.”

Yongeyeho ati “ Turashaka ko mu gihe muri kwiga ko mutajya mubifata nk’imyitozo ngo mu bisige aho, ahubwo mukabikora nk’aho muhanganye n’ibyo byihebe. Kandi ibyo mukora byose mukabikora mwihuta kugira ngo nabo mutabara mutabare vuba ariko nanone mukabikora mushyizemo ubwenge bujyanye n’amasomo mwahawe.”

DIGP Namuhoranye yibukije abahuguwe ko mugihe cyose bagiye guhangana n’ibyihebe bagomba kugenda bazi ko bifite amayeri menshi n’imyitozo ihagije bityo ko barushaho guhora bitoza kugira ngo babashe guhashya umwanzi ndetse no kuzuza inshingano zabo zaburi munsi kandi kinyamwuga.

Yanavuze kandi ko n’ubwo mu Rwanda nta byihebe bikunze kuhaboneka n’imyigaragambyo ariko ko ari ngombwa ko abapolisi bahabwa ubumenyi bujyanye no guhosha imyigaragambyo no kurwanya imitwe y’iterabwoba kugira ngo ni biramuka bibaye ababirwanya babe bahari. Yongeyeho kandi ko Polisi ifasha kubungabunga no kugarura amahoro n’umutekano mu bihugu bitandukanye hirya no hino ku Isi aho bakenera gukoresha bwa bumenye bahawe.

Umwe muri abo basoje aya mahugurwa, CIP David Mugume yavuze ko aya mahugurwa yabongereye ubumenyi bwisumbuye k’ubwo bari bafite.

Ati “ Twigishijwe uburyo bwo kurwanya ibyihebe ndetse n’uburyo twatabara abafashwe bugwate nabyo mu buryo bwihuse, twamenyeyemo kandi uburyo twabona amakuru y’ahari iyo mitwe y’iterabwoba dukoresheje ubumenyi twahawe.”

Yavuze kandi ko bahawe amasomo y’uburyo bakwirinda bakarinda n’abaturage batuye mu gace ibyihebe byafashe, ngo banahawe n’amasomo yabafasha kugera ku mwanzi bamutunguye.

Yasoje ashimira Polisi y’u Rwanda uburyo idahwema kongerera ubushobozi n’ubummenyi abapolisi mu buryo bwose bwabafasha guhangana n’umwanzi bityo bakabasha kurinda abaturage n’ibyabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza