Abapolisi barenga 20 birukaniwe ruswa, abantu 200 biganjemo abashoferi barafungwa

Yanditswe na
Kuya 10 Mutarama 2017 saa 09:02
43 29

Polisi y’u Rwanda iratangaza ko mu mwaka ushize wa 2016, hari abapolisi 22 birukanwe bazira ruswa itangwa n’abakoresha umuhanda, n’abantu barimo bashoferi bagera kuri 200 batabwa muri yombi.

Icyegeranyo cy’ibikorwa by’igenzi bya Polisi y’u Rwanda mu mwaka wa 2016 kigaruka ku ntego yo kutihanganira icyaha cya ruswa muri Polisi y’u Rwanda.

Iki cyegeranyo cyerekana ko abantu bagera kuri 200 biganjemo abashoferi bafashwe bagerageza guha ruswa abapolisi; byanagize ingaruka ku bapolisi bagera kuri 80, bamwe baranirukanwa.

Kigira kiti “Mu mwaka ushize abapolisi 22 bakoraga mu Ishami rishinzwe umutekano wo mu muhanda birukanywe bazira ruswa, naho abandi bane birukanwa kubera imyitwarire mibi mu mirimo; mu gihe abantu 40 bafatanywe impushya zo gutwara ibinyabiziga z’inyiganano.”

Ibi Polisi ivuga ko byakozwe igenedeye ku ntego zayo ari zo "Umurimo, Kurinda n’ubunyangamugayo" ndetse no gushyira mu bikorwa gahunda ya Leta yo kutihanganira ruswa.

Uretse ruswa, Polisi inavuga ko ku bufatanye n’abaturage, amafaranga abarirwa muri miliyari 6,6 z’imisoro yari yaranyerejwe yagarujwe mu gihe abarenga 100 bari inyuma y’ikoreshwa nabi rya miliyari 4,3 yari agenewe gahunda zo guteza imbere imibereho y’abaturage bafashwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE