Kwamamaza

Abaranguzaga Caguwa mu Rwanda bahungiye imisoro muri Congo

Yanditswe kuya 1-12-2016 saa 07:27' na Philbert Hagengimana


Abacuruzi bari basanzwe baranguza imyenda ya caguwa mu Rwanda bahungiye imisoro muri Repubulika Iharanira Demokarasi ya Congo (RDC), bamwe mu bakiriya babo biba ngombwa ko babakurikira, none batangiye gufatirwa mu cyuho binjiza iyo myenda mu buryo bwa magendu.

Gushaka ubukire buhutiyeho, rimwe na rimwe bigusha mu byaha iyo hirengagijwe ibiteganywa n’amategeko, ushaka ubukire akihugiraho akirengagiza ibishobora kubyara inyungu rusange.

Ibyo ni byo bamwe babonye batashobora gukora, bahitamo kujya gushakira amafaranga yabo mu mahanga (muri RDC) nyuma yo kubona umuvuduko w’ubukire bifuza ugabanywa n’imisoro yashyiriweho ibicuruzwa bya Caguwa, ari nayo mpamvu bamwe muri bo bahisemo kujya babicuruza mu Rwanda mu buryo bwa magendu, ndetse Polisi y’u Rwanda ku bufatanye n’ikigo cy’imisoro n’amahoro (RRA) bakaba barafashe bamwe mu babibafashamo.

Umwe mu bafashwe, asobanura ko bahisemo kuyoboka inzira ya magendu, kuko batakibona aho barangura Caguwa hafi, bitewe n’uko abari basanzwe bayibaha bahisemo kujya gukorera muri RDC bahunga imisoro.

Ibyo ngo byiyongeraho kuba iyo baranguye iyo muri Congo, basoreshwa amafaranga menshi, bigatuma bacuruza batunguka.

Ati “Hari ibaro imwe ugenda ukarangura amadolari 80, ukaza mu mu Rwanda ukayisorera amafaranga y’u Rwanda 132.000, ugasanga iguhagaze asaga ibihumbi Magana abiri, waza wahambura, wacuruza amafaranga ntavemo.”

Icyakora ngo si we wakurikiye abo bacuruzi gusa, ahubwo benshi mu bacuruza Caguwa kimwe na we bajyayo bakazana bike bakabyishyurira imisoro, maze bakabizana hamwe n’ibindi bya magendu, aho yagize ati “Ni benshi (babikora), biri rusange nta mucuruzi n’umwe utabikora.”

Yakomeje agaragaza ko umuti w’ikibazo cya magendu mu myenda ya caguwa “ni uko bagarura bariya bacuruzi bagiye muri Congo, kuko abaranguzaga amabaro bose baragiye, noneho bakaza bakumvikana na leta uko caguwa igomba gucuruzwa, bakabagabanyiriza imisoro, natwe tugakomeza gukorana na bo nk’uko twajyaga dukorana.”

Akomeza yemeza ko abo bacuruzi bagiye bose, ari bo bababwira bati “mwaje tukajya tubaha mukareba ko namwe hari icyo twakuramo? Twajyayo rero twarangura ibintu amafaranga ntavemo.”

Asobanura ko mbere y’izamuka ry’imisoro “Twahabwaga ibaro n’abo bacuruzi bakiri mu Rwanda, imisoro bayizamuye birabananira, babona amafaranga ntibajya bayavamo, bahitamo guhita bigira muri Congo.”

Uyu usanzwe acururiza Caguwa mu Isoko rya Gisozi mu Mujyi wa Kigali, yafatanywe amabaro 59 y’imyenda ahwanye n’ibiro 2500 (ni ukuvuga Toni 2.5), ikaba irimo imisoro ya Miliyoni 10 nk’uko byatangajwe na Mugabe Robert, Umuyobozi w’ishami rishinzwe kurwanya magendu muri RRA.

Umuvugizi wa Polisi mu Mujyi wa Kigali, SP Emmanuel Hitayezu asobanura ko bamaze gufata bamwe mu bafasha abo bacuruzi baranguza Caguwa bakohereza iza magendu mu Rwanda, akanavuga ko zinjizwa bazicishije mu kiyaga cya Kivu.

Ati “Mu bo twafashe rero harimo Umukomisiyoneri, ufasha abacuruza Caguwa inaha, akambuka muri Congo akavugana n’abo bacuruzi bafite ububiko (Stocks) bw’imyenda ya caguwa, akabasha kwambutsa iyo magendu, amakuru dufite ni uko imyinshi bayinyuza mu kiyaga cya Kivu, kandi n’abo twafashe bavuze ko ari yo nzira banyuzemo.”

Inama ya 17 y’Abakuru b’Ibihugu bigize Umuryango wa Afurika y’u Burasirazuba, EAC, yabereye Arusha muri Tanzania kuwa 2 Werurwe, yagejejweho aho ibihugu bigize uwo muryango bigeze mu guteza imbere inganda zikora imyenda n’izitunganya impu.

Iyo nama yasabye ko imyambaro n’inkweto byinjizwa mu karere bikurikiza amabwiriza y’isuku mu bihugu bitanu byose bigize uyu muryango, ndetse isaba ibihugu gutangira gusuzuma uburyo bwo guhagarika burundu ibikorwa byo kohereza impu hanze y’akarere.

Nyuma y’icyo gihe ibihugu byatangije ingamba zikaze zo gukumira iyo myambaro, ndetse nko mu Rwanda kuva ku itariki ya 1 Nyakanga 2016, imyenda n’inkweto bya Caguwa byinjizwa mu gihugu bisoreshwa umusoro ukubye inshuro 25 ugereranyije n’uwari usanzwe.

Umusoro ku myenda ya caguwa mu Rwanda wavuye kuri 0,2$ ugera kuri 2,5$ ku kilo kimwe cy’imyenda ya caguwa. Ku nkweto uyu musoro wavuye kuri 0,5$ ugera kuri 5$ ku kilo kimwe cy’inkweto za caguwa wakwinjiza mu gihugu.

Muri Gicurasi uyu mwaka wa 2016, Perezida Kagame yashimangiye ko gahunda yo guca caguwa yaganiriweho bihagije mu nama y’abaminisitiri bigahabwa umurongo bikwiye gukorwamo, bityo bikaba bikwiye kumvikana nka gahunda yo guteza imbere ibikorerwa mu Rwanda mu rwego rwo kugabanya ibitumizwa mu mahanga.

Imwe mu myenda ya magendu yafashwe ikuwe muri RDC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved