Abarenga ibihumbi 100 bamaze gusura Ingoro y’amateka yo guhagarika Jenoside

Yanditswe na Ndayishimye Jean Claude
Kuya 15 Gicurasi 2018 saa 07:37
Yasuwe :
0 0

Kuva mu Ukuboza 2017 kugeza muri Mata 2018, Ingoro y’Amateka yo guhagarika Jenoside yari yitezweho gusurwa n’abashyitsi ibihumbi 60 ku mwaka imaze kurenza ibihumbi 100 mu mezi ane gusa.

Umuyobozi w’Ikigo cy’Ingoro z’Umurage w’u Rwanda, Ambasaderi Masozera Robert, yabwiye Abadepite bagize Komisiyo y’Ingengo y’Imari n’Umutungo by’Igihugu ko iyo ngoro isurwa ku buryo butangaje, aho bateganya ko mu kwezi kwa gatandatu izaba yasuwe n’abarenga ibihumbi 120.

Ati “Twateganyaga ko abantu ibihumbi 60 bajya basura nibura mu mwaka kuko twagenderaga ku ngoro isurwa cyane ya Huye. Ariko tumaze gusurwa n’ibihumbi birenga ijana kandi ni ukugera mu kwa kane gusa.

Avuga ko hari imbogamizi bahura nayo yo kuba bafite abakozi bake bahakorera, gusa yashimangiye ko bagiye kuganira n’izindi nzego bireba kugira ngo barebe uko bakongerwa.

Iyi ngoro iherereye mu nyubako ikoreramo Inteko Ishinga Amategeko y’u Rwanda ku Kimihurura, yafunguwe ku mugaragaro na Perezida Paul Kagame ku wa 13 Ukuboza 2017.

Igaragaramo urugendo rw’ingabo za APR rwaganishije ku ihagarikwa rya Jenoside mu 1994. Iri mu Nteko Ishinga Amategeko mu gice kigana aho umutwe w’Abasenateri ukorera. Aho yubatse hitwaga CND [Conseil National pour le Développement].

Iyi ngoro igizwe n’ibice bibiri by’ingenzi harimo icy’imbere cy’ibyumba icyenda bitandukanye ahanini gikubiyemo amakuru y’uburyo Jenoside yakorewe Abatutsi yateguwe, uko amasezerano y’amahoro ya Arusha yagenze, uko indege ya Habyarimana yahanuwe, uko Jenoside yateguwe igashyirwa mu bikorwa, uburyo bwakoreshejwe n’ingabo za APR (Armeé Patriotique Rwandaise) mu guhagarika Jenoside no kurokora abicwaga mu duce dutandukanye n’uko Leta y’Ubumwe bw’Abanyarwanda yagiyeho.

Igice cyo hanze cyo kigizwe n’ibishushanyo (monuments) bitatu bigaragaza ibikorwa byakorwaga n’ingabo za APR mu gihe cy’urugamba.

Igishushanyo kiri hejuru y’inzu y’Inteko Ishinga Amategeko ni cy’umusirikare n’uwamufashaga guhangana n’amasasu yaturukaga mu kigo cya gisirikare cyabagamo abarinda Umukuru w’Igihugu kizwi nka Camp GP.

Igishushanyo kindi giherereye ku ruhande rw’inyuma y’inzu y’Inteko Ishinga Amategeko, kiriho ifoto y’umusirikare uhagarariye abandi bose aha icyubahiro n’agaciro abaguye ku rugamba rwo guhagarika Jenoside no kubohora igihugu bose.

Ishusho iri imbere y’urwinjiriro rukuru rw’umuryango winjira mu nyubako y’umutwe w’Abadepite igaragaraho abasirikare ba APR (Armeé Patriotique Rwandaise) bari mu mirwano, ari nako batabara abasivile babaga bari kwicwa.

Umwe mu basirikare agaragaraho yunamiye umugore wari umaze kwicwa mu gihe umuyobozi wabo agaragara abari imbere afite ku rutugu umwana muto batabaye, ari na ko afite ‘jumelle’ imufasha kureba aho umwanzi aherereye mu gihe ku rundi ruhande naho hari undi musirikare ari kurwana anatwaye inkomere.

Gusura iyi ngoro bikorwa buri munsi aho abanyeshuri bibasaba kwishyura amafaranga y’u Rwanda 700, abantu bakuru bishyura 1500 na ho abanyamahanga bakishyura 6000.

Ikibumbano cyerekana urugamba rwo guhagarika Jenoside yakorewe Abatutsi
Inyubako y'Inteko Ishinga Amategeko irimo ingoro y'amateka yo guhagarika Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza