Abarengera uburenganzira bwa muntu mu Rwanda batanze impuruza ku kibazo cy’abazunguzayi

Yanditswe na Umwali Zhuri
Kuya 26 Kanama 2017 saa 10:25
Yasuwe :
0 0

Impuzamiryango y’abaharanira uburenganzira bwa muntu, Cladho, yasabye Umujyi wa Kigali kudakoresha imbaraga mu gukura abazunguzayi mu muhanda, ahubwo hakitabazwa ubundi buryo burimo kwifashisha mu bukangurambaga abahoze muri ubu bucuruzi bwo mu muhanda bakabuvamo none ubu bakaba bariteje imbere.

Ku wa 23 Kanama 2017, nibwo Ubuyobozi bw’Umujyi wa Kigali bwatangaje ko bugiye kwifashisha Polisi y’Igihugu mu rwego rwo gukura mu muhanda abakora ubucuruzi bwo mu kajagari butemewe.

Uyu mwanzuro wari wafashwe nyuma y’ingamba zitandukanye zari zigamije kurandura ikibazo cy’abazunguzayi bacuruzaga mu kajagari zirimo gufata no gufunga ababikora, guca amafaranga ibihumbi 10 ababagurira, kububakira amasoko n’ibindi.

Umwaka ushize, Umujyi wa Kigali wakoze ibarura ry’abacururiza mu muhanda mu buryo bw’akajagari rigaragaza ko harimo abagera ku bihumbi icyenda; aho Akarere ka Nyarugenge konyine kabarurwagamo ibihumbi bitanu, Gasabo bibiri na Kicukiro bibiri.

Nyuma yo kubona ko ubu bucuruzi buteye ikibazo nibwo hahise hafatwa ingamba zo kubuca zishamikiye ku gushaka ubushobozi kugira ngo babonerwe amasoko.

Uwahoze ayobora Umujyi wa Kigali, Mukaruliza Monique, yigeze kubwira IGIHE ati “Bari bafite ubushobozi buke butabemerera kujya mu masoko asanzwe bari bugende bagakodesha aho bakorera bakishyura n’imisoro. Dufatanyije n’uturere tugize umujyi twafashe ingamba zo kubashakira amasoko cyane cyane ari aho bakunda gucururiza.”

Uyu mwanzuro kimwe n’indi ntiyigeze irandura iki kibazo mu buryo bwa burundu ahubwo abashyirwaga mu masoko bayavagamo ubutitsa n’ababuzwaga n’abakozi b’urwego rwa Dasso gukomeza gucuruza ntibashyirwe ahubwo bwacya bakagaruka. Ibi nibyo byatumye noneho hitabazwa Polisi.

Imiryango irengera uburenganzira bwa muntu yibumbiye muri Cladho, kuri uyu wa Gatanu tariki ya 25 Kanama 2017 yakoze inama maze yemeranya ko igiye gutangira ubukangurambaga bugamije gukura abazunguzayi mu muhanda.

Umuyobozi Mukuru wa Cladho, Sekanyange Jean Leonard, yabwiye IGIHE ko nk’imiryango irengera uburenganzira bwa muntu 12 ikorera mu Rwanda, bashyigikiye umwanzuro w’Umujyi wa Kigali wo gukura abazunguzayi mu muhanda.

Ati “ Ubundi ni icyemezo ni cyiza, turagishyigikiye kuko ntabwo dushyigikiye ko abantu bacuruza mu buryo butemewe n’amategeko, ko abantu bacururiza ahantu hatemewe ariko uburyo gikorwa nicyo tubona harimo aho uburenganzira bwa muntu bushobora guhungabana, urumva gukoresha imbaraga nyinshi cyane hashobora kuba harimo abafite abana, abatwite, aho ngaho gukoresha imbaraga nyinshi niho byagira abo bihungabanya, niyo mpamvu twari twasabye ko byaba byiza hashatswe ubundi buryo byakorwa nta wuhahungabaniye.”

Sekanyange yavuze ko abazunguzayi bakwiye kubaha amategeko aba yashyizweho, bakirinda guhangana n’inzego zishinzwe umutekano baba bafite aho babangamiwe, bakagaragaza ikibazo cyabo biciye mu mucyo.

Ati “ Abazunguzayi bakwiye kumva ko bagomba kubaha amategeko y’igihugu ariko noneho bakagaragaza ikibazo cy’abo niba wenda ari ahandi bakorera bakaba babisaba ariko batagiye guhangana n’inzego z’umutekano.”

Umuyobozi Mukuru wa Cladho, Sekanyange Jean Leonard

Ahereye kuri ibi, yavuze ko bagiye gutangira ubukangurambaga buganisha ku gukura abazunguzayi mu muhanda bigizwemo uruhare n’imiryango yose irengera uburenganzira bwa muntu.

Ati “ Twakoze inama, twemeranya n’imiryango igize cladho tubabwira ko bakwiye kwemera amategeko yashyizweho noneho nyuma hakaba ibiganiro. Ni nabyo twasaba Umujyi wa Kigali kugira ngo ube ubereka, niba bavuye mu muhanda bagiye hehe?”

Cladho ivuga ko bumwe mu buryo bwo gukemura iki kibazo bushingiye ku gukangurira abantu ko batazatungwa no kuba abacuruzi gusa ahubwo bagatangira gutekereza indi mirimo yababeshaho.

Harimo kandi kwifashisha mu bukangurambaga abahoze bacuruziza mu muhanda nyuma bakabivamo kugira ngo babere urugero abandi.

Sekanyange ati “Abo bishyize mu mashyirahamwe nibo bakwiye gukoreshwa kugira ngo babuze abandi kujyamo [mu muhanda]. Hari ingero nyinshi zihari aho abantu bagendaga binangira nk’abantu bahoze ari abashimusi muri Pariki y’Ibirunga nyuma yo gushyirwa muri Koperative biteje imbere ku buryo aribo barwanya abandi bashimusi. Twumva ko bakwiye gukoresha bamwe mu bahoze ari abazunguzayi bafite aho bigejeje, bagashishikariza n’abandi kugira ngo na bo babuvemo barebe ukundi bakwiteza imbere.”

Minisiteri y’Abakozi ba Leta n’Umurimo muri 2014/2015 yafatanyije n’Umujyi wa Kigali mu gukemura ikibazo cy’abazunguzayi aho hari amafaranga yatanzwe agurizwa bamwe mu bakoraga ubucuruzi bwo mu muhanda nk’igishoro.

Ubwo bufatanye bwasize abagera ku 1651 bafashijwe bahabwa Miliyoni 223 z’igishoro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza