Kwamamaza

Abari abakozi ba Mininter batumye Sheikh Fazil kuri Perezida Kagame

Yanditswe kuya 14-10-2016 saa 08:03' na Philbert Hagengimana


Abari abakozi muri Ministeri y’Umutekano (MININTER) bahaye Sheikh Musa Fazil Harerimana ubutumwa bw’ishimwe bugenewe Perezida Kagame, nyuma y’uko asheshe iyo Minisiteri agahita ababonera akandi kazi mu gihe kitarenze iminsi 10.

Ku wa 12 Ukwakira 2016 mu muhango w’ihererekanyabubasha hagati ya Sheikh Fazil wari Minisitiri w’Umutekano na Minisitiri w’Ubutabera, Johnston Busingye wasigaranye inshingano z’iyi minisiteri yakuweho; Guverinoma y’u Rwanda by’umwihariko Perezida Kagame yashimiwe kuba yarafashije abari abakozi b’iyi minisiteri yasheshwe bagahita bahabwa akazi.

Kuwa Kabiri tariki ya 4 Ukwakira 2016 ni bwo Guverinoma nshya ndetse n’abayobozi ku rwego rw’Intara batangajwe binyuze mu itangazo ryashyizweho Umukono na Minisitiri w’Intebe Anastase Murekezi. Iki ni na cyo gihe inshingano n’ububasha bya Minisiteri y’Umutekano byimuriwe muri Ministeri y’Ubutabera.

Gusesa iyo Minisiteri byatumye benshi batangira kwibaza ahazaza h’abari abakozi bayo, ariko bidateye kabiri bahise bizezwa imirimo nk’uko Minisitiri w’Abakozi ba Leta n’Umurimo, Judith Uwizeye yabitangarije IGIHE mu kiganiro cyihariye kuwa 5 Ukwakira 2016.

Minisitiri Uwizeye yari yagize ati “Baracyari abakozi ba leta tugiye kubashakira aho bashobora kujya mu zindi nzego zitandukanye. Hanyuma nta n’ubwo ari na benshi dufite icyizere ko turi buhabone ariko binabayeho ko hari abatari buhabone birumvikana ko bari bube bahagaritswe by’agateganyo hanyuma turebe niba twahabona mu mezi atandatu ari imbere.”

Ntibyagombye gutegereza ayo mezi atandatu kuko mu minsi ibiri gusa MININTER ikuweho, abo bakozi bahise bahabwa indi mirimo, ari na yo mpamvu batumye Sheikh Fazil Harerimana azabashimirire Guverinoma y’u Rwanda cyane cyane Perezida Kagame.

Muri uwo muhango wabaye kuwa 12 Ukuboza, Sheikh Harerimana yagize ati“Abari abakozi ba MININTER kuri uyu munsi hafi ya bose bamaze kubona indi mirimo, bansabye rero ko mbashimirira Guverinoma y’u Rwanda, kubona Minisiteri ivaho ku itariki ya 4 ariko ku ya 6 buri wese akaba yari amaze kubona aho agomba gukora.”

Yakomeje agira ati “Ndagira ngo rero ubwo butumwa mubungereze ku bandi bagize Guverinoma cyane cyane Nyakubahwa Perezida wa Repubulika, bambwiye ngo mushimire cyane kuko impungenge bari bafite n’uburyo zakemutse mu gihe gito byabatangaje.”

Abari abakozi ba Mininter bashimiye Perezida Kagame

Sheikh Harerimana yavuze ko abo bakozi bimuriwe muri Minisiteri y’Ubutabera, abandi bajyanwa mu zindi Minisiteri n’ibigo bya leta, ariko ngo hari hasigaye babiri gusa muri 32, kandi na bo akurikije uko yabyumvaga babimubwira biri hafi ko na bo barahabwa imirimo bidatinze.

Sheikh Fazil mu kazi ahuriyeho na buri Munyarwanda wese

N’ubwo abakozi muri Minisiteri yari abereye Umuyobozi bamaze guhabwa akazi mu bindi bigo, na we ngo hari ako aherutse guhabwa na Perezida Kagame n’ubwo yari asanzwe azirikana ko agafite nk’inshingano, gusa ngo anabonye akandi na byo byamushimisha kurushaho.

Ati “N’ubundi hari iyo yampaye (imirimo) ejo bundi mu nteko, nanjye nari nsanzwe nzi, buri munyarwanda ashinzwe iki gihugu, agomba kugira uruhare mu kucyubaka. Gutera intambwe nkaba umukozi wa Leta nyuma y’iyo nshingano hakiyongeraho indi, ibyo na byo biba bishimishije kubera ko uba ubonye indi nshingano ariko itakuvanaho iya mbere y’ubunyarwanda no gukorera u Rwanda uri muri Leta cyangwa utarimo.”

Fazil avuga ko afite inshingano nk'uzundi munyarwanda wese

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 1 Ukuboza 2016
Copyright © 2009 -2014 - IGIHE Ltd - All Rights Reserved