Abarimu bishyura inguzanyo za bagenzi babo bambuye Umwalimu Sacco barabogoza

Yanditswe na Umurerwa Emma Marie
Kuya 16 Gashyantare 2017 saa 05:57
Yasuwe : XX
0

Inguzanyo zitangwa na Koperative Umwalimu Sacco, ni bumwe mu buryo bufasha abarimu gukora imishinga izamura imibereho yabo bikunganira umushahara bahora bagaragaza ko ukiri hasi ugereranyije n’imitere y’ibiciro biri ku isoko.

Iyi koperative itanga inguzanyo z’ubwoko butandukanye zirimo inguzanyo ku mushahara ikunda kwitabirwa na benshi dore ko idasaba ingwate keretse umushahara gusa, ikaba yishyura mu myaka itarenze ibiri.

Kugira ngo umwarimu ayihabwe bisaba ko hari bagenzi be bamusinyira, ibifatwa nko kumwishingira, hakaba hari ababikoraga batazi ingaruka bishobora kubagiraho.

Amafishi bashyiraho umukono ariho ubutumwa buvuga ko wifatanyije n’ugiye gufata inguzanyo mu bijyanye n’imyishyurire mu gihe habaye ikibazo gituma adakomeza kwishyura.

Koperative Umwarimu Sacco imaze kubona ko hari abarimu baka inguzanyo bakava mu kazi batarangije kwishyura, yahise itangira gushyira mu bikorwa ibikubiye mu masezerano agenga imitangirwe y’izi nguzanyo, harimo no kwishyuza ababishingiye.

“Kwishyura inguzanyo utafashe ni akarengane”

Umwe mu barimu baganiriye na IGIHE, yavuze ko ari mu bishyujwe inguzanyo yafashwe na mugenzi we yasinyiye.

Yagize ati “Hari mugenzi wanjye twakoranaga wadusabye kumusinyira agiye gusaba ‘avance sur salaire’. Twaramusinyiye barayimuha. Nyuma y’igihe gito yahagaritse akazi, dutungurwa n’ukuntu Koperative yavuze ko ari twe tuzishyura iyo nguzanyo. Ibyo hari aho byabaye ko umuntu yishyuzwa inguzanyo atafashe? Ni akarengane.”

Abandi barimu bo mu Ntara y’Amajyepfo bagaragaje ko bishyuriye mugenzi wabo bari barasinyiye nyuma yo kuva mu kazi atararangiza kwishyura inguzanyo yari arimo.

Umwarimu ufite mugenzi we yasinyiye akaba atarishyuye afatwa nk’urimon inguzanyo kuko yimwa uburenganzira bwo guhabwa ‘avance sur salaire’.

‘Abarimu ntibasoma ibyanditse ku nyandiko’ basinya

Iyo ubajije abarimu impamvu binubira kwishyurira bagenzi babo bambuye bavuga ko ntabyo bari basanzwe bazi.

Umwe yagize ati “Njya gusinya sinasomye ahanditse ko niyambura abamusinyiye aribo bazishyura. Igitekerezo cyanjye ni uko uwambuye yajya akurikiranwa byaba ngombwa hakitabazwa Polisi, ariko kwishyuza abamusinyiye ni akarengane.”

“Icyemezo cyo kwishyuza abasinyiye abambuye twabaye tugihagaritse”

Umuyobozi wa Koperative Umwarimu Sacco, Uwambaje Laurence, yatangarije IGIHE ko iki cyemezo cyatangiye gushyirwa mu bikorwa abanyamuryango bakagaragaza ko batabyishimiye, bakaba bagisubitse.

Yagize ati “Ubu twarabihagaritse kugira ngo tubanze tubasobanurire bamenye ko niba basinyiye abantu baba babishingiye, nibambura bazabishyurira. Ni icyemezo twafashe mu nama y’inteko rusange yabaye mu mpera z’umwaka wa 2016.”

Akomeza avuga ko gusaba abarimu kwishyurira bagenzi babo babaye ba bihemu atari akarengane cyangwa amaniza.

Ati “Si akarengane ahubwo ni ibikubiye mu masezerano baba basinye, impamvu twabishyizeho ni ukugira ngo bajye basinyira uwo baziko ari inyangamugayo, nanaramuka yambuye badufashe kumukurikirana no kumwishyuza.”

“Wasobanura gute ukuntu umuntu ujijutse asinya ibyo atasomye?”

Uwambaje avuga ko iyo abarimu bavuze ngo ntibari bazi ko ku rupapuro basinyiyeho bagenzi babo handitseho ko nibambura bazabishyurira bitumvikana.

Ati “Ariko se umuntu wize uzi gusoma ujijutse ni gute wavuga ko yasinye ibyo atasomye? Ibyo wenda wabivuga ku bantu batize. Ikibazo gihari ni uko hari ababasinyira bahuriye nko mu nzira bakumva ko ari umukono bashyiraho gusa, icyo dushaka rero ni uko badufasha gusigasira umutungo wa Koperative yabo kugira ngo itazahomba.”

Uwambaje Laurence, Umuyobozi Mukuru w'Umwalimu Sacco

Akomeza avuga ko hari igihe bihaye cyo kurushaho gusobanurira abanyamuryango ba Koperative Umwarimu Sacco hanyuma bagatangira gukurikiza aya masezerano aba yasinywe, ariko kandi ngo ntibizabuza no gukurikirana abari abanyamuryango bava mu bwarimu bafite ideni bakanga kuryishyura.

Mu nama y’Inteko Rusange ya Koperative Umwalimu, yateranye mu mpera za 2016, Uwambaje yavuze ko imaze kugira abanyamuryango basaga ibihumbi 73, muri bo abamaze guhabwa inguzanyo bakaba barageraga ku bihumbi 36.

Icyo gihe yavuze ko ikibazo cy’abarimu bava mu kazi bafite inguzanyo batarishyura cyane abatazwi aho baherereye kiyibakomereye, icyakora umubare w’abafite ideni n’amafaranga atarishyurwa ntiyabitangaje.

emma@igihe.rw

.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza