Abarimu bo mu Rwanda biyongereye ku bandi bakozi bakorera ku mihigo

Yanditswe na Uwishyaka Jean Louis
Kuya 11 Ukwakira 2016 saa 09:37
Yasuwe : XX
0

Abakozi ba Leta bafite amasezerano y’akazi bamaze kumenyera gukorera ku mihigo ariko kuri ubu iyi gahunda igiye kugera ku barimu bose bo mu gihugu.

Tariki ya 5 Ukwakira 2016, ubwo hizihizwaga umunsi mpuzamahanga w’umwarimu, wizihirijwe mu Karere ka Gasabo ku rwego rw’Igihugu, mu bibazo abarimu bagejeje kuri Minisitiri w’Uburezi, hongeye kugarukwa ku kibazo kijyanye n’umushahara wabo bavuga ko ukiri muke.

Minisitiri w’Uburezi, Musafiri Papias Malimba, yabasubije ko ntacyo Leta idakora ngo imibereho ya mwarimu irusheho kuba myiza, aboneraho no kubamenyesha ko bagiye kujya bakorera ku mihigo, gahunda yiyongera ku zindi zatangiye hagamijwe kongera umushahara wa mwarimu.

Yagize ati “Umwarimu agiye kujya akorera ku mihigo, ndetse nababwira ko n’amabwiriza agena uburyo iyo mihigo izakorwa yasohotse ejo (tariki ya 4 Ukwakira) ubwo ntabwo murayabona ariko muraza kuyagezwaho.”

Minisitiri Musafiri yakomeje avuga ko nta mushahara wabona ungana na serivisi mwarimu ageza ku Rwanda n’abarutuye.

Ati “Icya mbere dukangurira abarimu ni ukumva ko bafite umusanzu ukomeye mu iterambere ry’igihugu cyacu. Icyo ni ikintu cya mbere bagomba kwishimira. Hanyuma ibijyanye n’umushahara rero ugenda wongerwa bitewe n’uko amikoro y’igihugu agenda azamuka. Muri uyu mwaka w’ingengo y’imari, abarimu bose bazamuwe mu buryo ntambike bahabwa 10%. Umwaka ukurikiyeho dushingiye ku isuzumabumenyi, abarimu bazajya bazamuka mu buryo ntambike n’uburyo mpagarike.”

Yakomeje avuga ko ibi byose bizatuma umushahara wa mwarimu ugenda wiyongera uva ku kigero kimwe ujya ku kindi ariko na none ngo bizaterwa n’amikoro y’igihugu.

Gukorera ku mihigo ni umuco ugenda usakara hirya no hino mu gihugu, hagamijwe kongera umusaruro.

Amasezerano y’ imihigo agenwa n’ iteka rya Minisitiri w’ Intebe nimero 121/03 ryo kuwa 08/09/2010 rishyiraho uburyo bukoreshwa mu isuzuma bushobozi n’izamurwa mu ntera ry’abakozi ba Leta.

Imihigo mu Rwanda yatangijwe mu 2006, aho inzego zinyuranye za leta cyane uturere zihiga imihigo zikayigenderaho mu kwiteza imbere, uyesheje neza agashimirwa naho uwananiwe kuyesa akagawa.

Abarimu mu Rwanda basaba kongererwa umushahara
Minisitiri Musafiri avuga ko kongerera umushahara mwarimu bijyana n'ubushobozi bw'igihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza