Kwamamaza

Abarokore bo muri UR-Huye basabwe umusanzu mu kurwanya ibiyobyabwenge n’ubwomanzi

Yanditswe kuya 7-11-2016 saa 06:48' na Prudence Kwizera


Ubuyobozi bwa Kaminuza y’u Rwanda n’abandi bafatanyabikorwa ba Leta, bashimiye abanyeshuri b’abarokore biga muri Kaminuza ku bw’ibikorwa byiza bikomeje kubaranga, babasaba gutanga umusanzu mu kurandura burundu ubusinzi n’ubwomanzi bikigaragara kuri bamwe mu rubyiruko.

Byagarutsweho kuri iki Cyumweru taliki ya 06 Ugushyingo 2016, ubwo abanyeshuri b’abarokore muri Kaminuza y’u Rwanda Koleji ya Huye bibumbiye mu muryango witwa Communauté des Etudiants Pantecộtises à l’Univeriste du Rwanda (CEP-UR-Huye Campus) bizihizaga isabukuru y’imyaka 15 umaze ubayeho.

CEP-UR-Huye Campus yavutse taliki ya 21 Werurwe 2001, igizwe n’abanyeshuri 203, kuri ubu ikaba ifite abagera ku 1 081 biga muri Kaminuza n’abandi barenga 1 500 basoje amasomo.

Bimwe mu bikorwa byagarutsweho bakoze kuva muri 2001, harimo isanamitima ku bantu bafite ibibazo, kubakira abatishoboye no kubaha inkunga, gusura inzibutso za Jenoside no kwigisha Abanyarwanda inzira y’ubumwe n’ubwiyunge n’ibindi.

Umwe mu banyeshuri batangije CEP-UR-Huye Campus, Juvenal Hategekimana, yagarutse kuri bimwe mu bikorwa bakoze muri Kaminuza no hanze yayo, avuga ko ubushobozi babukuraga mu bwitange no guhuza imbaraga.

Hategekimana ati “Icyo twakoze ni ukwitanga, hanyuma nk’abantu twari tumaze guhuriza hamwe imbaraga, kuko iyo abantu bishyize hamwe bagera kuri byinshi. Ibyo twakoze tubibariye mu mafaranga yaba ama Miliyoni menshi cyane. Twareberaga hamwe igikorwa naho kizabera, tukacyereka abafatanyabikorwa bacu bakadufasha”.

Hategekimana yavuze ko muri abo bafatanyabikorwa harimo Kaminuza y’u Rwanda ishami rya Huye yabahaga imodoka zibatwara n’abarezi babaherekeza, ubuyobozi bw’uturere bwabakiraga, Komisiyo y’Ubumwe n’Ubwiyunge, ADEPR, n’indi miryango nka AEE, n’abandi.

Abayobozi bafashe ijambo bashimiye CEP-UR-Huye Campus ibyiza yakoze, ariko bayisaba umusanzu mu gushaka ibisubizo by’ibibazo byugarije sosiyete.

Umuvugizi wa ADEPR, Bishop Jean Sibomana, yakomoje ku kibazo cy’ibiyobyabwenge n’ubwomanzi byugarije bamwe mu basore n’inkumi.

Bishop Sibomana ati “Iki gihe tugezemo ni igihe turwana n’ibiyobyabwenge mu rubyiruko, iki kintu mugomba guhagurukira hamwe mukacyirinda, ariko kandi mukacyirwanya no muri bagenzi banyu. Hari bamwe mushobora kuba muzi bashobora no kuba bari hagati muri mwe, kuko burya ibiyobyabwenge ntabwo ari ibya ba bandi baba hirya hariya mu cyaro gusa”.

Yakomeje agira ati “Ikindi cya kabiri mbasaba ni ukwirinda ibishuko, tujya twumva amakuru ya bamwe bishora mu busambanyi, bagata amasomo bakinyabya bakajya mu busambanyi, hari abo tujya twumva bishwe bagiye gusambana kubera ko babuze amafaranga yo kwishyura indaya. Turabasaba ngo ibyo bishuko mubyirinde kandi mwigishe n’abandi kubigendera kure, kuko birabicira ejo hazaza hanyu.”

Umuyobozi Mukuru wa Kaminuza y’u Rwanda Ishami rya Huye, Dr. Uster Kayitesi, yibukije ko Kaminuza y’u Rwanda itigisha abantu bo gutahana impamyabumenyi gusa, ahubwo bagomba kuba abafitiye sosiyete akamaro.

Dr. Uster Kayitesi ati “Kaminuza y’u Rwanda icyo imaze igomba no kumara, ni ukwigisha abantu bagira uwo mutima wa kimuntu, umutima mwiza umenya ibiwukikije, umenya ibibangamye bakemura, ariko ufite n’amaso akangutse areba ibibazengurutse”.

Abagize CEP-UR-Huye Campus bagaragaje imwe mu mishinga bitegura gukora mu minsi ya vuba, irimo gukomeza kubaka sosiyete Nyarwanda no kuyiteza imbere, basaba ko Kaminuza n’abandi bafatanyabikorwa bakomeza kubaba hafi.

Umuyobozi wa CEP-UR-Huye Campus, Elie Kwizera yagize ati “Turifuza gukora umushinga wo kogosha, n’undi w’ubucuruzi bwagutse ndetse na restaurant muri kaminuza abanyeshuri batishoboye tukabaha akazi bakabasha kubona amafaranga, kandi tuzaba turi no gushyira mu bikorwa gahunda nziza yo kwigira.”

Kwizera yagaragaje ko hari zimwe mu mbogamizi bafite zirimo kuba batarabona aho gukorera muri kaminuza, ndetse n’ubushobozi bukiri buke, gusa ubuyobozi bwa Kaminuza y’u Rwanda bwabijeje ubufatanye kugira ngo bizashyirwe mu ngiro.

Umuyobozi Mukuru wungirije muri Kaminuza y’u Rwanda, Prof Philip Cotton, nawe wari witabiriye ibyo birori, nyuma gushimira abagize CEP-UR-Huye Campus ku bikorwa byiza bikomeje kubaranga, yavuze ko ari inshingano zabo nk’abayobozi kubashyigikira mu byiza byose bakora.

Abanyeshuri bibumbiye mu muryango CEP-UR-Huye Campus, kuva kuri uyu wa Gatandatu taliki ya 05 Ugushyingo 2016, bakoze ibikorwa birimo gutanga amaraso no gupima indwara zitandura ku baturage kandi ku buntu.

Ibi bikorwa byakomeje no kuri iki cyumweru, aho batanze n’umusanzu w’ubwisungane mu kwivuza ku batishoboye bagera ku 100 bo mu karere ka Huye.

Abagize CEP-UR-Huye Campus, bavuga ko bishimira ko kugeza ubu buri shami rya Kaminuza y’u Rwanda rifite uyu muryango.

Abarokore bo muri UR-Huye basabwe umusanzu mu kurwanya ibiyobyabwenge n’ubwomanzi
Bafashe umwanya wo guhimbaza Imana mu ndirimbo
Ibyishimo byari byabasaze
Umuyobozi Mukuru wungirije muri Kaminuza y’u Rwanda, Prof Philip Cotton
Umuvugizi wa ADEPR, Bishop Jean Sibomana
Abayobozi batandukanye bari bitabiriye iki gikorwa
Bakase umugati ushushanya isabukuru y'imyaka 15
Umuyobozi Mukuru wa Kaminuza y’u Rwanda Ishami rya Huye, Dr. Uster Kayitesi (wambaye umutuku) acana urumuri rw'isabukuru

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved