Abasaga 400 babonye akazi binyuze mu guhuza abagatanga n’abagakeneye mu mezi arindwi

Yanditswe na Evariste Nsengimana
Kuya 7 Ukuboza 2017 saa 05:29
Yasuwe :
0 0

Ubuyobozi bw’Umujyi wa Kigali bwatangaje ko kuva muri Gicurasi kugeza uyu munsi, abantu 413, barimo abarangije amashuri yisumbuye na Kaminuza bamaze kubona akazi binyuze muri gahunda yo guhuza abagakeneye n’abagatanga (Jobnet).

Jobnet, ni igikorwa gitegurwa n’Umujyi wa Kigali (binyuze muri Kigali Employment Service Center: KESC), cyo guhuza abakeneye akazi n’abagashaka.

Kuwa 27 Mata 2017, ubwo iki gikorwa cyabaga ku nshuro ya kane, ubuyobozi bw’Umujyi wa Kigali, bwavugaga ko 841 ari bo bamaze kukabona, harimo 209 babonye imirimo ihoraho, 99 bikorera na 140 bafashijwe kubona aho bimenyereza akazi.

Mu nama ubuyobozi bw’Umujyi wa Kigali bwagiranye n’ibigo bitanga akazi uyu munsi, igamije gusuzuma umusaruro Jobnet yo muri Mata yatanze, Umuyobozi wungirije w’Umujyi wa Kigali ushinzwe Imibereho myiza y’Abaturage, Muhongerwa Patricia, yavuze ko abamaze kukabona kuva mu 2013 ari 1254, kandi ko hari ibigo bitigeze bimurika umubare w’abagahawe.

Yakomeje avuga ko nubwo muri iyo mibare usanga hari abakabona, ibigo byakabahaye ntibibamenyeshe, imibare ikiri hasi ugereranije n’abantu u Rwanda rufite batagira akazi, ko hagishakwa ingamba zo kuyongera binyuza mu kwigisha abafite ibyo bigo.

Imibare Ikigo cy’Igihugu cy’Ibarurishamibare cyatangaje ku wa 9 Ukwakira 2017, igaragaza ko umubare w’Abanyarwanda badafite akazi uri kuri 16.7 % ubariyemo n’abahingira amaramuko, ubushomeri mu rubyiruko (hagati y’imyaka 16-30) bukaba kuri 21 %. Ubushomeri mu bagabo buri kuri 16.1 % na ho mu bagore buri kuri 17.5 %. Mu mujyi buri kuri 18.1 % na ho mu cyaro buri kuri 16.2 %.

Umuhuzabikorwa w’ibikorwa by’umurimo muri Gahunda y’Igihugu igamije kwihutisha ihangwa ry’imirimo idashingiye ku buhinzi (NEP), Anne Mugabo, yavuze ko akamaro ka Jobnet ari ugutanga amakuru ku bashaka akazi n’abagatanga, asaba abo bireba kubyaza umusaruro ayo mahirwe.

Mugabo yakomeje asaba abafite ibigo bitanga akazi gukomeza gufasha urubyiruko rukirangiza amashuri kubona aho bimenyereza akazi, kuko bahakura ubumenyi bwunganira ubwo bakuye mu mashuri.

Umuyobozi wungirije w’Umujyi wa Kigali ushinzwe Imibereho myiza y’Abaturage, Muhongerwa Patricia, yavuze ko abamaze kubona akazi kuva mu 2013 ari 1254
Umuhuzabikorwa w’ibikorwa by’umurimo muri Gahunda y’Igihugu igamije kwihutisha ihangwa ry’imirimo idashingiye ku buhinzi (NEP), Mugabo Anne

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza