Abasirikare 1200 baturutse mu bihugu 26 basuye urwibutso rwa Jenoside rwa Kigali

Yanditswe na Habimana James
Kuya 24 Kanama 2019 saa 12:51
Yasuwe :
0 0

Abasirikare barenga 1200 bari mu myitozo ihuje ingabo z’u Rwanda, iza Afurika Yunze Ubumwe, iza Leta Zunze Ubumwe za Amerika n’izaturutse mu bihugu bimwe bigize Umuryango w’Ubumwe bw’ u Burayi basuye urwibutso rwa Jenoside yakorewe Abatutsi rwa Kigali ruri ku Gisozi.

Aba basirikare bari mu myitozo izarangira tariki 29 uku Kwezi ikaba irimo kubera mu kigo cya gisirikare cya Gabiro, irebera hamwe uko ibihugu bibungabunga amahoro byarushaho gufatanya no gutabara aho abaturage bari mu kaga kuri uyu mugabane.

Umuyobozi mukuru wungirije w’ingabo za Amerika zikorera ku mugabane wa Afurika, Brig Gen Lapthe Flora yavuze ko gusura uru rwibutso byatumye babona amahano yakorewe ikiremwamuntu n’uburyo abanyarwanda bagize imbaraga zo kongera kwiyubaka.

Yagize ati “Turaha agaciro imbaraga zakoreshejwe n’u Rwanda, uru rugendo rugaragaza igishushanyo nyakuri cy’uburyo iki gihugu cyashoboye kuva mu mahano y’icuraburindi.”

Yavuze ko ingabo zibungabunga amahoro ku Isi zifite inshingano ya mbere yo gutanga ubutumwa no gukomeza kubaka amahoro n’umutekano ku Isi, nk’uko The New Times yabitangaje.

Flora yashimiye abanyarwanda uburyo bivanye muri aya mahano yibasiye igihugu, bagahitamo inzira y’ubumwe n’ubwiyunge.

Ati “Turashimira abanyarwanda uburyo bashoboye kwihangana no kugira ubushake bwo gushaka kongera kuba igihugu kimwe, bagamije kubaka ejo heza ha buri muturarwanda.”

Aba basirikare baturutse mu bihugu birimo u Bubiligi, Botswana, Cote d’Ivoire, Repubulika Iharanira Demokarasi ya Congo, Misiri, Gabon, Gambia, Ghana, Guinea, Kenya, Madagascar, Mali, Morocco, u Buholandi, Nigeria, Congo Brazaville, u Rwanda, Senegal, Tanzania, Tunisia, Uganda, Amerika, Eswatini, u Butaliyani, Lesotho, na Zambia.

Aba basirikare bababajwe n'ubugome Jenoside yakorewe Abatutsi yakoranywe
Aba basirikare baturutse mu bihugu 26 basobanuriwe byimbitse amateka ya Jenoside yakorewe Abatutsi
Abasirikare 1200 baturutse mu bihugu 26 basuye urwibutso rwa Jenoside rwa Kigali ruherereye ku Gisozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza