Kwamamaza

Abaterwaga ipfunwe no kwitwa "Abatebo" bafite ishema ry’abakerarugendo babagana

Yanditswe kuya 23-11-2016 saa 17:24' na Emma-Marie Umurerwa


Mu myaka 22 ishize mu biganiro no mu ndirimbo, byavugwaga ko iyahoze ari Perefegitura ya Gikongoro ari ‘Iwabo w’Abatebo’, abantu bibasiwe n’inzara ikomeye, byatumaga baboha ibitebo bakabicuruza hirya no hino.

Ibyo byatumaga bamwe mu bahakomoka iyo bageraga i Kigali cyangwa mu bindi bice by’igihugu, bagira ipfunwe ryo kuvuga ko ari abanya-Gikongoro.

Aba barimo abakomoka muri Komini zakoraga ku ishyamba rya Nyungwe ari naho bakuraga imigano yo kubona ibitebo n’ibindi bijyanye na byo.

Bamwe mu baturage bahavuka bavuga ko amateka yo kwitwa ‘Abatebo’ yatumaga, babeshya inkomoko mu gihe babaga bagiye mu bindi bice by’igihugu.

Mukakibibi Angelique wo mu Karere ka Nyaruguru yagize ati “Kubera ubuzima bubi bwari buri mu muryango mvukamo, mu 1989 nagiye gukora akazi ko mu rugo i Butare, nza kuhava njya i Kigali, ariko sinajyaga mvuga ko mvuka ku Gikongoro, ahubwo navugaga ko mvuka i Cyangugu kubera ipfunwe. Ubu numva ntewe ishema na Gikongoro kuko habaye iwabo w’abakerarugendo."

Mugabo Jean Bosco nawe ati “Kuva ku bwa Kayibanda na Habyarimana (abaperezida bayoboye u Rwanda), Gikongoro yari yarasigajwe inyuma cyane, ukagira ngo hari icyaha twakoze.Ubu nta guheza kukibaho, abana bacu bariga na kaminuza.”

‘Ahahoze hahabwa akato, habaye urujya n’uruza rwa ba Mukerarugendo’

Iyo uvuze i Kibeho ku musozi wa Nyarushishi, mu Murenge wa Kibeho, Akarere ka Nyaruguru, waba uri mu Rwanda cyangwa mu mahanga, abantu bahita bumva ahabereye amabonekerwa ya Bikira Mariya ku bakobwa batatu barimo Anathalie Mukamazimpaka, Alphonsine Mumureke na Marie Claire Mukangango.

Aya mabonekerwa yatumye aka gace kaba ikimenyabose, dore ko ibihumbi n’ibihumbi bya ba mukerarugendo bahaza buri mwaka.

Bizimungu Damien atuye mu Murenge wa Kibeho, avuga ko yishimira uburyo agace bakomokamo kabaye urujya n’uruza rwa ba mukerarugendo.

Yagize ati “Nko ku munsi w’ijyanwa mu ijuru rya Bikiramariya, hano haba hari abantu baturutse ku migabane hafi ya yose yo ku Isi bikadutera ishema. ”

Aba baturage bavuga ko no mu minsi isanzwe haza ba mukerarugendo baturutse imihanda yose, ibi bigatuma ubucuruzi muri ako gace butera mbere.

‘Kutagira umuhanda n’amacumbi bidindiza iterambere’

Mu kiganiro urubuga rw’abaturage n’abayobozi gitegurwa n’Umuryango w’Abanyamakuru baharanira amahoro ‘Paxpress’ cyabereye mu Murenge wa Kibeho, tariki ya 17 Ugushyingo, abaturage bagaragaje ko bafite ikibazo gikomeye cyo kutagira umuhanda utunganyije neza n’amacumbi.

Ba mukerarugendo kimwe n’abaza gusenga ku musozi wa Kibeho wabereyeho amabonekerwa, bagorwa no kubona amacumbi, aho gufatira amafunguro hagezweho n’ibindi by’ibanze, dore ko buri cyumweru haza ba mukerarugendo bari hagati ya 3000 na 5000, bamwe muri bo ngo bagacumbikirwa n’abaturage mu ngo zabo.

Umwe mu baturage yagize ati “Iyo baje ari benshi babura aho bacumbika bikaba ngombwa ko bajya gucumbika mu ngo z’abaturage[…] birumvikana ntibibashimisha kubera ko umuntu w’umukire ntaba akwiye kurara mu rugo rw’umuturage. Hari n’abo usanga bajya kwiherera mu bihuru kubera ko nta bwiherero buhagije buhari, usanga bibangamye. ”

Icyifuzo cy’abaturage ni uko hakongerwa ibikorwaremezo by’ibanze nk’amacumbi, ubwiherero, resitora ndetse n’umuhanda ujyayo ugakorwa.

Umuyobozi ushinzwe ubuhinzi mu Murenge wa Kibeho, Nkurunziza Aphrodis, wari uhagarariye Umunyamabanga Nshingwabikorwa w’Umurenge wa Kibeho muri ibyo biganiro, yavuze ko umuhanda Huye –Kibeho abaturage bemerewe na Perezida Kagame uzatangira gukorwa mu minsi iri imbere.

Yagize ati “Umuhanda wo turawutegereje Perezida wa Repubulika yarawutwemereye[...] nk’uko babivuze amacumbi ntahagije. Ubu rero ubuyobozi burimo gushishikariza abashoramari kuza gushora imari hano ndetse hari n’ubutaka twimuyeho abaturage.”

Perefegitura ya Gikongoro yari igizwe n’izahoze ari Komini Karama, Karambo, Kinyamakara, Kivu, Mubuga, Mudasomwa, Muko, Musange, Musebeya, Nshili, Nyamagabe, Rukondo na Rwamiko. Kuri ubu ni mu Turere twa Nyaruguru na Nyamagabe mu Ntara y’Amajyepfo.

Abatuye Kibeho bavuga ko bishimira kuba agace kabo gasigaye gasurwa na ba mukerarugendo
Abantu b'ingeri zose bakunda gusura Kibeho nk'ubutaka butagatifu
Umudugudu watujwemo abimuwe mu Murenge wa Kibeho ahashyizwe ibikorwa by'abihayimana n'ahateganyijwe ibindi bikorwaremezo
Inyubako y'Ibiro by'Akarere ka Nyaruguru

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved