Abayisilamu bishyuriye amafaranga y’ishuri abana b’impfubyi barenga 100

Yanditswe na Thamimu Hakizimana
Kuya 9 Kanama 2017 saa 10:17
Yasuwe :
0 0

Mu bikorwa Umuryango w’Abayisilamu mu Rwanda (RMC) usanzwe ukora byo gutera inkunga abanyeshuri batishoboye, bahabwa amafaranga y’ishuri n’ibikoresho, yishyuriye abagera ku 102 ay’igihembwe cya gatatu cy’umwaka w’amashuri wa 2017.

Ni gikorwa cyakozwe ku bufatanye n’umuryango nterankunga w’Abadage witwa IGMG, ahatanzwe amafaranga y’ishuri asaga miliyoni enye z’amafaranga y’u Rwanda, kuri uyu wa Gatatu tariki ya 9 Kanama 2017, ku Kacyiru aho ibiro bikuru bya RMC biherereye.

Aba bana 102 baturuka mu Ntara zose z’u Rwanda, buri wese akaba yahawe ibihumbi 42 by’amafaranga y’u Rwanda.

Sheikh Mukunzi Sudi ushinzwe imibereho myiza muri RMC yasabye ababyeyi barera aba bana b’impfubyi kuzakoresha neza amafaranga bahawe.

Yagize ati “ Gufasha imfubyi biri mu nshingano zacu ni na yo mpamvu buri gihembwe tubarihira amafaranga y’ishuri n’ay’ibikoresho, icyo twabwira ababyeyi babarera ni uko bazakoresha neza aya mafaranga.”

Yakomeje avuga ko kugira ngo aba bana bafashwe binyura ku buyobozi bw’imisigiti bw’ifasi baharereyemo ndetse ko RMC ifasha impfubyi kubera ko na byo biri mu nshingano z’uyu muryango.

Kanakuze Hamida, umubyeyi wo mu Karere ka yavuze ko yishimiye inkunga yahawe kuko izamufasha gukemura ibibazo by’amafaranga y’ishuri ku bana arera.

Yagize ati “ Ndishimye cyane kubera nari maze iminsi nibaza aho nzakura amafaranga y’ishuri y’abana banjye, kuba nyabonye biramfasha."

Umuryango w’Abayisilamu mu Rwanda (RMC) usanzwe urihira amafaranga y’ishuri abana aba 102 bakaba ari bamwe muri bo.

Bamwe mu bana b'impfubyi bahawe amafaranga y'ishuri
Ababyeyi barera abana bahawe inkunga bari babaherekeje
umubyeyi witwa Kanakuze Hamida,yavuze ko yishimiye cyane aya mafaranga yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza