Abayisilamu mu Rwanda barahamagarira buri Munyarwanda kuzatora Paul Kagame

Yanditswe na Ngabo Gabriel
Kuya 19 Kamena 2017 saa 07:41
Yasuwe :
0 0

Abayobozi b’Abayisilamu mu Rwanda hamwe n’abandi bo mu nzego zifata ibyemezo muri iri torero bahuriye mu nama yiswe “Ihuriro ry’Abayisilamu mu Rwanda” baganira kuri byinshi , bafata n’imyazuro irimo uwo gushyigikira no gutora Paul Kagame mu matora ateganyijwe uyu mwaka.

Ibyari ku murongo w’ibyigwa mu nama yose muri rusange ni uko Umuryango w’Abayisilamu mu Rwanda uhagaze muri iki gihe nyuma y’imiraba inyuranye mu bihe byashize, umuryango w’Abayisilamu mu Rwanda Islam yifuza, imicungire y’umutungo mu muryango, uruhare rw’umuyisilamu mu kubaka ubuyisilamu nyabwo, imiyoborere myiza, imiterere y’ikibazo cy’imyumvire y’ubutagondwa mu Rwanda by’umwihariko no mu karere muri rusange.

Abayobozi bari bahari barimo n’abatanze ibiganiro harimo Minisitiri w’Ubutegetsi bw’Igihugu Francis Kaboneka, Umuyobozi w’Ikigo cy’Igihugu gishinzwe imiyoborere Prof Shaka Anasthase, Gen. Major Mubaraka Muganga, bamwe mu badepite, n’abandi.

Ikiganiro cya nyuma cyanafashe umwanya usumbyeho ni icyiswe “uruhare rw’umuyisilamu mu kurinda no gushyigikira ibyagezweho dukesha imiyoborere myiza”.

Kuri iyi ngingo niho ibitekerezo byisukiranyije, hatabayemo gukebakeba cyangwa guca amarenga, abatanze ibitekerezo bose bivuye inyuma, bahuriza ku kuvuga ko ari ubwa mbere Islam yakwisanzura bigeze ku kigero biriho ubu, ko bityo uwabahaye ijambo n’umudendezo batagomba kumutetereza, ko ahubwo bazamuhundagazaho amajwi agakomeza kuyobora u Rwanda.

Umubyeyi umwe w’umuyisilamukazi yafashe ijambo agira ati “Ndabasabye munkundire mbatume kuri Perezida wa Repubulika Nyakubahwa Paul Kagame, abamugeraho muzamubwire ngo turamuzirikana, turamusengera kandi tuzamutora”.

Umu Immam umwe yahise atera mu ijwi riranguruye ati ‘Kagame Oyee’, nk’abitsamuye bahagurukira rimwe (abari mu cyumba cy’inama) bati ‘Oyeee, Oyee, urasobanutse, turagushyigikiye, tuzagutora…’

Ntibyarangiriye mu biganiro n’ibyifuzo gusa, ahubwo no mu myanzuro rusange y’inama, hashyizwemo umwanzuro wa 12 ugira uti “Twiyemeje gukomeza gushyigikira no kurinda ibyiza Abanyarwanda twagezeho dukesha imiyoborere myiza ya Nyakubahwa Paul Kagame, kuko iyo miborere ye myiza ari yo soko y’amajyambere igihugu kimaze kugeraho.”

Umwanzuro wa 13 uragira uti “Twiyemeje kuzagira uruhare mu migendekere myiza y’amatora ya Perezida wa Repubulika ateganyijwe ku matariki ya 03 n’iya 04 Kanama no gushyigikira Paul Kagame kubera ibikorwa by’indashyikirwa yagejeje ku Bayisilamu by’umwihariko n’Abanyarwanda muri rusange.”

Mu kiganiro na IGIHE, Mufti w’u Rwanda Hitimana Salim yagize ati “Turi muri bamwe ba mbere mu gusaba Perezida Kagame ko yatwemerera kongera kutuyobora muri iyi myaka irindwi iri mbere mu rwego rwo kutugeza ku iterambere n’ibyiza tumwitezeho. Twebwe rero, turumva kubivuga kare kugira ngo tube tubyemeranyijweho ni ikintu cyiza cyane ku rwego rw’Umuryango w’Abayisilamu mu Rwanda.”

Mufti w’u Rwanda yakomeje asaba Abayisilamu bose by’umwihariko ndetse n’Abanyarwanda muri rusange gushyigikra inzira nziza Abanyarwanda barimo, yatangijwe kandi ikomejwe na Perezida Paul Kagame.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza