Abayobozi barimo Umulisa bakumiriwe mu kazi ka leta mu myaka irindwi

Yanditswe na Philbert Girinema
Kuya 13 Ukwakira 2016 saa 09:02
Yasuwe : XX
137 71

Inama y’Abaminisitiri yateranye Ejo kuwa Gatatu tariki 12 Ukwakira, yirukanye burundu mu bakozi ba Leta abayobozi batanu barimo Umulisa Alphonse wahoze ayobora Ingoro z’Igihugu z’Umurage w’u Rwanda.

Umulisa yirukanywe kubera amakosa akomeye yakoze mu kazi yatumye ubutabera bw’u Rwanda burimo kumukurikiranaho ibyaha bitatu birimo kunyereza umutungo wa leta, gutanga amasoko yayo mu buryo bunyuranyije n’amategeko ndetse no kwangiza ibya leta.

Kuwa 1 Kamena 2016 ni bwo Urukiko Rwisumbuye rwa Nyarugenge rwategetse ko Umulisa afungwa by’agateganyo iminsi 30.

Ikigo cy’Ingoro z’Igihugu z’Umurage w’u Rwanda Umulisa yayoboraga cyamaze guhabwa umuyobozi mushya, Robert Masozera.

Abandi birukanywe burundu mu bakozi ba Leta barimo Gatera Jean d’Amour, wari Umuyobozi Mukuru ushinzwe Igenabikorwa muri Minisiteri y’Ibikorwaremezo (MININFRA) na Nzaramba Stevenson, wari Umuyobozi w’Ishami rishinzwe Politiki n’Igenabikorwa muri Minisiteri y’Ibikorwaremezo (MININFRA) kubera amakosa akomeye bakoze mu kazi.

Hirukanywe kandi Kamonyo Pierre Célestin, wari Ushinzwe guhindura inyandiko mu ndimi muri Serivisi za Minisitiri w’Intebe kubera amakosa akomeye yakoze mu kazi na Ntaganda François, wari Umuyobozi w’Ishami rishinzwe Imicungire y’Ubutaka mu Kigo gishinzwe Umtungo Kamere mu Rwanda (RNRA) kubera ikosa ryo guta akazi.

Nk’uko Iteka rya Perezida no 65/01 ryo ku wa 04/03/2014 rigena uburyo bwo gutanga ibihano ku bakozi ba leta bakoze amakosa mu kazi ribiteganya, aba bakozi bemerewe gusaba guhanagurwaho ubusembwa ngo bagaruke mu kazi ka Leta nyuma y’imyaka irindwi.

Ingingo ya 37 ivuga ko ihanagurabusembwa ku bihano byo mu rwego rwa kabiri harimo no kwirukanwa burundu, rishoboka ari uko hashize nibura imyaka irindwi umukozi ahawe igihano.

Ibi bisobanuye ko Umulisa na bagenzi kimwe n’abandi bakozi ba Leta birukanwa burundu, bashyirwa kuri lisiti y’umukara ibakumira mu kazi ka Leta imyaka irindwi.

Ni ryari umukozi yirukanwa burundu mu bakozi ba Leta?

Mu ngingo ya 14 yo muri iri teka, hasobanurwa amakosa ahanishwa igihano cyo kwirukanwa burundu ku kazi, nk’igihano kiremereye kuruta ibindi bihano byose mu rwego rw’akazi; gihabwa umukozi wakoze rimwe mu makosa aremereye.

Ayo arimo kwanga kurahira indahiro y’abakozi ba Leta mu buryo buteganywa n’amategeko; guta akazi nta mpamvu izwi cyangwa nta ruhushya mu gihe kigeze nibura ku minsi cumi n’itanu ikurikirana.

Harimo kandi kuba yarahamijwe burundu n’urukiko igihano cy’igifungo gihwanye cyangwa gisumba amezi atandatu, kuba yarakoze uburiganya agahindura ibikubiye muri dosiye ye y’akazi, cyangwa iy’undi mukozi; yaratanze ibyangombwa mpimbano bishingirwaho kugira ngo umukozi ahabwe akazi; yaribye mu kazi cyangwa yarakubise undi muntu ku kazi n’ibindi.

Umulisa Alphonse wahoze ayobora Ingoro z’Igihugu z’Umurage w’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE