Abayobozi umunani barimo Gasana wahoze ayobora WDA bafunzwe

Yanditswe na Philbert Girinema
Kuya 21 Nzeri 2019 saa 08:59
Yasuwe :
0 0

Urwego rw’Igihugu rushinzwe Ubugenzacyaha, rwataye muri yombi abari abayobozi mu bigo bya WDA, WASAC na RSSB bakurikiranyweho ibyaha byo gukoresha nabi no kunyereza umutungo wa leta.

Mu batawe muri yombi harimo uwari Umuyobozi Mukuru wa WDA, Gasana Jérôme n’uwari ushinzwe imari n’ubutegetsi muri iki kigo.

Itangazo RIB yanyujije ku rukuta rwayo rwa Twitter riragira riti “RIB yafashe abantu umunani bakekwaho gukoresha nabi, kunyereza umutungo wa Leta. Abo ni uwari Umuyobozi Mukuru, uwari ushinzwe imishinga, Umuyobozi w’Ubutegetsi n’Imari n’Umukozi ushinzwe abakozi muri WDA; Umuyobozi ushinzwe ishoramari n’ushinzwe abakozi muri RSSB.”

Abo kandi barimo uwari Umuyobozi ushinzwe Imari muri WASAC, Ruhinyura Joseph n’ushinzwe ibikoresho n’ubutegetsi, Nyiringango Alfred. Bombi bari basanzwe barirukanywe mu 2017.

RIB yakomeje ivuga ko iperereza rikomeje no mu bindi bigo bya Leta byavuzweho kunyereza, gukoresha nabi umutungo wa leta muri raporo y’Umugenzuzi Mukuru w’Imari, kugira ngo ababigizemo uruhare bakurikiranwe kandi n’umutungo wa leta wanyerejwe ugaruzwe hashingiwe ku mategeko.

Kuva mu 2016/17, WDA yashyizwe mu majwi bikomeye kubera gucunga nabi umutungo wa leta nkuko byagiye bigaragazwa na raporo y’Umugenzuzi Mukuru w’Imari ya Leta.

WDA yavuzweho ko hari ibikoresho byinshi yaguze akayabo ariko bikamara igihe bidakoreshwa, hakaba n’ibyangirikiye mu bubiko.

Ibyo bikoresho byaguzwe mu 2015, byiganjemo iby’ubwubatsi, ububaji, ubukanishi, ibyo mahoteli na restaurant, ibyo mu mazi n’ibindi; byose byagombaga gufasha abana b’Abanyarwanda kwiga neza.

Ibibazo byagiye bigaragazwa muri raporo y’umugenzuzi w’imari ya leta muri iki kigo ni ibijyanye n’umushinga wa ‘Skills Development Project’ wari ugamije kuzamura ubumenyingiro mu Rwanda.

Mu 2011, u Rwanda rwahawe inguzanyo n’Ikigega Mpuzamahanga Gitsura Amajyambere (IDA) ingana na miliyari zisaga 18 z’amanyarwanda. Muri izo miliyari, leta yongeyeho izisaga miliyari ebyiri kugira ngo uwo mushinga ubashe gukorwa neza.

Nk’uko bigaragazwa na Raporo y’Umugenzuzi Mukuru w’Imari ya Leta ya 2016/17, WDA yaguze ibikoresho bya 241,529,263 Frw, icyo gihe byari bimaze imyaka irenze itatu mu bubiko ndetse no mu bindi bigo biyishamikiyeho hirya no hino mu gihugu.

Uretse ibyo bibazo, WDA hari n’ibindi bikoresho byari bigenewe ishuri rigomba kwigisha ibijyanye n’amahoteli ry’i Kigali (Hospitality Management Institute), yaguze n’abanyamahanga ariko byageze muri Kamena 2018 bitarazanwa mu Rwanda; bifite agaciro ka 551,736,329 Frw, aho yabanje kwishyura 242,936,166 Frw.

WASAC nayo yakunze kuvugwa mu bibazo by’imicungire mibi y’umutungo wa leta byanatumye bamwe mu bayobozi bayo bakorwaho iperereza ndetse hari n’abirukanywe barimo Nyiringango na Ruhinyura banakomeza gukurikiranwa.

WASAC kandi yagaragawemo amakosa mu itangwa ry’amasoko atandukanye afite agaciro karenga miliyari 10 Frw muri raporo y’imikoreshereze y’ingengo y’imari ya Leta n’umutungo by’igihugu 2016/2017.

Raporo y’Umugenzuzi Mukuru w’Imari ya Leta igaragaza ko WASAC ishyira mu bikorwa imyanzuro ihabwa ku kigero cya 28%. Ni cyo kigero kiri hasi cyane ugereranyije n’ibindi bigo byagenzuwe.

Gasana Jérôme yatawe muri yombi akurikiranyweho gukoresha nabi umutungo wa leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza