Abazakora ibizamini mu masomo y’ubumenyingiro bagabanutseho abarenga 1700

Yanditswe na Evariste Nsengimana
Kuya 13 Ugushyingo 2017 saa 07:31
Yasuwe :
0 0

Imibare itangwa n’Ikigo cy’Igihugu gishinzwe guteza imbere amasomo y’imyuga n’ubumenyingiro, WDA, igaragaza ko abanyeshuri bazakora ibizamini bisoza umwaka w’amashuri wa 2017, basoza icyiciro cya Kabiri cy’ayisumbuye, mu gihugu hose ari 22 302, barimo abakobwa 10 073, bangana na 45,02%, mu gihe mu 2016 bari 24 074. Ni ukuvuga ko umubare wagabanutseho 1772.

Iyi mibare igaragaza ko muri aba bazakora barimo abiga mu bigo n’abakandida bigenga aho abasaga 341 bigenga abandi 21 961 baturutse hirya no hino mashuri mu gihugu.

WDA kandi itangaza ko izakoresha ingengo y’imari ingana na 246 843 610 Frw, kugira ngo ibi bizamini bikorwe. Aya mafaranga azakora mu bikorwa bitandukanye birimo insimburamubyizi z’abazagenzura uko bikorwa, ay’itumanaho n’ibindi.

WDA ivuga ko ibizamini bizakorerwa ku bigo bingana na 89 biri hirya no hino mu gihugu, bizakorerwaho n’abaturutse ku bigo 182, aho abarezi basaga 1 189 bazaba bacunga banagenzura uko bikorwa.

Mu butumwa Umuyobozi ushinzwe ibizamini no gutanga impamyabushobozi muri WDA, Rose Mukantabana, yahaye IGIHE, buvuga ko hari impamvu zitandukanye zatumye abakora ibizamini bagabanuka zirimo kuba hari amashuri menshi ya TVET yigenga bigatuma ababyeyi babura ubushobozi bwo kubishyurira amafaranga akenewe bakabajyana mu burezi bw’ibanze bw’imyaka 12 kuko ariho baba babona hahendutse.

Ati “ Ikindi ababyeyi n’abanyeshuri benshi ntibasobanukiwe ibya TVET, bityo ntibazitabire ku bwinshi. Hari n’ibikoresho n’ibindi byangombwa nkenerwa mu mashuri ya TVET bihenze. Ibyo byose bituma abanyeshuri bagabanuka.”

Uyu muyobozi yakomeje avuga ko abanyeshuri bose uko biyandikishije gukora nta n’umwe utazakora ndetse ko uyu mwaka nta wagaragaye wiyandikishije gukora yaragiye yimuka nta manota ahagije yagize mu kizamini gisoza icyiciro rusange cy’amashuri yisumbuye, kuko abayobozi b’Ibigo bari batangaje ko ntawe bazemerera gukora ikizamini yarimutse yaratsinzwe (Unclassified:U).

Biteganijwe ko ibi bizamini byanditse ku biga amasomo y’ubumenyingiro bizamara icyumweru, bitangiye kuwa 23 Ugushyungo bikarangira kuwa 30 Ugushyingo 2017.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza