Abiga muri Kigali Christian School biyemeje kwirinda ibyatuma bishora mu biyobyabwenge

Yanditswe na Mukaneza M.Ange
Kuya 18 Gicurasi 2017 saa 04:57
Yasuwe :
1 0

Nyuma yo guhabwa ikiganiro ku bubi bw’ibiyobyabwenge n’uburyo bashobora kubyirinda, Abanyeshuri biga mu mashuri yisumbuye mu ishuri rya gikirisitu, Kigali Christian College bihaye intego yo kudaha umwanya icyo ari cyo cyose cyatuma babyishoramo.

Ku wa 16 Gicurasi 2017, nibwo abanyeshuri biga mu ishuri rya Kigali Christian School riri Kibagabaga, bahawe ikiganiro ku biyobyabwenge na Rtd Col. Mudenge Diogène.

Muri iki kiganiro Mudenge yabaganirije ku bwoko butandukanye bw’ibiyobyabwenge, na zimwe mu mpamvu zituma abantu babifata kugeza ubwo bibagize imbata.

Yakomeje ababwira ko mu mpamvu zituma urubyiruko ruza imbere mu kwishora mu biyobyabwenge, harimo amatsiko, kwishimisha no gushaka kwigirira icyizere n’ibindi.

Iyamubonye Jean Richie wiga mu mwaka wa gatandatu,yavuze ko nyuma y’ikiganiro yungutse byinshi bizatuma abasha kwirinda icyatuma yishora mu biyobyabwenge.

Ati” Nafashe ingamba ko ntazigera ngerageza kumva uko bimera. Batubwiye ko ushobora kubikora rimwe ugahita ugenderako kandi kubivaho ari ikibazo gikomeye. Ntabwo nazigera mbigerageza rero kandi nziko kubireka ari ikibazo gikomeye.”

Yakomeje agira inama bagenzi be avuga ko bakwiye kugendera kure ibiyobyabwenge, kuko bigira ingaruka nyinshi zirimo no kwangiza ejo hazaza habo kandi ko n’abikoresheje bashobora kubireka.

Umukundwa Umuhoza Germaine w’imyaka 12, we yavuze ko hari byinshi yasobanukiwe atari azi birimo ko no kunywa ikawa nyinshi bishobora kugira ingaruka zisa n’iz’ibindi biyobyabwenge.

Ati “ Nasobanukiwe ko ibiyobyabwenge bishobora gutera indwara zirimo na cancer. Ntabwo nari nziko ibiyobyabwenge bishobora no kugira ingaruka mbi ku mubiri wanjye.”

Umuyobozi wa Kigali Christian School, Muhire Gilbert yavuze ko bateguye ikiganiro nk’iki kuko bazi neza ko abo barera bageze mu myaka byoroshye ko bagwa mu bishuko byo gukoresha ibiyobyabwenge.

Yakomeje avuga ko nubwo nta mwana bafite ukoresha ibiyobyabwenge, bashyira imbaraga muri gahunda zituma batagira icyo gitekerezo, ndetse n’abavuye ku bindi bigo bari barigeze kubikoresha bakitabwaho ngo bakire burundu.

Ati”Nk’ishuri rya gikirisitu tuba tugira ngo abana babashe kubona urugero rwiza. Ni byiza tubigisha zimwe mu ndangagaciro ziri muri Bibiliya zibereka uburyo bagomba kwitwara, ariko na none ntibikuraho ko hari ibyo tugomba gukora bikumira.”

Muri iri shuri higamo abana 867 barimo 265 biga mu cyiciro cy’amashuri yisumbuye.

Abarezi na bo bakurikiranye ikiganiro ku kurwanya ibiyobyabwenge
Rtd Col. Mudenge Diogène atanga ikiganiro
Umuyobozi wa Kigali Christian School, Muhire Gilbert(iburyo)
Umukundwa Umuhoza Germaine abaza ikibazo

Amafoto:Priscilla M.Izabayo
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244