Kwamamaza

Abihayimana bagaragara mu bikorwa bya politiki kurusha abandi mu Rwanda

Yanditswe kuya 26-09-2016 saa 10:10' na Deus Ntakirutimana


Abantu batandukanye iyo babonye abanyamadini bayobotse ibikorwa bya politiki, batekereza ko abo batannye. By’umwihariko Abanyarwanda iyo batekereje uburyo abanyamadini bo muri Repubulika ya mbere n’iya kabiri banywanye na politiki n’ingaruka byagize, bituma bumva ko uwo mubano udakwiye.

Hari abungamo bakavuga ko politiki ishobora kuba ari ikizira ku banyamadini, ariko se ni byo? Ab’uyu munsi bahagaze he? Hari abakora politiki, nziza cyangwa isenya?

Nta gihugu kibaho ku Isi kidashingiye kuri politiki, niyo moteri ya leta, ariko abanyamadini nk’abagize sosiyete sivile nabo baba basabwa umusanzu muri politiki yubaka igihugu, dore ko amadini agira abayoboke benshi, ku buryo batojwe politiki nziza bayishyira mu bikorwa igatanga umusaruro, banakwigishwa mbi bakoreka ibintu.

Hari abanyamadini bahiriwe na politiki…

Mu mateka hari bamwe mu banyamadini n’abihayimana bagiye bakora ibikorwa bya politiki bakagera no ku rwego rwa Perezida w’Igihugu nka Musenyeri Fernando Armindo Lugo Méndez wabaye Perezida wa Paraguay, hagati y’umwaka 2008 - 2012.

Padiri Fulbert Youlou we yaharaniye ubwigenge bwa Congo-Brazaville anaba Perezida mu 1959 -1963. Padiri Augustin Diamacoune Senghor yayoboye Intara ya Casamance yashakaga kwigobotora kuri Senegal na Padiri Raymond Gravel wabaye umudepite muri Canada.

MusenyeriDesmond Mpilo Tutu ni umunyapolitiki waharaniye politiki y’ubumwe n’ubwiyunge muri Afurika y’Epfo, nyuma y’amarorerwa y’irondaruhu (Apartheid) yibasiye icyo gihugu, yaje guhabwa igihembo cyitiriwe Nobel mu guharanira amahoro mu 1984.

Mu Rwanda Padiri Alexis Kagame wakomokaga mu muryango w’Abiru akaba n’Umujyanama w’Umwami Mutara III Rudahigwa Charles Léon Pierre. Hari ndetse n’abanyamadini barimo abapadiri bakoze politiki mbi, bagira uruhare mu koreka u Rwanda mu marorerwa ya Jenoside.

Uyu munsi hari bamwe mu Banyamadini bagaragara kurusha abandi muri politiki y’u Rwanda, ariko badakora nk’iyakozwe n’abanyamadini mu gihe cya Repubulika zombi, ahubwo batanga umusanzu mu gukosora amakosa yakozwe na bagenzi babo.

1. Musenyeri John Rucyahana

Rucyahana yavutse tariki ya 11 Ugushyingo 1945, yakoze imirimo itandukanye mu itorero ry’Abangilikani mu Rwanda, irimo kuba umushumba wa Diyoseze ya Shyira mu karere ka Musanze.

Muri Mata 2010, Inama y’Abaminisitiri yamugize Perezida wa Komisiyo y’Ubumwe n’Ubwiyunge. Guhera icyo gihe atangira kugaragara mu ruhando rwa politiki ku buryo bweruye.

Rucyahana kandi ari mu bajyanama ba Perezida wa Repubulika akaba na Perezida w’Inama y’Ubutegetsi y’Umuryango Prison Fellowship Rwanda, ugira uruhare mu gukangurira abagororwa bagize uruhare muri Jenoside kwiyunga n’abo bahemukiye.

Mu bijyanye na politiki abikora abicishije mu mwanya afite muri komisiyo, akangurira abantu kugaragaza ukuri ku byabaye muri Jenoside, gusaba imbabazi, kwigisha ku mateka y’u Rwanda n’ibindi.

Yabaye umwe mu basabye ko Radio BBC yajyanwa mu nkiko igakurikiranwa kuri filimi mbarankuru yiswe ‘Rwanda’s Untold Story’ yakozwe n’umunyamakuru Jane Corbin.

Mu bindi bikorwa agaragaramo birimo gahunda ya Ndi Umunyarwanda n’ibindi bimugira umunyapolitiki kurusha kuba umushumba mu itorero cyangwa idini.

Musenyeri John Rucyahana

2. Musenyeri Mbonyintege Smaragde

Mbonyintege yabaye igihe kirekire ari Umuyobozi Mukuru (Rector) wa Seminari Nkuru ya Nyakibanda, Ishuri rya nyuma urimo gutegurwa kuba umupadiri anyuramo.

Nk’Umuyobozi Mukuru, Mbonyintege yagombaga kumenya politiki y’u Rwanda, akayigisha abapadiri bagombaga guhangana n’amateka mabi ya Jenoside u Rwanda rwari ruvuyemo.

Ibikorwa bifitanye isano na politiki yabikomeje ubwo yatorerwaga kuba Umuyobozi w’Inama Nkuru y’Abepisikopi Gatolika mu Rwanda, akaba n’Umuvugizi wa Kiliziya.

Yitabiriye kenshi Inama zikomeye mu gihugu, nk’Umushyikirano, izivuga kuri gahunda ya Ndi Umunyarwanda n’izindi zigamije ubumwe n’ubwiyunge. Yagaragaye kenshi avuga ku ruhare rwashinjwaga Kiliziya Gatolika muri Jenoside, ibisobanuro bisaba umuntu wacengeye politiki y’u Rwanda n’iy’Isi.

Umubano afitanye na Perezida Kagame watumye amugabira Inka ubwo yimikwaga kuyobora Diyoseze ya Kabgayi.

Musenyeri Mbonyintege aganira na Minisitiri Kaboneka hamwe na Venantia Tugireyezu

3. Mufti Habimana Saleh

Sheikh Saleh Habimana, Umuyoboke wa FPR Inkotanyi yabaye Mufti w’u Rwanda kuva muri 2001 kugeza muri 2011.

Umurimo wo kuba Mufti ntutandukanye cyane n’inshingano za Politiki, dore ko avuye kuri uwo murimo yahise atorerwa kwinjira muri politiki ku buryo bugaragara.

Inama y’Abaminisitiri yateranye kuwa 20 Werurwe 2015 yasabiye Sheikh Habimana Saleh guhagararira u Rwanda mu Misiri, umwanya akiriho kugeza n’uyu munsi.

Yemejwe nka Ambasaderi avuye mu Nteko Ishinga Amategeko aho yari umudepite uhagarariye Umuryango FPR-Inkotanyi.

Habimana Saleh nyuma y'Umushyikirano wa 2013

4. Pasiteri Antoine Rutayisire

Pasiteri Antoine Rutayisire, Umuyobozi wa Paruwasi ya Remera mu Itorero ry’Abangilikani mu Rwanda yavukiye mu Karere ka Gatsibo mu mwaka wa 1959.

Rutayisire agaragara muri Politiki y’u Rwanda, mu bikorwa bigamije gushishikariza Abanyarwanda kwitabira gahunda ya Ndi Umunyarwanda ndetse n’iy’ubumwe n’ubwiyunge no mu masengesho yo gushimira Imana ahuza abayobozi bakuru mu Rwanda, aho akunda kubabwira ko bagomba kubanza kumenya kwiyobora mbere yo kuyobora abandi.

Politiki asa n’uwayitangiye kera, kuko mu 1998 afatanyije n’Umupasiteri wavukaga i Rubavu, bashatse kureba urwikekwe ruri mu Banyarwanda, ku bijyanye n’amoko n’uturere, batumira abapasiteri ba EAR bo mu bice bya Gisenyi na Ruhengeri babahuza n’abari batuye mu yahoze ari Intara y’Umutara, bahurizwa hamwe i Kigali, barazwa mu cyumba rusange kimwe, ariko bose barara badasinziriye, bamwe bavuga bati “ izi nkotanyi ziratumara, abandi nabo bati izi nterahamwe ziratwica”.

Mu gukomeza guharanira gahunda ya Ndi Umunyarwanda, Rutayisre avuga ko abarokotse Jenoside baramutse bahuye n’ababahigaga buri ruhande rugatanga ubuhamya, hari ikintu kinini byafasha mu bumwe n’ubwiyunge no kuzamura igipimo cyo kwizerana usanga kikiri hasi.

Pasiteri Antoine Rutayisire

5. Padiri Ubald Rugirangoga

Rugirangoga Ubald yavukiye ahahoze ari muri Perefegitura ya Cyangugu muri Gashyantare 1955. Mu Rwanda azwi nk’umunyamasengesho n’umukozi w’ibitangaza usenga benshi bagakira.

Padiri Ubald yatangije Gacaca Nkirisitu muri Paruwasi ya Mushaka yayoboye nyuma ya Jenoside, iyo gahunda yaje gusakara muri Kiliziya zo mu Rwanda, yari igamije gufasha abayoboke b’iryo dini kwemera ibyaha, kwirega no gusaba imbabazi.

Icyo gikorwa cy’isanamitima cyatumye benshi bemera uruhare bagize muri Jenoside, bagasaba imbabazi abo bahemukiye, cyageze no mu zindi paruwasi zirimo Ntendezi, Nyamata, Mashyuza, Shangi, Nkanka, Mugombwa ndetse no muri Diyosezi ya Butare.

Ubald yatoranyijwe ku rwego rw’igihugu mu barinzi b’igihango 17 bari mu mujishi wa Ndi Umunyarwanda bashimirwa ko bimakaje ubumwe n’ubwiyunge.

Ubald ababazwa n’uburyo mu Rwanda habura itorero na rimwe ryatangwaho urugero rwo kuba ritaragize uruhare muri Jenoside yakorewe Abatutsi. Ati “Habure itorero na rimwe ryakwivuga ibigwi ngo twebwe nk’itorero ryacu ni ukuri turi abere b’amaraso y’Abatutsi yamenetse muri Jenoside”.

Padiri Ubald Rugirangoga

6. Pasiteri Ezra Mpyisi

Pasiteri Ezra Mpyisi yavutse ku ngoma ya Yuhi Musinga mu mwaka wa 1922 i Nyanza ku gasozi kitwa Gishike. Mpyisi ni umwe mu bantu bagaragaye kuva kera muri Politiki y’u Rwanda, ahereye mu myaka 1950 ubwo yabaga Umujyanama w’Umwami Mutara III Rudahigwa bari mu kigero kimwe.

Muri politiki y’ubu, Mpyisi agaragara mu nyigisho atanga kuri Radio n’ibiganiro agirana n’abantu batandukanye ku mateka y’u Rwanda, avuga nk’uwayabonye uyu munsi.

Muri 2014, Mpyisi yafashe indege yerekeza muri Amerika ayoboye intumwa zari zivuye mu Rwanda zigiye kubonana n’Umwami Kigeli V Ndahindurwa baganira ku buryo yataha.

Mu buzima bwe anenga amatorero n’Abakoloni bitwaje Ijambo ry’Imana mu binyoma, bagateza umwiryane wagejeje u Rwanda kuri Jenoside yakorewe Abatutsi.

Pasiteri Ezra Mpyisi

7. Musenyeri Birindabagabo Alex

Birindabagabo asanzwe ari Umuyobozi Mukuru w’Umuryango Mpuzamatorero mu Rwanda Peace Plan akaba n’Umushumba wa Diyoseze y’Abangilikani ya Gahini.

Muri iyi minsi yumvikana atanga ibitekerezo bitandukanye byuzuyemo politiki, ndetse no mu biganiro by’abanyapolitiki n’abayobozi b’amadini n’amatorero mu Rwanda.

Mu minsi yashize yumvikanye asaba ko abapasiteri n’abapadiri bahamijwe ibyaha bya Jenoside bakwamburwa ayo mazina, ndetse yemeza ko hari abapasiteri yagiye ahagarika nyuma yo gukatirwa ibyo byaha bakarangiza n’ibihano.

Yumvikanye kandi asaba abakirisitu gufata iminsi yo gusenga no kwiyiriza, bagafatira umwanzuro ikibazo cy’abana bo mu mihanda, bakakigira icyabo kurusha izindi nzego ndetse anenga n’abagabo bafite amaso yabo ahora atumbiriye abagore b’abandi.

Alex Birindabagabo uyobora Itorero ry'Abangilikani

Birindabagabo yamaganira kure abavuga ko yinjiye muri politiki, ahubwo ko ari umuhanuzi udashobora guhunga politiki, kuko abumbura akanwa ke ashima ibyiza byagezweho cyangwa agaya ibibi bihari.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved