Abize ubuforomo bongeye kwinubira amafaranga basabwa ku bizamini bibinjiza mu mwuga

Yanditswe na Cyprien Niyomwungeri
Kuya 17 Kanama 2017 saa 09:23
Yasuwe :
1 0

Abize ubuforomo n’ububyaza ntibavuga rumwe n’Inama y’Igihugu y’abaforomokazi, abaforomo n’ababyaza yongeye gusaba abize uyu mwuga gutanga mbere amafaranga ibihumbi 40 byo gukora ibizamini bibahesha uburenganzira bwo gukora uyu mwuga nyamara byari byemejwe ko azajya atangwa nyuma.

Ubwo Perezida Kagame yahuraga n’abanyeshuri ba Kaminuza bagaragaje ko hari amafaranga bakwa yo gukora ibizamini bibahesha uburenganzira bwo gukora umwuga kandi bagorwa no kuyabona bakirangiza amasomo, dore ko ntaho baba bagakoze n’ikiraka.

Perezida Kagame yabihaye umurongo w’uko bigomba koroshywa ntibibe nko guhana umuntu umusaba amafaranga kandi atarabanza no gukora.

Mu ibaruwa yo ku wa 17 Gashyantare 2017 IGIHE ifitiye kopi, iyi nama y’abaforomokazi, abaforomo n’ababyaza yemeje ko guhera kuwa 20 Gashyantare 2017 abashaka gukora biriya bizamini batazongera guhita bishyura ako kanya ariya mafaranga nk’uko bari basanzwe babigenza.

Gusa urujijo rwavutse ubwo kuwa 10 Kanama 2017 iriya nama yongeraga kwivuguruza igasaba abize ubuforomo n’ububyaza gutanga 40,000 Frw y’ibizamini bitarenze ku wa 30 Kanama 2017 kugira ngo bazabashe kubikora kuwa 11 Nzeri 2017.

Mu kiganiro IGIHE yagiranye na Barabwiriza Jean d’Amour uhagarariye Umuryango w’abanyeshuri biga ubuforomo n’ububyaza mu Rwanda, yavuze ko iki cyemezo gitunguranye cyane ku buryo hari abatazayabona bashobora kubura uko bakora biriya bizamini.

Yagize ati “Kuyatanga biratugora tukiva ku ntebe y’ishuri, abenshi muri twe nta bushobozi, 95% barihirwa na leta nka 80% baba mu byiciro byo hasi bitabasha kubona ayo mafaranga. Twumva bajya bareka tukayatanga nyuma twamaze kubona amanota kuko twabona uko tujya no gushaka akazi tukayashaka.”

Yongeyeho ko kuba bari bayakuyeho nyuma bakayasubizaho byatumye abazakora ibizamini batayitegura. Avuga ko igiteye inkeke ari nyirantarengwa yo gutanga ariya mafaranga yashyizweho.

IGIHE yagerageje kuvugana n’Umwanditsi mukuru w’inama y’abaforomo n’ababyaza, Julie Kimonyo, ntibyashoboka kuko yasanze telefoni ye ngendanwa itari ku murongo.

Gusa iyi nama yigeze gutangaza ko kwaka amafaranga nyuma y’ibizamini bishoboka ariko byaterwa nuko babonye abaterankunga babishyurira amafaranga yo kubitegura, kubikoresha no kubikosora.

Yavuze kandi ko abazacikanwa n’ibizamini byo kuri iyi nshuro bazategereza izindi kuko bidakorwa rimwe gusa. Ikizakurikira icyo muri Nzeri uyu mwaka kizakorwa muri Gashyantare 2018.

Mu Rwanda hari abaforomo n’abaforomokazi bagera ku bihumbi 12 n’ababyaza 1 800. Abifuza gukora ibizamini bibahesha uburenganzira bwo gukora umwuga w’ubuforomo n’ububyaza uyu mwaka babarirwa hagati ya 800 na 1 000.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza