ACP Mbonyumuvunyi na Depite Nkusi bahishuye amayeri n’ibicumbi bya ruswa mu Rwanda

Yanditswe na Cyprien Niyomwungeri
Kuya 17 Gashyantare 2017 saa 01:11
Yasuwe :
0 0

Raporo ya 2016 y’Umuryango Mpuzamahanga urwanya ruswa n’akarengane, Transparency International, igaragaza ko u Rwanda ari urwa mbere muri Afurika y’Iburasirazuba rufite ruswa nkeya, urwa gatatu muri Afurika n’urwa 57 ku Isi yose.

Mu kiganiro ku miterere ya ruswa, aho yiganje n’amayeri mashya yo kuyitanga mu Rwanda cyatanzwe na Depite Nkusi Juvenal, Umushinjacyaha Mukuru, Mutangana Jean Bosco na ACP Jean Nepo Mbonyumuvunyi, uyobora ishami ryo kurwanya ruswa muri Polisi y’Igihugu, bagaragaje ko hari intambwe imaze guterwa ariko hakiri ibyuho bya ruswa bigomba gukurwaho.

Depite Nkusi yagaragaje ko mu Rwanda hari ruswa cyane cyane mu kwinjira mu kazi ku bakozi bashya, abakozi ba baringa, kuzamurwa mu ntera ku bakozi basanzwe mu kazi, kongererwa ubumenyi, misiyo z’imbere mu gihugu no hanze, mu gucunga no gukurikirana imishinga igamije kuzamura abaturage no gufasha abatishoboye.

Ati “Murabizi duhemberwa hamwe ariko mu buryo bwo gukora imishahara bw’igihugu umuntu ashobora kuyinjiramo agahemba abantu batabaho. Ubuhanga burimo buragera aho uko abantu bashobora guhemba abantu ba baringa. Haba mu burezi, mu buvuzi, no mu yindi mirimo isanzwe.”

Yakomeje agira ati “Ruswa kandi iri mu gutanga amasoko ya leta no gucunga amasezerano, cyane cyane mu nyubako z’ibiro by’inzego za leta, ibikoresho byo mu rwego rw’ubuvuzi, gukorera imirimo ku giciro cyo hejuru, ibikoresho bitujuje ubuziranenge n’ibindi.”

Depite Nkusi yagarutse ku mayeri mashya mu mitangire ya ruswa mu nzego z’igihugu, agaragaza ko mu mitegurire y’amasezezerano, imiterere yayo no mu kuyasinya hari aho usanga ibyuho bya ruswa.

Ati “Gutinda gusinya amasezerano, gusiragiza uwatsindiye isoko, guha isoko uwaciye amafaranga make, guha umuntu umwe amasoko menshi, kandi mu gihe kimwe ahantu hatandukanye, guca isoko mo ibice byinshi birenze ibyemewe n’amategeko, abacamanza bakoresha abavoka nk’abakomisiyoneri mu kwakira ruswa.”

ACP Mbonyumuvunyi yongeyeho ko ikoranabuhanga muri iki gihe rifite uruhare runini mu mitangire ya ruswa, aho abayitanga n’abayakira bakoresha uburyo bwo kubitsa, kohererezanya amafaranga kuri telefoni Mobile Money.

Nkusi yasabye ko gutanga ruswa bikwiye kuba igikorwa gihenze, uyitanga bikamurushya n’uyakira bikamurushya, kandi hakagenwa ibihano bikomeye birenze kwihanangiriza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza