Agahinda n’urujijo ku bavuzwe muri Raporo ya Human Rights Watch

Yanditswe na Herve Ugirumukunda
Kuya 18 Ukwakira 2017 saa 08:29
Yasuwe :
0 0

Nyuma y’uko Komisiyo y’Igihugu ishinzwe kurengera Uburenganzira bwa Muntu inyomoje raporo y’Umuryango Human Rights Watch ivuga ko abantu biba utuntu duto bicwa abandi bagakorerwa iyicarubozo, bamwe mu bashyizwe muri yo bagaragaje akababaro n’urujijo ku buryo iyi raporo yakozwe.

Iyo raporo ishinja inzego z’umutekano z’u Rwanda ko kuva muri Mata 2016, zishe abantu basaga 37 n’abandi bane bakaburirwa irengero bashinjwa kwiba ibintu biciriritse nk’ibitoki, inka cyangwa moto, abandi bagakekwaho kwinjiza urumogi baruvanye muri Repubulika Iharanira Demokarasi ya Congo no kuroba bakoresheje indobani zitemewe.

Kimwe na Komisiyo y’Igihugu y’Uburenganzira bwa Muntu, abantu bazi bamwe mu bavugwa muri iyo raporo bagaya cyane Human Rights Watch, kuko bagenzi babo bakiriho, abandi bakaba babizi ko bapfuye bazize indwara cyangwa barohamye.

Abakiriho n’abo mu miryango yabo baratunguwe!

Habanabashaka François Xavier, umukuru w’Umudugudu wa Muyira mu kagari ka Muyira, Umurenge wa Mabare mu Karere ka Rutsiro, anyomoza amakuru y’uko uwitwa Nzamwitakuze Donath yapfuye kuko abizi neza ko akiriho.

Ati “Yabaye mu mudugudu wa Muyira, ahaba igihe kigera nko ku mwaka n’igice aza kuhava yimukira i Gisenyi nyuma dufata amakuru ko yagiye Uganda avuyeyo aragaruka ariko amakuru mfite ni uko yagarutse aba iwabo aho akomoka i Rusebeya mu Kagari ka Kabona, Umudugudu wa Rwamvura.”

Bishimangirwa na mukuru w’uvugwa ko ari nyakwigendera, Siborurema Innocent uhamya ko Nzamwitakuze yagiye muri Uganda kwa sebukwe ariko akaba yaragarutse akaba atuye iwabo.

Nsanzabera Tharcisse wo mu mudugudu wa Buhozi, akagari ka Bahimba, umurenge wa Nyundo we ngo yababajwe no kumva muri raporo havugwamo ko yitabye Imana kandi akiriho nta n’ikibazo afite.

Yagize ati “Abo bantu bavuga ko nitabye Imana barabeshya kuko njye ndahari. Ntibakagombye rwose kumbeshyera kandi mpari. Nta basirikare bigeze bagera iwanjye nahamagawe na gitifu w’akagari, ngeze ku kagari arambwira ngo kuri sitasiyo ya Kanama bari kunshaka ngo hari abasore babiri bahafungiwe ngo bavuga ko inka bari bibye ari njye bari bayizaniye; naramanutse ngeze kuri sitasiyo nsanga hafungiyemo abasore babiri nanjye baramfunga.”

Nsanzabera kuri ubu afungiye muri gereza ya Rubavu aho ari gukorwaho iperereza ku bujura bw’inka, mu gihe HRW ivuga ko yamaze kuva muri iyi si y’abazima.

Urupfu rw’abishwe n’indwara narwo rwitiririwe inzego z’umutekano z’u Rwanda

Undi watangajwe n’ibyo Human Rights Watch ivuga ni Ndiseguye Alexis. Asobanura ko yumiwe yumvise ko uyu muryango uvuga ko Ntiriburakaryo Jean Damascène yishwe kandi ari mu bamushyinguye amaze guhitanwa n’agakoko gatera SIDA.

Ati “Yitabye Imana yararanye amafaranga yanjye, baza kumbwira bati Ntiriburakaryo yapfuye, ndavuga nti ko twatandukanye ari muzima ubwo byaba bimeze gute? Barambwira ngo bafashe amafaranga yanjye yari yararanye, barayampa nta kindi twakoze: twaricaye tugura isanduku turamushyingura.”

Ndiseguye asobanura ko Ntiriburakaryo yakoze Jenoside yakorewe Abatutsi mu 1994 akemera icyaha agahabwa imbabazi na Perezida Kagame mu 2005 apfa muri 2006 mu gihe HRW yo ivuga ko yapfuye mu mwaka ushize.

Mbungurubwere Vicentia we ngo yarakajwe no kumenyeshwa ko hari abavuga ko umugabo we Kanyesoko Jean yapfuye yishwe kandi yarazize indwara.

Yibuka ko umugabo we yatangiye ataka mu nda, agashiriramo umwuka mu bitaro bya Gisenyi. Ati “Banaduhaye icyemezo cy’uwitabye Imana ndibuka ni kuri 22 z’ukwa mbere mu 2015, Twari dufitanye abana batatu, ariko yari afite abandi babiri yabyaye ku bandi [bagore] babiri.”

Yunzemo ko abatangaje ko yishwe n’inzego z’umutekano babeshya ati “mbihamiriza ko namurwaje n’abaturage barabizi baramugemuriye cyane ku Gisenyi.”

Abarobyi barohamye mu Kivu, Human Rights Watch yo ivuga ko Leta yabishe ibaziza uburobyi butemewe

Naho Rutavogerwa Mussa utuye ku Kirwa cya Bugarura mu Kagari ka Rushaka, Umurenge wa Muboneza n’ubu ntiyiyumvisha ukuntu Human Rights Watch yatinyutse kuvuga ko Bazangirabate Amran yishwe n’abashinzwe umutekano, kandi yararohamye ari kumwe na bagenzi be mu Kivu.

Ati “Urupfu rwe rwabaye mu buryo butunguranye, yavuye hano ajya mu bwato agiye kuroba mu Kiyaga cya Kivu, ageze mu mazi bari mu bwato ari batatu, kubera akato barimo kari gatoya, n’umuyaga ujyamo bararohama. Barohamye nka saa mbiri z’ijoro, barayemo [boga], uwarokotse umwe muri bo yatubwiye ko batangiye gupfa imbaraga zibashiranye saa sita z’amanywa.”

Rutavogerwa avuga ko undi wapfuye wari kumwe na Bazangirabate ari Niyomugabo naho uwitwa Isingizwe we yarokotse impanuka y’iryo joro n’ubu aracyariho.
Human Rights Watch, ivuga ko hari abarobyi bishwe mu Kivu bazira gukoresha indobani zitemewe za kaningiri, inavuguruzwa na Nsanzirazose Fabrice utuye mu mudugudu wa Bukiro, akagari ka Karambi, umurenge wa Kivumu mu karere ka Rutsiro.

Ashimangira ko Ntakingora Juma atishwe, ahubwo ngo “yagiye kuroba mu ijoro agezemo haza kuba impanuka bararohama n’ubwato, nawe aburirwa irengero ntawigeze abona umurambo we.”

Yakomeje ati “ariko amakuru agaragara ni uko hari abandi barobyi bagiye batanga amakuru y’uko bumvise abantu batabaza mu ijoro, babura uburyo babafasha kuko nabo umuhengeri wari uri kubatera hejuru.”

Ndengejeho Simon, wo mu Murenge wa Muneza, mu Karere ka Rutsiro, nawe mu buhamya bwe yemeza ko bagenzi be Nizeyimana Yahya na Tuyisenge Moise barashwe n’ingabo za Repubulika Iharanira Demokarasi ya Congo, bisanze mu mazi y’icyo gihugu.

Ati “Twagiye kuroba tugera mu mazi ya Congo, umuyaga watujyanyeyo, umaze kutujyanayo, twaje guhura n’abasirikare ba Congo bahita baturasa, twarasandaguritse mu bwato twari turimo, tujya mu mazi turoga, buri wese yoga ukwe n’undi kwe, gusa mu koga kwanjye barambonye baransanga kugeza ubwo banshyikira bari kuturasaho, banandasa no mu kaboko bajya kumfungira i Goma.”

Ubu buhamya n’ubundi bw’ababajijwe na Komisiyo y’Igihugu y’Uburenganzira bwa muntu bushimangira ibyagiye bivugwa kuri raporo za Human Rights Watch zivuga ibinyoma ku Rwanda.

Minisitiri w’Ububanyi n’Amahanga w’u Rwanda, Louise Mushikiwabo, niwe wigeze kubwira abanyamakuru ko umuntu wese ushaka kumenya ukuri k’u Rwanda, atakwirirwa asoma raporo za Human Rights Watch.

Siborurema Innocent ahamya ko mukuru we Nzamwitakuze Donath ari muzima
Mbungurubwere Vicentia ntashidikanya ko umugabo we yishwe n'indwara
Ndengejeho Simon yarokotse ari wenyine, bagenzi be Nizeyimana Yahya na Tuyisenge Moise bicwa n'ingabo za Congo
Nsanzabera Tharcisse ntiyari yakira inkuru y'uko hari abavuga ko yapfuye, kandi akiriho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza