Aho batekereza gukora jenoside hose ntabwo twarebera twatinzwa n’ikirere gusa - Gen Mubarak

Yanditswe na Emma-Marie Umurerwa
Kuya 8 Kamena 2019 saa 04:39
Yasuwe :
0 0

Umuyobozi w’Ingabo mu Mujyi wa Kigali no mu Ntara y’Iburasirazuba, Gen Maj Mubarak Muganga, yavuze ko ingabo z’u Rwanda, zitazigera zirebera aho Jenoside yaba irimo gukorwa hose.

Yabivuze mu muhango wo kwibuka abana barererwaga muri SOS Rwanda hamwe n’abakozi bayo bishwe muri Jenoside yakorewe Abatutsi muri Mata 1994.

Abana b’imfubyi icyenda barererwaga muri SOS Rwanda, hamwe n’abakozi b’uyu muryango bishwe muri Jenoside yakorewe Abatutsi. Batatu muri aba bana biciwe muri SOS ku Kacyiru, abandi batandatu bicirwa muri SOS ku Gikongoro.

Maj Gen Mubarak Muganga, yavuze ko Ingabo zari iza FPR Inkotanyi zari muri CND zabashije kurokora abana ndetse n’abakozi ba SOS Kacyiru, gutabara abana bari muri SOS Gikongoro byo ntibyahita biborohera kuko hari muri “Zone Turquoise”.

Ati “Aho twashoboye kugera hose jenoside twarayihagaritse dukoresheje ingufu zose zishoboka zirimo no kwitanga benshi muri bagenzi bacu bahasize ubuzima bagamije ko twarengera ubuzima bw’abandi.”

Yakomeje avuga ko aho batekereza gukora Jenoside hose ingabo z’u Rwanda, zitabirebera mu gihe zishoboye kuhagera.

Ati “Ariko ubu sinzi ko hari n’aho tudashobora kugera kuko dufite RwandAir, tuzajya dutizwa n’ikirere kibi gusa. Twatabara tutitaye ngo nuko atari abanyarwanda ahubwo twitaye ko ari ikiremwamuntu.”

Umuyobozi wa Porogaramu ya SOS Kigali, Karega Diogène, yanenze cyane abantu bari bashinzwe kurera abana ahubwo akaba aribo babatanga bakicwa.

Ati “Jenoside yakorewe Abatutsi yateguranwe ubugome bw’indengakamere aho abari bashinzwe kurera abana aribo baciye inyuma bakabagambanira bakicwa.”

Umuyobozi w’Akarere ka Gasabo, Rwamurangwa Stephen, yasabye urubyiruko rurererwa muri SOS Rwanda, kurangwa n’indangagaciro yo gukunda igihugu no guharanira ishema ryacyo.

Yashimye cyane ingabo z’Inkotanyi zakoze uko zishoboye Jenoside yakorerwaga Abatutsi igahagarikwa, umugambi wo kurimbura abatutsi wari waracuzwe na Leta mbi yariho ugapfuba .

Hakozwe urugendo rwo kwibuka abana barererwaga muri SOS Rwanda hamwe n'abakozi bishwe muri jenoside yakorewe Abatutsi
Bamwe mu barera abana muri SOS Rwanda bashyira indabo ku Rwibutso
Umuyobozi w'Inama y'Ubuyobozi ndetse akaba ahagarariye SOS Rwanda mu mategeko Jean Gakwaya ashyira indabo ku rwibutso
Abayobozi batandukanye bunamiye inzirakarengane zazize muri Jenoside yakorewe Abatutsi
Abana barererwa muri SOS Rwanda hamwe n'abahiga basabwe kurangwa n'indangagaciro yo gukunda Igihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza