AIF yahawe igihembo cy’uruganda rutanga icyizere cy’ahazaza rubikesha gufasha abahinzi

Yanditswe na Evariste Nsengimana
Kuya 17 Ukuboza 2019 saa 10:56
Yasuwe :
0 0

Uruganda Africa Improved Food (AIF) rukorera mu Rwanda ifu izwi nka ‘Nootri’ rwahawe igihembo cy’urukora ibiribwa rutanga icyizere cy’ahazaza mu bihembo bizwi nka ‘Foodex (Food Industry Excellence) Awards, bihabwa inganda zahize izindi buri mwaka.

Iki gihembo AIF yagishikirijwe ku wa 5 Ukuboza 2019 mu muhango wabereye i Nairobi muri Kenya, witabirwa n’abayobozi b’inganda zikora ibiribwa n’ibinyobwa.

Itangazo uru ruganda rwashyize ahabona ku wa 17 Ukuboza 2019, rigaragaza ko muri uwo muhango kandi ifu izwi nka Nutripro yatangiye gukorwa muri uyu mwaka n’uruganda Tropikal Brands Afrika ku bufatanye na AIF, yashimwe nk’ifu nziza y’umwaka.

AIF yahawe igihembo cy’uruganda rutanga icyizere cy’ahazaza kubera gukorana bya hafi no kongerera ubushobozi abahinzi b’ibigori bo mu Rwanda, rukabafasha kugira umusaruro wujuje ubuziranenge.

Umuyobozi ushinzwe Ibikorwa muri AIF, Nzorubara Doriane, ni we wafashe igihembo cyahawe uru ruganda rumaze kubaka izina mu Rwanda no mu Karere.

Izindi nganda zahawe ibihembo harimo National Foods Ltd rwo muri Zimbabwe, Mjengo Ltd na Capwell Industries Ltd zo muri Kenya.

Victoria Kutima wafatiye ibihembo uruganda Tropikal Brands Afrika yashimye intambwe urwo ruganda rukomeje gutera mu kongerera agaciro umusaruro w’ibihingwa bikenerwa cyane muri Afurika y’Iburasirazuba.

Umuyobozi ushinzwe Imenyekanishabikorwa muri Tropikal Brands Afrika Limited, Simon Kabue, yavuze ko muri urwo ruganda bafatanye urunana mu gutunganya no kongera agaciro k’ibiribwa abaguzi bakenera.

Ati “Kumenya ibyangombwa mu buzima bw’umuntu nibyo bituma tuva mu gutunganya ibiribwa mu buryo buciriritse tukagera ku butangiza intungamubiri kamere, bihendutse, bidafite uruhumbu kandi bifite ibyo umuryango ukeneye. Ibyo bigaragazwa n’ifu y’igikoma ya Nutripro.”

Ubufatanye bwa AIF na Tropikal Brands Afrika buje bwiyongera ku bwo uru ruganda rwagiranye n’Ishami rya Loni rishinzwe Ibiribwa (WFP) mu kubatunganyiriza ifu ihabwa impunzi muri Kenya, Uganda na Sudani y’ Epfo izwi nka Super Cereal yari isanzwe itunganyirizwa mu Burayi.

Bwiyongera ku bundi rufitanye na Minisiteri y’Ubuzima mu Rwanda, aho rukora ifu izwi nka Shisha Kibondo igira uruhare mu kurinda abana ingaruka z’imirire mibi.

Uruganda rwa AIF rwashinzwe ku bufatanye bwa Leta y’u Rwanda n’Urugaga Mpuzamahanga rw’Ibigo by’Imari birimo Icy’Abaholandi cyita ku Buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) n’Ishami rya Banki y’Isi ryita ku Ishoramari, IFC.

AIF yafunguye imiryango ku wa 31 Gicurasi 2017. Uru ruganda rukaba rufite ubushobozi bwo gukora toni ibihumbi 45 by’ifu ku mwaka. Uru ruganda rukoresha abakozi barenga 300, mu gihe abahinzi rugurira umusaruro bo barenga ibihumbi 24. Intego yarwo ni ukugira uruhare mu kugabanya umubare w’abana bagwingiye bakava kuri 38% bakagera kuri 32% mu 2020.

Nzorubara Doriane ubwo yashyikirizwaga igihembo cya AIF
AIF yahawe igihembo cy'uruganda rutanga icyizere cy'ahazaza kubera rukorana n'abahinzi
Ifu ya Nutripro ikorwa ku bufatanye na AIF nayo yahawe igihembo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza