Kwamamaza

Ak’abapfobya n’abahakana Jenoside mu Bufaransa kashobotse

Yanditswe kuya 30-10-2016 saa 09:32' na IGIHE


Ukutavuga rumwe k’u Rwanda n’u Bufaransa kuri Jenoside yakorewe Abatutsi mu 1994 ni ingingo ikunze kugaruka kenshi, aho u Rwanda rubushinja kuyigiramo uruhare no kureberera ibikorwa byo kuyihakana no kuyipfobya bikunda kugaragara kuri bamwe mu babutuye biganjemo abari abayobozi n’abakiyobora.

Ibi bituma amashyirahamwe y’abarokotse Jenoside, abashakashatsi n’imwe mu miryango iharanira uburenganzira bwa muntu, idahwema kotsa igitutu icyo gihugu cy’igihangange ngo cyemere uruhare cyagize mu mateka mabi yaranze ikinyejana cya 20, ndetse banarusobanurire Abanyarwanda n’Abafaransa ubwabo kuko bangije izina ry’icyo gihugu.

Ni inzira ndende izakomeza kugendwa ariko na none aho igeze ntawabura kuvuga ko hashimishije, kuko mu minsi mike itarambiranye inzozi za benshi zizaba impamo amategeko y’u Bufaransa agatangira kwemera ko uhakanye cyangwa agapfobya Jenoside yakorewe Abatutsi agezwa imbere y’ubutabera.

Mu kiganiro cyihariye IGIHE yagiranye na Alain Ngirinshuti, Visi Perezida wa Ibuka- France yagarutse ku rugendo rurerure banyuzemo kugira ngo bagera aho u Bufaransa butora itegeko ritanga icyizere ko umuti w’abahakana n’abapfobya Jenoside waba ugiye kuboneka muri kiriya gihugu.

Ngirinshuti avuga ko mu myaka 22 ishize amategeko y’u Bufaransa yakumiraga Abanyarwanda n’abandi bashaka gutanga ikirego mu nkiko gifite aho gihuriye n’ihakana n’ipfobya rya Jenoside yakorewe Abatutsi, ariko akemera iy’Abayahudi.

Yagize ati “Twari dufite itegeko ritubuza, ntabwo ryabuzaga amashyirahamwe y’abarokotse Jenoside yakorewe Abatutsi ubwabyo ngo usange byanditsemo ko badashobora kujya mu bucamanza, ariko uburyo ryari rikozemo ryari rigenewe gusa Jenoside yakorewe Abayahudi.”

Nta Jenoside iruta indi

Ngirinshuti avuga amashyirahamwe y’Abanyarwanda n’inshuti zabo zirimo n’Abayahudi, basanze kuba u Bufaransa buhana abapfobya n’abahakana Jenoside yakorewe Abayahudi bukirengagiza iyakorewe Abatutsi bidakwiye, biyemeza kugana inkiko basaba ko iryo tegeko rivugururwa.

Ibi byose ariko byabaye nyuma y’uko u Bufaransa butoye itegeko ryemerera buri muturage gutanga itegeko mu gihe hari ingingo mu mategeko itajyanye [ingingo zihonyora] n’Itegeko Nshinga.

Ati “Twasabye ko urukiko rushinzwe kurinda Itegeko Nshinga rutesha agaciro iryo tegeko [ryababuzaga kurega] ariko ntabwo twabikoze ngo tuvuge ko Abayahudi gusa aribo barengerwa.”

“Twabikoranye n’imiryango y’Abayahudi yabonaga ko harimo ikibazo; nta Jenoside iruta indi no mu guharanira kurwanya ingengabitekerezo ya Jenoside iyo ariyo yose ntayo igomba kuruta indi.”

“Ubu ngubu hari icyemezo urukiko rushinzwe kurinda Itegeko Nshinga ry’Abafaransa rwafashe, cyo kuvuga ko iryo tegeko ryatubuzaga kujya kurega abapfobya n’abahakana Jenoside ritubahiriza itegeko nshinga. Rusaba Guverinoma ko itora irindi tegeko rishya rituma Jenoside iyo ariyo yose yemerwa n’Abafaransa cyangwa yaba yarashyiriweho urukiko mpuzamahanga cyane cyane ko zishyirwaho n’Akanama k’Umutekano ka Loni kandi Abafaransa bakarimo, ndetse barasinye n’umwanzuro ushyiraho urukiko ruhana ibyaha byakorewe Abatutsi mu Rwanda (TPIR). Ibi bivuze ko ari Jenoside yemerwa n’Abafaransa.”

Iryo tegeko rimaze gutorwa mu nteko ishinga amategeko imitwe yombi igisigaye ni uko Perezida arishyiraho umukono rigatangazwa hanyuma rikubahirizwa. Ngirinshuti yemeza ko iki gihe aribwo kurega no gukurikirana abapfobya n’abahakana Jenoside yakorewe Abatutsi bizatangira gukorwa.

Ati “Bitewe n’uko twinjiye mu bihe by’amatora turizera ko umwaka utaha urangira itegeko ryamaze gutangazwa tukaba twabasha kurega abahakana n’abapfobya Jenoside yakorewe Abatutsi.”

Jenoside mu nteganyanyigisho z’u Bufaransa

Ngirinshuti yatangaje ko muri iki cyumweru hari inama iyobowe na Minisitiri w’Uburezi mu Bufaransa yo kurebera hamwe uburyo mu mashuri bagiye kwigisha Jenoside yakorewe Abatutsi n’izindi Jenoside.

Avuga ko ari igikorwa cyiza cyane kitaturutse mu ijuru kuko cyaharaniwe bikomeye.

Yagize ati “Twarabiharaniye, tumaze imyaka, twaciye mu bashakashatsi mu bayobozi tubasaba ko Jenoside yakorewe Abatutsi ari kimwe mu bintu bikomeye kibi cyaranze ikinyejana cya 20. Ni ngombwa ko icyo kintu cyigishwa no mu Bufaransa kuko Jenoside ntabwo yakorewe Abatutsi gusa, ni icyaha gikorerwa inyokomuntu ni ukuvuga ko cyakorewe ikiremwamuntu aho kiva kikagera.”

Kwigisha Jenoside bizatuma abantu bamenya impamvu yabayeho bitume bitazongera kubaho yaba mu Rwanda n’ahandi mu bihugu bitandukanye.

U Bufaransa ni igihugu cyakunze kutemera uruhare bwagize muri Jenoside yakorewe Abatutsi ahanini bitewe n’uruhare bayigizemo, ibi bigatera impungenge ko amateka bashobora kwigisha ashobora kuba agoretse.

Ngirinshuti avuga ko bazakomeza gukurikirana iby’izo porogaramu zizigishwa kugira ngo amateka atazagorekwa.

Ati “Turashaka kumenya neza ko ibizigishwa muri iyo porogaramu ari iby’ukuri koko, ko ari amateka twemera, twemeranywaho kandi yakoranywe ubwitonzi n’imbaraga zose atari ukujya gushakisha kuri internet.”

Ibuka- France irateganya ubundi buryo bwo kugeza imbere y’ubucamanza abari abayobozi b’u Bufaransa n’abakiburimo, bifitiwe ibimenyetso ko bagize uruhare muri Jenoside.

Izi ntambwe zitezweho kugabanya ihakana n’ipfobya mu Bufaransa, nubwo ababikora ngo batagifite ingufu ugereranyije n’uko byari bimeze mu 2000 na 2001, ubwo bari bafite ingufu n’abayobozi mu nzego za Leta z’u Bufaransa bapfobya ku mugaragaro.

Ikibihamya ni uko ubu mu rwego rw’igihugu cy’u Bufaransa hemerwa ko habayeho Jenoside yakorewe Abatutsi, imanza ebyiri zimaze kuhaburanishirizwa, byiyongera ku ngendo za bamwe mu Bafaransa bifatanya n’Abanyarwanda mu kwibuka bigatuma basobanukirwa neza ubukana n’ubugome Jenoside yakoranywe.

Alain Ngirinshuti, Visi Perezida wa Ibuka- France

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved