Akanyamuneza ku bafite ubumuga bavanywe aho kujugunywa bakaba imbaraga z’igihugu

Yanditswe na Akayezu Jean de Dieu
Kuya 24 Kanama 2018 saa 11:18
Yasuwe :
0 0

Mbere ya Jenoside yakorewe Abatutsi, abantu bafite ubumuga bafatwaga nk’ishyano, igisebo n’umutwaro ku muryango, ku buryo hari n’imiryango yabajugunyaga cyangwa ikabahisha mu nzu.

Inzego za Leta ntizababonagamo umusanzu mu kubaka igihugu, keretse nk’Abihayimana cyangwa abagiraneza babapfaga agasoni bakabafasha, ariko nabyo ntibigere kuri buri wese.

Mu rugendo rw’iterambere ry’u Rwanda mu myaka 24 ishize, ubu akanyamuneza ni kose ku bantu bafite ubumuga ko gusubizwa uburenganzira n’agaciro bari barambuwe mu muryango no mu gihugu.

Ibarura rya 2012, ryagaragaje ko abamugariye ku rugamba, abafite ubumuga bw’uruhu, ubumuga bwo kutumva no kutabona, abafite ubumuga bw’ingingo, ubumuga bwo mu mutwe n’abandi bose hamwe bagera ku 446,000.

Ku ntangiriro Minisiteri y’Ubutegetsi bw’igihugu ifatanyije n’Inama y’Igihugu y’Abantu bafite ubumuga, NCPD, uyu mwaka abagera ku 154,000 mu byiciro bitanu bazajya bafashirizwamo.

Icyiciro cya Mbere cy’abafite ubumuga bukomeye kigizwe na 15.3%, icya Kabiri cy’abafite ubumuga bwo kubura nk’urugingo rumwe kirimo 15.7%, icya Gatatu cy’abafite ubumuga bworoheje kirimo 18.8%.

Mu cyiciro cya Kane kirimo abagera kuri 26.3%, naho icyiciro cya Gatanu cy’abafite ubumuga bworoheje bufatwa nk’inenge kirimo abangana na 24,1%.

Bafite kivuganira na kirengera

Mu kiganiro cyihariye na IGIHE, Umunyamabanga Nshingwabikorwa w’Inama y’Igihugu y’abantu bafite ubumuga mu Rwanda, Emmanuel Ndayisaba, yashimye uko ubuyobozi bwiza bwabasubije agaciro bakibona mu iterambere nk’abandi.

Hashyizweho amategeko abarengera. Kuwa 21 Mutarama 2007, hasohotse itegeko rirengera abantu bafite ubumuga muri rusange n’irindi rirengera by’umwihariko abari ingabo bamugariye ku rugamba.

Nyuma y’imyaka ine gusa hashyizweho Inama y’Igihugu y’abantu bafite ubumuga ngo igenzure ishyirwa mu bikorwa ry’uburenganzira bwabo, byose bigamije ko bagira uruhare mu kubaka igihugu.

Muri buri Kagari, Imirenge, Akarere n’Umujyi wa Kigali, habamo umuntu umwe uhagarariye abafite ubumuga mu Nama Njyanama ndetse buri rwego rukagira komite ibahagarariye.

Mu Nteko Ishinga Amategeko y’u Rwanda n’iy’Umuryango wa Afurika y’Iburasirazuba, bafite ubahagarariye ushinzwe kureba niba koko amategeko asohoka aba afite uburyo bubarengera.

Bafashwa kwiyubaka

Igenzura ryakozwe ryo gushyira mu byiciro abafite ubumuga, ryagaragaje ko 48% batize nta n’imirimo bagira.

Binyuze muri gahunda yo guhanga imirimo [NEP Kora Wigire], hashyizweho ingengo y’imari isigaye ishyirwa mu gutera ingabo mu bitugu abafite ubumuga. Umwaka ushize bahawe miliyoni 75 Frw, uyu hashyirwamo miliyoni 80 Frw.

Muri iyi gahunda abafite ubumuga bashyizwe mu bigo byigisha imyuga y’igihe gito, abasoje bagahabwa amafaranga yo kubasha kwihangira imirimo no kubona ibikoresho, binyuze mu kigega BDF.

Umuntu ku giti cye cyangwa Koperative bahabwa amafaranga 50% akaba ari impano ayandi akazayishyura. Abagera ku 1562 bamaze gufashwa muri ubu buryo.

Hari kandi miliyoni 60 Frw, zoherezwa mu turere aho buri karere gahabwa miliyoni ebyiri zo gufasha abafite ubumuga mu mibereho yabo ya buri munsi.

Hari ibikigoranye

Abantu bafite ubumuga bashyiriweho amashuri bitewe n’ubumuga bwabo, mu igenamigambi ry’igihugu batekerezwaho ndetse n’abikorera ntibakizuyaza kubaha imirimo.

Ndayisaba yabwiye IGIHE ko nubwo bimeze gutya hakiri ikibazo cy’abana batarajya mu mashuri bitewe n’aho batuye n’imiterere y’ubumuga bafite.

Indi mbogamizi ikomeye ni uko mu gihugu hose hari ivuriro rimwe rya Gatagara, ryemerera abafite ubumuga kwivuza bakoresheje mituweli, kandi nabwo ari kuri serivisi zose.

Ndayisaba avuga ko hakiri ikibazo cy’abafite ubumuga bagisabiriza ku mihanda, atari uko babuze ubufasha ahubwo ari ingeso.

Ati “Dushyiraho izo gahunda zose na leta ifite izindi zitandukanye, ariko ugasanga ntibaramenya ko kujya muri izo gahunda byabafasha, ahubwo akavuga ko yavutse abona abafite ubumuga basabiriza.”

Ubukangurambaga bwo guhugura abantu bagifite iyi myumvire burakomeje ndetse nibiba ngombwa hazakoreshwa itegeko rihana bamwe bazakomeza kwinangira.

Umunyamabanga Nshingwabikorwa wa NCPD, Ndayisaba, avuga ko abafite ubumuga ari imbaraga zubaka igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza