Akarere ka Nyarugenge kasibye umwenda wa miliyoni 20 Frw kari gafitiye koperative bigirwa ibanga

Yanditswe na Jean Pierre Tuyisenge
Kuya 13 Ukwakira 2017 saa 10:38
Yasuwe :
0 0

Abadepite bagize Komisiyo Ishinzwe Gukurikirana Imikoreshereze y’Imari n’Umutungo by’Igihugu mu Nteko Ishinga Amategeko (PAC) basabye ibisobanuro abayobozi b’Akarere ka Nyarugenge ku ideni rya miliyoni 20 z’amafaranga y’u Rwanda kari kabereyemo koperative Turwubakane kakaba kararisibye.

Ni ikibazo kigiye kumara imyaka 20, gishingiye ku kuba akarere karashatse kubimura mu kibanza cyabo kakaba karatinze kubishyura, gasobanura ko byatewe no kuba byangombwa bari bafite bibemerera gukora nka koperative, kabasaba kongera kwiyandikisha kugira ngo kabishyure.

Ubwo ku wa Mbere, iyo komisiyo yabazaga akarere ku micungire mibi y’umutungo nk’uko byagaragajwe na raporo y’Umugenzuzi Mukuru w’Imari ya Leta ya 2015/ 2016, Depite Nkusi Juvénal yabajije uburyo hagiye gushira imyaka hafi 20 baranze kwishyura iyo koperative kugeza ubwo bafashe icyemezo cyo gusiba umwenda.

Ati “Ariko nimutubwire, umwenda wari ushingiye kuki?Si ukwimura abantu? Ntimwashakaga kwimura icyitwa koperative Turwubakane? None niba abo bantu mwarabarenganyije hagashira imyaka ingana ityo mutabishyura ngo nibajye gushaka ibyemezo by’uko ari koperative none niyo ibaye intandaro yo kwanga kubishyura, imyaka ingana ityo, ubwo murumva muba mutarenganya abantu?”

Umuyobozi wungirije wa PAC, Depite Karenzi Théoneste, nawe yagize ati “ Ndagira ngo atubwire, uyu munsi nyuma y’imyaka ingana ityo ko agiye kubigarura mu bitabo by’ibaruramari azabyita gute?”

Yongeyeho ati “Gusiba umwenda uri mu bitabo by’ibaruramari yego nibyo birashoboka, ariko hagomba kuba inzira ituma bigera aho, ubundi cyakabaye kuba ari icyemezo gifatwa na njyanama.”

Ubuyobozi bw’Akarere ka Nyarugenge busobanura ko bwasibye uwo mwenda nyuma yo kubona ko iyo koperative itakiriho ndetse ko nta byangombwa ifite byo gukora nka koperative.

Perezida wa Komisiyo Ishinzwe Gukurikirana Imikoreshereze y’Imari n’Umutungo by’Igihugu mu Nteko Ishinga Amategeko, Nkusi Juvenal

Umuyobozi w’Akarere ka Nyarugenge, Kayisime Nzaramba yavuze ko batanze kuyishyura ahubwo icyo bagikeneye ari uko ibanza ikongera igashaka ibyangombwa biyemerera gukora nka koperative yarangiza igaca mu rubanza.

Yagize ati “ Nibyo koko twasabwe kuyishyura mu 2009 tugiye kuyishyura dusanga koperative itakiriho kuko yari yarasenyutse, habaho no kubandikira inshuro nyinshi kugira ngo tubabwire baze nka koperative, tuza gusanga n’ibyangombwa ntabyo bari bafite, noneho tugira ikibazo tuti ‘ese nitwishyura abantu bamwe abandi nabo bakaza bakatubwira ko nabo ari abanyamuryango ba Turwubakane ntibizarangira noneho tugeze mu manza?’ Ni icyo kibazo cyabaye cy’uko yari yarasenyutse, badafite n’icyangombwa, bituma tutabasha kubaha amafaranga yabo.”

Yongeyeho ati “Aho twari tugeze uyu munsi, twahamagaje bamwe tubabwira ko dukeneye ko baza tukabaha amafaranga, tubasaba ko bakongera bakiyandikisha nka koperative bagashaka ukuntu baca mu rubanza noneho abe ari rwo ruduha uburenganzira bubemerera ko ari koperative Turwubakane, tube dufite noneho icyemezo cy’urukiko kugira ngo tubashe kubishyura, ariko rwose ubushake burahari ahubwo ni uko twabuze uwo twishyura.”

Nzaramba avugako bemera amakosa bakoze akavuga ko mu ivugurura ry’ingengo y’imari ayo mafaranga azashyirwamo bakazayishyura.

Akarere ka Nyarugenge kanenzwe n’Umugenzuzi Mukuru w’Imari ya Leta kuba katarabashije kuzuza imisoro kari karemereye Ikigo cy’Igihugu cy’Imisoro n’amahoro (RRA), kuba hari amadeni katishyuye, amafaranga miliyoni 92 Frw yoherejwe mu itorero nyamara bikagaragara ko hakoreshjwe miliyoni 10 Frw gusa n’ibindi.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza