Akayabo katanzwe na Rujugiro mu mugambi wa Himbara wo gusebya u Rwanda

Yanditswe na IGIHE
Kuya 27 Nzeri 2017 saa 09:54
Yasuwe :
0 0

Umuherwe w’Umunyarwanda, Tribert Ayabatwa Rujugiro, abinyujije kuri Dr David Himbara, umwe mu batavuga rumwe n’ubutegetsi bw’u Rwanda, amaze igihe yishyura ibihumbi by’amadolari ikigo gikora ubuvugizi mu guhuza inzego zitandukanye muri Amerika, Podesta Group gikorera i Washington, D.C.

Nacyo nk’inyishyu cyahuje Himbara na bagenzi be bahunze igihugu batavuga rumwe n’ubutegetsi, n’umwe mu bagize Inteko Ishinga Amategeko ya Amerika, Christopher Smith, ukuriye agashami ka Komisiyo y’Ububanyi n’Amahanga, kibanda kuri Afurika yo munsi y’Ubutayu bwa Sahara.

Imibare yashyizwe ahagaragara nk’uko bisabwa n’itegeko rya Amerika, yerekana ko Himbara yatangiye gukorana na Podesta Group muri Nzeri 2014, muri uwo mwaka yishyura $120 000.

Mu 2015 yishyuye $140 000, mu 2016 yishyura $120 000, mu 2017 ho kugeza kugeza kuwa 20 Nyakanga yari amaze gutanga $60 000, yose hamwe akangana na $440 000, ni ukuvuga arenga miliyoni 372 Frw.

Bitewe n’ako kayabo yishyuye, Himbara yahawe abantu bo kumufasha mu mishyikirano barimo Rademaker Stephen na Moore Riley.

Komisiyo y’Inteko Ishinga Amategeko ya Amerika Ishinzwe Ububanyi n’Amahanga yemeje ko kuri uyu wa Gatatu nyuma ya saa sita aribwo agashami gakuriwe na Chris Smith gahura na Himbara aherekejwe n’uwahoze mu ngabo z’u Rwanda wahunze igihugu, Maj. Robert Higiro, bombi bumvikana mu majwi asebya ubutegetsi buriho.

Himbara arahura n’abadepite nk’umuhuzabikorwa wa “Democracy in Rwanda Now” muri Canada aho atuye, mu gihe Major Higiro we ari nk’umuhuzabikorwa w’iyo gahunda muri Leta Zunze Ubumwe za Amerika.

Higiro yirukanwe muri RDF mu myaka ishize kubera imyitwarire mibi ariko aza guhunga igihugu mbere y’uko ibibazo bye bibyutswa, ageze hanze yiyambika isura y’umunyapolitiki wahunze, atangira gusebya leta y’u Rwanda.

Mu mihuro yabanje nk’uwo kuwa 20 Gicurasi 2015, Himbara yasebeje leta yivuye inyuma, atakambira abadepite ngo boye gufunga Radio Ijwi rya Amerika ishami rya Afurika yo hagati nk’uko “byemejwe ko izafungwa bitarenze 2017.”

Yavuze ko VOA ivuga no mu Kinyarwanda, ikaba “aricyo gitangazamakuru cyonyine cyigenga kigeza ijwi ku banyarwanda” nyuma y’ifungwa rya BBC.

Icyo gihe yanashinje leta y’u Rwanda gushyigikira iterabwoba, avuga ko Amerika nk’igihugu gifite amategeko arwanya ko ibihugu bishyigikira bene ibyo bikorwa “komisiyo yareba uko ayo mategeko yakoreshwa kuri leta y’u Rwanda.”

Nk’uko umuyobozi w’agashami ka komisiyo kareba Afurika, Christopher Smith yabitangaje, kuri uyu wa Gatatu ngo baraganira ku “hazaza ha demokarasi mu Rwanda no kugendera ku mategeko mu Rwanda, bijyanye n’ukunengwa gukomeje kuri guverinoma, mu gihugu no ku rwego mpuzamahanga.”

Rujugiro usigaye atavuga rumwe n’ubutegetsi bw’u Rwanda, ni umushoramari wabaga mu gihugu kugeza mu 2008, ubwo yafatirwaga mu Bwongereza ku birego byo kunyereza imisoro. Yashakishwaga muri Afurika y’Epfo ku bibazo nk’ibyo ku ruganda rwe rukora itabi. Nyuma yarekuwe yemeye gutanga miliyoni $7.1 ku kigo cy’imisoro mu Bwongereza.

Ibibazo by’imisoro byaje no kumukurikirana mu Rwanda, kugeza ubwo kuri uyu wa Mbere, Ikigo Gishinzwe Imisoro n’Amahoro cyagurishije mu cyamunara umuturirwe we UTC, ugurwa n’abashoramari ba Kigali Investment Company.

Himbara ntibiratangazwa ku mugaragaro niba asigaye ari umwe mu bagize ishyaka rikorera mu buhungiro Rwanda National Congress, ariko mu idosiye ikurikiranywemo umuryango wa Rwigara ku byaha byo kugambirira kugirira nabi ubutegetsi buriho, bagenda bamugarukaho.

Ni mu biganiro by’amajwi bikomeje gukwirakwira muri iyi minsi, bihamya ko Himbara ashobora kuba agira uruhare umunsi ku munsi mu bikorwa bya RNC, iyobowe na Kayumba Nyamwasa wigeze kuba umugaba w’Ingabo.

Aya mafaranga atangwa hagamijwe gusiga icyasha isura ry'u Rwanda
Himbara amaze kwishyura miliyoni zigera kuri 370 Frw yahawe na Rujugiro kugira ngo abone uko ahura n’abadepite ba Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza