Imbaraga za REG zatumye itagisaranganya Abanyarwanda amashanyarazi

Yanditswe na IGIHE, Uwishyaka Jean Louis
Kuya 9 Mutarama 2017 saa 01:43
43 29

Ubuyobozi bw’Ikigo cy’Igihugu gishinzwe ingufu, REG, bwatangaje ko umwaka ushize iki kigo cyageze kuri byinshi mu kugeza umuriro w’amashanyarazi ku Banyarwanda, birimo kuba kuri ubu kitagisaranganya abaturage umuriro w’amashanyarazi bitewe n’ibikorwa cyakoze bigamije kuwongera.

REG yavuze ko kuri ubu ifite amashanyarazi akenewe ku buryo nta saranganya rikibaho mu gutanga umuriro.

Uretse ibyo kandi REG isobanura ko Uruganda rwa Gishoma rwatangiye gutanga amashanyarazi nyuma y’igihe kirerekire rutegerejwe, ako kuri ubu rutanga amashanyarazi arenga 15 MW zari mu nyigo. Ubu kandi hari inganda zishobora gutanga amashanyarazi angana na 208MW nyuma yaho ingomero za Gishoma na Giciye II zuzuriye.

REG yafunguye amashami muri buri karere, aho mu Mujyi wa Kigali habarizwa amashami atandatu. Ibyakozwe mu rwego rwo kunoza imikorere no gutanga serivise nziza ku babagana. Hafunguwe kandi amashami atanu manini (HUBS) akorera muri buri ntara, aho ishami rifite ubushobozi bwo gutanga ubufasha bwihuse mu buryo bwa tekiniki.

Umuyoboro ukura amashanyarazi kuri Rukarara uyageza ku miyoboro migari waruzuye, aho witezweho kuzafasha kongera ubushobozi bwo kugeza amashanyarazi mu bice bya Huye, Nyamagabe na Nyaruguru bikagabanya ibura rya hato na hato ry’umuriro ryahagaragaraga. Umuyoboro mugari uhuza Ntendezi na Bugarama nawo waruzuye. Uyu muyoboro ukaba ufasha iki kigo gushyira uruganda rwa CIMERWA ku miyoboro migari. Ikindi uzanafasha kugeza amashanyarazi ava Gishoma ku miyoboro migari y’igihugu.

Kubaka umuyoboro mugari uhuza Jabana – Mont Kigali – Gahanga n’ahatunganyirizwa amashanyarazi Gasogi, Gahanga, Mont Kigali, byose byaratangiye mu rwego rwo kongera ubushobozi bwo gutanga amashanyarazi muri Kigali. Imishinga yo gusana imiyoboro igeza amashanyarazi ku bafatabuguzi muri Kigali na yo yaratangiye. Izo ngamba zose zavuzwe haruguru zitezweho gufasha kugabanya icikagurika ry’amashanyarazi ryajyaga ribaho.

REG kandi yatangiye umushinga munini w’ikoranabuhanga rifasha mu guhuza ibikorwa bikorerwa mu mashami atandukanye y’ikigo – IBMS HUZA. Ibi bizafasha kugira amakuru ya buri mukiriya bityo byihutishe ubufasha mu gihe bazaba babukeneye.

Kugeza ubu mu Rwanda habarirwa abafatabuguzi b’amashanyarazi bangana n’ibihumbi 600.

Ibiciro bishya by’amashanyarazi byazanye igabanyuka kuri bamwe

Kuva ku wa 1 Mutarama 2017, abafatabuguzi b’umuriro w’amashanyarazi mu Rwanda batangiye kuwugura ku biciro bishya. Ibi biciro byaragabanyijwe kuri bamwe hagendewe ku ngano y’amashanyarazi bakoresha.

Igabanuka ry’ibiciro by’amashanyarazi, rigaragara ku bagura amashanyarazi yo mu ngo guhera kuri kilowati 1-15, aho bazajya bawugurishwa ku mafaranga 89, avuye kuri 182, bakaba bagabanyirijwe ku kigero cya 51%.

Abagura umuriro kuva kuri kwh 15 kugeza kuri 50, bo ikiguzi nticyahindutse, bazakomeza kujya bishyura amafaranga y’u Rwanda 182 kuri kwh imwe, naho abakoresha guhera kuri kwh 50 kuzamura bazajya bawugura ku 189 kuri kwh imwe.

Amazu y’ubucuruzi n’ibigo bya leta bigura amashanyarazi kuva kuri kilowati 0 kugeza ku 100, bizajya bigurishwa ku mafaranga 189 kuri kwh, naho kuva 100 kuzamura bawugure ku 192.

Inganda nini na zo zagabanyirijwe igiciro kugera ku mafaranga 83 kuri kilowati na 90 ku ziciriritse avuye ku 126 kuri kwh. Iryo gabanuka rikaba riri hagati ya 28% na 34%.

Gusa REG yibutsa abafatabuguzi b’umuriro w’amashanyarazi ko ibi biciro bitarimo umusoro ku nyongera gaciro (TVA) ungana na 18%.

Ibyashingiweho hashyirwaho ibiciro bishya by’amashanyarazi
Ibiciro bishya by’amashanyarazi byashyizweho hagamijwe gufasha no korohereza ishoramari, inganda nini zihabwa ibiciro byegereye n’ibyo mu karere. Hari hagamijwe kandi gufasha abaturage kugura umuriro hakurikijwe ubushobozi bwabo no gufasha ikigo kugera ku nshingano zacyo.

REG yavugutiye umuti ibibazo byari mu kugura umuriro

Nyuma yo gutangiza ibiciro bishya by’amashanyarazi byemejwe na RURA tariki ya 13 Ukuboza 2016 nkuko byari biteganijwe ku wa 1 Mutarama, ikoranabuhanga ryifashishwa mu gucuruza umuriro ryatangiye gukora rihagarara hato na hato uhereye saa tatu za mu gitondo ku itariki ya 1 Mutarama 2017. Ibi byatumye abafatabuguzi badashobora kugura umuriro hakoreshejwe uburyo bwari busanzwe, nka MTN mobile Money, Tigo cash, Airtel money, ku buryo imirongo yagiye yiyongera ahandi hacururizwa umuriro.

Nyuma yo kubona ibyo bibazo, REG yihutiye gushaka igisubizo cy’ibyo bibazo. Ibyo bikaba byaragezweho mu masaha y’igitondo (saa munani z’ijoro) ku wa 05 Mutarama 2017. Iki kigo kivuga ko ubu abafatabuguzi bashobora kugura umuriro hakoreshejwe uburyo bwari busanzwe, nka MTN mobile Money, Tigo cash, Airtel money, mobile Banking, n’ahandi bacuruza umuriro bifashishije mudasobwa.

REG ivuga ko ifite amashanyarazi ahagije ku buryo bitakiri ngombwa gusaranganya umuriro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE