Amabwiriza akomeye mu ikoreshwa rya Drone mu Rwanda: Miliyoni y’amadolari y’ubwishingizi

Yanditswe na Philbert Girinema
Kuya 1 Kamena 2016 saa 01:04
Yasuwe :
0 0

Indege za gisivili zitagira abapilote cyangwa ‘‘drone’’ ni bumwe mu buryo bushya bugiye kujya bwifashishwa mu gukwirakwiza amaraso ahabwa indembe n’imiti; ndetse mu bihugu byateye imbere wishyura igicuruzwa kikagezwa iwawe mu gihe gito gishoboka hifashishijwe izi ndege.

Umuryango Mpuzamahanga Ushinzwe Ubwikorezi bukoresha ikirere, IATA, uheruka gusaba ko habaho igenzurwa ryihariye ry’indege zitagira abapilote ku Isi, kuko hari aho bikomeje kugaragara ko ziteza ibibazo by’umutekano birimo no kubangamira imikorere y’indege zisanzwe.

N’ubwo ubu buryo bw’ubwikorezi butaratangira gukoreshwa mu gihugu, umugereka w’amabwiriza ya Minisitiri yo ku wa 26 Mata 2016 arebana n’iby’indege za gisiviri zitagira abapilote, ugagaragaza amategeko agenga izi ndege zizakorera mu Rwanda zikazajya zikorera ibilo bitarenze 25 kandi zikaguruka mu kirere uziyoboye abasha kuzireba.

Biteganywa ko zizifashishwa mu bikorwa birimo gufotora, gukurikirana ibihingwa mu murima, gushakisha cyangwa ubutabazi, ubwikorezi bwihuse, ubushakashatsi, uburezi no kwishimisha.

Ayo mabwiriza avuga ko izi ndege zitemerewe gukorera mu Rwanda mu gihe zitandikishijwe mu kigo gishinzwe iby’indege za gisivili, kandi nyirayo agahabwa icyemezo gishingiye kuri aya mabwiriza nyuma yo kwishyura 110 000Frw.

Hari aho agira ati “Urwego rubishinzwe ruha icyemezo umuntu wese wujuje ibisabwa nyuma yo gukuraho impungenge z’umutekano, bikozwe n’inzego z’umutekano zibifitiye ubushobozi.”

“Hasuzumwa niba izo ndege zidashobora guteza impungenge ku mutekano harebwa mu makuru y’inzego nka Interpol, inzego mpuzamahanga n’ahandi.”“

Akomeza avuga ko iyo izo nzego zibimutahuyeho [guhungabanya umutekano], uwasabye uburenganzira ntabuhabwa n’uwabuhawe arabwamburwa.

Inzego zishinzwe umutekano kandi zizajya zicukumbura mu buryo ngenzabyaha buri mezi 24, mu bantu bose bafite aho bahuriye n’izi ndege.

Aya mabwiriza kandi ateganya ko umuntu uzifite abimenyesha ubuyobozi bw’aho atuye, polisi n’abaturage b’aho mbere yo gutangira igikorwa, kandi abazikoresha bahabwa amahugurwa mu bijyanye n’umutekano hakirindwa ko izifata amashusho zabangamira umudendezo w’abandi bantu.

Ikigo gishinzwe Indege za Gisivile gisaba bitarenze amasaha 24, kukimenyesha niba utu tudege twakomerekeje umuntu cyangwa hari indi mitungo twangije, kandi tugomba gukora gusa mu masaha ari hagati ya mu gitondo izuba rirashe kugeza rirenze.

Aya mabwiriza ategeka ko uyobora ‘drone’ ayihozaho amaso ku butumburuke, uburyo igenda n’icyerekezo ifite n’aho iherereye, kandi akagenzura ko itagira ibyo yangiza cyangwa ngo igongane n’indi. Umuyobozi wayo ntiyemerewe kuyobora izirenze imwe icya rimwe.

Aya mabwiriza ateganya ko zitagomba kuguruka mu kirere kirinzwe uyiyoboye atabifitiye uburenganzira. Akomeza agira ati “Umuvuduko wa drone ntugomba kurenza km 160 ku isaha, kandi ntizigomba kurenga metero 100 hagati y’ikirere n’ubutaka.”

Umuntu wese utwara akadege katagira umupilote asabwa gutanga ubwishingizi butari munsi ya miliyoni imwe y’amadolari yo kwirengera ingaruka zishobora guterwa n’imikorere y’iyi ndege.

Aya mabwiriza agena ko “nta muntu ugomba kuyobora utu tudege azi ko afite ikibazo mu miterere y’umubiri cyangwa mu mikorere y’ubwonko, gishobora kubangamira imikorere isesuye ya zo.”

Ikindi inzego zibishinzwe zibuza umuntu kuyobora Drone yanyoye inzoga cyangwa ikindi kiyobyabwenge, abasaba kuziyobora bagasabwa kuba bafite imyaka 18, gutsinda ikizamini cy’ubumenyi bw’ikirere, kwishyura 50 000 Frw kandi ubwo burenganzira bukamara amezi 24.

Umuntu wese unanirwa kubahiriza ibiteganywa n’aya mabwiriza acibwa amande atarenze 20 000 000 Frw.

Izi ndege zizajya zifashishwa mu bikorwa byo gutwara amaraso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza