Kwamamaza

Amagambo asesereza ntacyo amaze - Guverineri Uwamariya

Yanditswe kuya 14-04-2013 saa 10:22' na Marie Chantal Nyirabera
     


Guverineri w’Intara y’Iburasirazuba Uwamariya Odette arasaba uruhare rwa buri wese mu bikorwa byo kwibuka Jenoside yakorewe Abatutsi mu Rwanda, ndetse no mu bindi bihe by’ubuzima, kugira ngo abarokotse na bo babashe kwigira nk’uko insanganyamatsiko y’uyu mwaka ibivuga.
Uwamariya yabisabye nyuma y’umuhango wo gushyingura imibiri 73 y’inzirakarengane zazize Jenoside yakorewe Abatutsi mu Rwanda, wabaye ku wa 12 Mata 2013 mu rwibutso rwa Mukarange, mu karere ka Kayonza.
Yagize ati “Ntihakagire (...)

Guverineri w’Intara y’Iburasirazuba Uwamariya Odette arasaba uruhare rwa buri wese mu bikorwa byo kwibuka Jenoside yakorewe Abatutsi mu Rwanda, ndetse no mu bindi bihe by’ubuzima, kugira ngo abarokotse na bo babashe kwigira nk’uko insanganyamatsiko y’uyu mwaka ibivuga.

Uwamariya yabisabye nyuma y’umuhango wo gushyingura imibiri 73 y’inzirakarengane zazize Jenoside yakorewe Abatutsi mu Rwanda, wabaye ku wa 12 Mata 2013 mu rwibutso rwa Mukarange, mu karere ka Kayonza.

Yagize ati “Ntihakagire umuntu uta umwanya we avuga amagambo akomeretse cyangwa asesereza abarokotse Jenoside yakorewe Abatutsi, kuko ubivuga aba ahembera ubugome n’inzangano kandi ntacyo bimaze.”

Yakomeje agira ati “Aho kuganisha ubwenge Imana yaduhaye mu kibi, dutekereze ku gushyira hamwe mu byiza, kuko yaturemye ifite umugambi kandi nta muntu yahaye uburenganzira bwo kuvutsa ubuzima mugenzi we.”

Guverineri yongeyeho ko ubuyobozi buzakomeza kwigisha Abanyarwanda kugira ngo ingengabitekerezo ya Jenoside iranduke burundu, kandi uwo igaragayeho agahanwa, mu rwego rwo guca umuco wo kudahana no kwirinda ko byaba akamenyero.

Guverineri w’intara y’Iburasirazuba yasabye umuntu waba azi ahantu hakiri imibiri y’abazize Jenoside yakorewe Abatutsi itarashyingurwa mu cyubahiro, ko akwiye kugira ubutwari bwo kuhavuga.

Yakomeje avuga ko, ibi bikorwa byo kwibuka bikwiye kujya bigaragaramo urubyiruko, kugira ngo rumenye ibyabaye n’ibyo bagenzi babo bakoze, bityo bigire ku mateka baharanire ko Jenoside itazongera kubaho.

Mugabo John Umuyobozi w’Akarere ka Kayonza, yatangaje ko harimo guterwa intambwe nziza mu kurwanya ingengabitekerezo ya Jenoside, kuko ubu yagabanutse ugereranyije n’imyaka ishize. Ati “N’ubwo hari ababa bakiyifite mu mutima batabigaragaza inyuma, turashimira abaturage ko bamaze kumva ko ari ibyo gukumirwa, kuko n’ushatse kuyigaragaza, bagira uruhare mu kumukosora no kumugarura mu nzira nziza.”

Mu buhamya bwatanzwe, indirimbo zitandukanye, umuvugo, ndetse n’abandi bose bafashe ijambo, bagarutse ku nsanganyamatsiko y’uyu mwaka igira iti “Twibuke Jenoside yakorewe Abatutsi, duharanira kwigira.” Basabye abarokotse kwigirira icyizere bagaharanira kwigira kuko ariko kwihesha agaciro.

Urwibutso rwa Mukarange hari hashyinguyemo imibiri y’abazize Jenoside yakorewe Abatutsi 8.700, hashyinguwe iyindi mibiri y’abasaga 73 yakuwe mu mirenge itandukanye igize Akarere ka Kayonza.

IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Mercredi 5 Février 2014 Saa 17:33:27
Copyright © 2009 -2014 - IGIHE Ltd - All Rights Reserved