Amajyaruguru: Abamotari baruhutse ibihombo baterwaga no gutuma impushya zo gutwara abagenzi

Yanditswe na N.Kubwimana Janvière
Kuya 14 Gicurasi 2019 saa 09:58
Yasuwe :
0 0

Abatwara abagenzi kuri moto bo mu Ntara y’Amajyaruguru, bavuga ko baruhutse ibihombo baterwaga no gutuma i Kigali impushya zibemerera gutwara abagenzi, babinyujije mu makoperative bakoreramo.

Kuri uyu wa Kabiri nibwo Urwego Ngenzuramikorere, RURA, rwegereje abatuye Akarere ka Musanze serivisi zo guhabwa impushya zo gutwara abagenzi, banabakangurira gukoresha ikoranabuhanga mu kazi bakora.

Bamwe muri aba bamotari bavuga ko bajyaga batuma impushya zabo binyuze mu makoperative, amaso agahera mu kirere harimo no kudasubizwa amafaranga batanze.

Dusengemungu Anaclet yagize ati "Hari ubwo wasabaga uruhushya rwo gutwara, ugatanga ibihumbi 18 Frw na 4500 Frw bya tike ya kontabure uzajya kuyituzanira, yose ukayashyira kuri konti ya koperative, umwaka ugashira itaraza cyangwa ikaza ibura nk’amezi atatu ngo irangire.”

“Ugasanga urahombye n’ayo watanze akaba apfuye ubusa, tugakora nk΄inyeshyamba ducengana n’abapolisi no gucibwa amande birimo, ariko ubwo umuntu ariwe uzajya ayifatira ibi bihombo ntituzongera guhura nabyo."

Undi yagize ati “Wasangaga rimwe na rimwe dukora dukwepana n΄abapolisi kubera ko nta byangombwa twagiraga, kandi ukaba uryamanye gitansi wishyuriyeho ayo mafaranga ariko ntube wayibereka ngo bayemere, umwaka ugashira undi ukaza dukora gutyo.”

“Ariko ubu babyoroheje umuntu araza bagahita bayimwihera byoroshye cyane, bigiye gutuma nta rwitwazo buri wese atunga ibyangombwa, akore mu mutekano."
Umuyobozi ushinzwe igenamigambi mu gutwara abantu n’ibintu muri RURA, Deo Muvunyi, avuga ko iki gikorwa kigamije kwegereza srivise abatwara abagenzi kuri moto no kubakangurira gukoresha ikoranabuhanga mu kazi kabo.

Yagize "Iki gikorwa cyo gutanga impushya ku batwara abagenzi kuri moto kigamije kubegereza serivise kugira ngo bareke gukora bacengana n’abapolisi, ikindi ni ukubakangurira gukoresha ikoranabuhanga mu kazi kabo ka buri munsi harimo no gushyirishamo za mubazi, ibi bikorwa by΄ikoranabuhanga na byo bigamije guca burundu ibyangombwa by΄impapuro tukajyana n΄ikoranabuhanga."

Ibikorwa byo gutanga impushya zo gutwara abagenzi kuri moto mu Ntara y΄Amajyaruguru byatangiye kuri uyu wa Mbere, bikazasozwa ku wa 16 Gicurasi 2019.

Abamotari bishimiye ko begerejwe serivisi z'impushya zo gutwara abagenzi
Umuyobozi ushinzwe igenamigambi mu gutwara abantu n'ibintu, Deo Muvunyi, yibukije abamotari gukangukira gukoresha ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza