Amajyepfo: Impanuka zo mu muhanda zahitanye abantu 35 mu mezi atatu

Yanditswe na Prudence Kwizera
Kuya 13 Gicurasi 2019 saa 01:40
Yasuwe :
0 0

Polisi y’Igihugu yatangaje ko mu mezi atatu ya Gashyantare, Werurwe na Mata 2019 mu Ntara y’Amajyepfo habaye impanuka zo mu muhanda 203 zihitana abantu 35, abarenga 200 barakomereka.

Byatangarijwe mu Karere ka Huye kuri uyu wa Mbere, tariki ya 13 Gicurasi 2019 ubwo hatangizwaga ubukangurambaga bw’ibyumweru 52 bwiswe ‘Gerayo Amahoro’ bwo kwirinda impanuka ku bantu bose bakoresha umuhanda.

Umuyobozi wa Polisi mu Ntara y’Amajyepfo, ACP Kajeguhakwa Claude, yavuze ko ibikorwa by’ubukangurambaga bakora byatumye impanuka zigabanuka.

Yagize ati “Ubwo twakoreshaga icyumweru cy’ubukangurambaga byagaragaye ko mu gihugu hose impanuka zagabanutse ku kigero kiri hagati ya 30 na 40% ndetse no mu Ntara yacu (Amajyepfo) na ho ni uko ariko ntibihagije kuko dufite abantu 35 bapfuye mu mezi atatu, 203 barakomereka.”

Bamwe mu batwara ibinyabiziga mu Karere ka Huye bavuze ko bishimiye ubwo bukangurambaga kuko bubibutsa kubahiriza inshingano.

Nsengiyumva Romald utwara moto yagize ati “Nkanjye w’umumotari ubimazemo iminsi, mbona hari amakosa dukora; hari ukuntu dukunda amafaranga cyane tukica umutekano nko kwambukiranya umuhanda duhubutse tutarebye hirya no hino, kwihuta cyane n’umuvuduko mwinshi.”

Bamwe mu bagenzi bagaraje ko ubwo bukangurambaga buje bukenewe kuko hari amakosa na bo bakora kubera kudasobanukirwa.

Muri yo harimo kugenda mu modoka batambaye umukandara, kwambuka umuhanda barangaye cyangwa ugasanga hari n’abagenda mu muhanda bambaye utwumvisho (écouteurs) mu matwi biyumvira umuziki cyangwa bakoresha imbuga nkoranyambaga.

Guverineri w’Intara y’Amajyepfo, CG Gasana Emmanuel, yavuze ko impanuka zo mu muhanda zitwara abantu ubuzima abandi zikabamugaza ndetse n’ibikorwa remezo bikangirika, asaba ko zikumirwa.

Yakomeje ati “Ibi biraba mu gihe duhangayikishijwe cyane n’abantu babura ubuzima kubera impanuka zibera mu muhanda; abandi bakamugara n’ibikorwa remezo bikangirika. Birababaje ko mu mwaka ushize hapfuye Abanyarwanda barenga 400 kubera impanuka zo mu muhanda.”

CG Gasana yavuze ko gukumira impanuka zo mu muhanda bireba buri wese uwukoresha yaba utwara ikinyabiziga cyangwa umugenzi ugenda n’amaguru.

Muri Gare Mpuzamahanga ya Huye ahatangirijwe ubwo bukangurambaga; imibare yerekana ko ku munsi ibinyabiziga birimo imodoka, moto n’amagare bihatwara abagenzi barenga ibihumbi 30.

Abayobozi batandukanye mu gikorwa cyo gutangiza ubukangurambaga bugamije gukumira impanuka zo mu muhanda
Guverineri w’Intara y’Amajyepfo, CG Gasana Emmanuel, yasabye ko buri wese agira uruhare mu gukumira impanuka zo mu muhanda
Ku munsi ibinyabiziga birimo imodoka, moto n’amagare bitwara abagenzi barenga ibihumbi 30 muri Gare ya Huye
Mu Karere ka Huye muri Gare ya Huye ni ho hatangirijwe ubukangurambaga bw'ibyumweru 52 bugamije gukumira impanuka zo mu muhanda
Umuvugizi wa Polisi mu Ntara y'Amajyepfo, CIP Bonaventure Karekezi aganira n'abatwara ibinyabiziga n'ababikoresha muri Gare ya Huye
Umuyobozi w'Akarere ka Huye, Sebutege Ange, atanga ubutumwa
Umuyobozi w'Urugaga rw'Abikorera mu Ntara y'Amajyepfo, Bigirimana Bosco, mu bukangurambaga bwo gukumira impanuka zo mu muhanda
Abatwara ibinyabiziga muri Gare ya Huye n'abagenzi bahawe ubutumwa bwo gukumira impanuka no kuzirinda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza