Amajyepfo: Uturere twashyize ingufu mu mushinga wa hoteli Perezida Kagame yatanzemo miliyoni 10 Frw

Yanditswe na Evariste Nsengimana
Kuya 12 Gicurasi 2019 saa 08:20
Yasuwe :
0 0

Ubuyobozi bw’Intara y’Amajyepfo n’abafatanyabikorwa bayo biyemeje kubyutsa umushinga wo kubaka hoteli igezweho ihuriweho n’Uturere twa Ruhango, Muhanga na Kamonyi izatwara miliyoni $10 (hafi miliyari 9Frw).

Mu 2002 nibwo abikorera bo mu Turere twa Muhanga, Ruhango na Kamonyi, bagejeje kuri Perezida Kagame umushinga wo kubaka hoteli. Icyo gihe Gitarama nta hoteli n’imwe yari bwahubakwe, ndetse igitekerezo cyabo Perezida Kagame yahise agishyigikira abaha miliyoni 10Frw, biyemeza kuyaheraho bakayubaka.

Umuyobozi w’Akarere ka Muhanga, Uwamariya Béatrice, yabwiye IGIHE ko amwe muri ayo mafaranga yaguzweho ikibanza kingana ha 2.4 ariko kucyubaka bidindizwa no guhindura inzego z’imiyoborere.

Ati “Ni umushinga umaze igihe wagiye ugira ibibazo by’uko habayeho gushyira abayobozi bashya mu myanya y’uturere, abari batangiye uwo mushinga bari muri Perefegitura ya Gitarama bagenda bajya mu Turere dutandukanye bituma bikerererwa.”

Kuri uyu wa 11 Gicurasi 2019, abafatanyabikorwa mu iterambere ry’utwo Turere, abayobozi batwo na Guverineri w’Intara y’Amajyepfo bagiranye ibiganiro bigamije kubyura umushinga wo kubaka iyo hoteli.

Uwamariya yavuze ko bumvikanye ko imirimo yo kuyubaka yihutishwa, ikazaba ari hoteli igezweho y’inyenyeri enye, ifite ibyumba nibura 250 bigezweho.

Ati “Uyu munsi rero tukaba twateranye ngo twongere tubyutse uwo mushinga. Hagiyeho akanama ngishwanama karimo abafaranyabikorwa n’ubuyobozi bw’Uturere dutatu ngo bafatikanye uko icyo gikorwa cyakorwa.”

Ikibanza kizubakwamo iyi hoteli kingana na ha 17 cyaguzwe miliyoni 300Frw mu Karere ka Muhanga, Umurenge wa Shyogwe.

Nyuma y’ibyumweru bibiri bazongera bahure bareba aho ibyo bemeranyije bigeze, birimo igihe hoteli izatangira kubakirwa, abazayubaka n’igihe izamara.

Uwamariya yavuze ko ari umushinga w’abikorera bafatanyijemo n’Uturere.

Akarere ka Muhanga kazubakwamo iyo hoteli ni kamwe mu dufite imijyi yunganira Kigali. Gafite hoteli ebyiri z’inyenyeri eshatu, ibintu umuyobozi wako avuga ko ari ikibazo.

Ati “Tubona abantu benshi ariko tukagira ikibazo cy’uko ntaho barara. Ni ukuvuga ngo dukeneye hoteli zo ku rwego mpuzamahanga zakwakira inama ariko zifite n’ibyumba byinshi kandi bigezweho ku buryo uwaza wese atabona atandukaniro na Kigali.”

Akarere ka Muhanga gafite imishinga migari yo guteza imbere umujyi wako irimo gutunganya imihanda ya Kaburimbo ireshya na kilometero eshanu, n’indi ya 6km izatangira kubakwa muri Nyakanga, gutunganya icyanya cy’inganda kuri ubu kirimo agakiriro n’ibindi.

Abayobozi batandukanye ubwo mu 2016 basuraga ikibanza kizubakwamo iyi hoteli

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza