Amanota y’abatsinze ibizamini bisoza amashuri abanza n’icyiciro rusange agiye gutangazwa

Yanditswe na Rabbi Malo Umucunguzi
Kuya 8 Mutarama 2017 saa 10:48
43 29

Minisiteri y’Uburezi yatangaje ko kuri uyu wa Mbere izashyira ahagaragara amanota y’abakoze ibizamini bisoza amashuri abanza n’icyiciro rusange mu mwaka wa 2016, hakazamenyekana umubare w’abemerewe gukomeza mu mashuri yisumbuye no mu mashami atandukanye yigishwa mu Rwanda.

Minisiteri y’Uburezi vuga ko “amanota asoza amashuri abanza n’icyiciro rusange 2016, azashyirwa ahagaragara kuwa Mbere, tariki 9/1/2017, saa yine mu cyumba cy’inama cya Minisiteri y’Uburezi ku Kacyiru.”

Umubare w’abakoze ikizamini cya leta mu mwaka ushize warazamutse haba mu mashuri abanza n’icyiciro rusange, ugereranyije n’abakoze mu 2015.

Mu mashuri abanza, abanyeshuri bakoze ibizamini bya Leta mu 2015 bari 168 290, mu 2016 baba 194 679. Biyongereyeho 26 389 bingana na 16%, abakobwa biyongera kuri 13% na ho abahungu biyongera ku kigero cya 19%.

Mu cyiciro rusange ho abakoze ikizamini cya Leta mu 2015 bari 83 676, mu mwaka ushize wa 2016 bariyongera bagera ku 91 492. Biyongereyeho 5116 bangana na 6%, barimo abakobwa bangana na 10% na ho abahungu ni 1%.

Gusa iyi mibare yagabanutse urebye ku bakoze ikizamini gisoza amashuri yisumbuye, kuko mu 2015 hakoze 42 687, mu 2016 haboneka 41 719 bakoze ibizamini bya leta. Ni ukuvuga ko bagabanutseho 968 bangana na 2.3%, barimo abahungu 2.8% n’abakobwa bagera kuri 1.5%.

Biteganyijwe ko igihembwe cya mbere cy’umwaka w’amashuri wa 2017 kizatangira kuwa 23 Mutarama kikazarangira kuwa 31 Werurwe, kikazamara ibyumweru 10.

Igihembwe cya kabiri kizatangira kuwa 17 Mata 2017 kirangire kuwa 29 Nyakanga 2017 mu gihe kingana n’ibyumweru 15, na ho icya gatatu gitangire kuwa 14 Kanama 2017 kirangire kuwa 18 Ugushyingo 2017, kikazamara ibyumweru 14.

Niba nta gihindutse, ibizamini bya leta ku bazasoza amashuri abanza mu 2017 bizaba hagati ya tariki 15-17 Ugushyingo 2017, na ho ku basoza icyiciro rusange n’amashuri yisumbuye bikorwe hagati ya tariki 20 Ugushyingo n’iya 01 Ukuboza 2017.

Ubwo Mineduc yatangazaga amanota y'ibizamini bya Leta bisoza amashuri yisumbuye n'icyiciro rusange mu 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE