Amashyamba ya leta yatangiye kwegurirwa abikorera

Yanditswe na Evariste Nsengimana
Kuya 5 Kamena 2019 saa 11:43
Yasuwe :
0 0

Guverinoma y’u Rwanda yatangiye ibikorwa byo kwegurira abikorera amashyamba ya Leta mu rwego rwo kunoza imicungire n’imikoreshereze yayo no kongera umusaruro uyakomokaho.

Umuyobozi Mukuru w’Ikigo gishinzwe amazi n’amashyamba (RWFA), Prime Ngabonziza, yabwiye The New Times ko kwegurira abikorera amashyamba ya Leta bigamije kuyacunga neza, kuyabyaza umusaruro no kuyasazura.

Ati “Twatangiye kwegurira abakorera amashyamba ya Leta, igenzura twakoze ryagaragaje ko amashyamba ashobora gucungwa neza mu gihe yeguriwe abikorera.”

Ngabonziza yavuze ko kugeza uyu munsi 20% by’amashyamba ya Leta yamaze kwegurirwa abikorera.

Ati “Twasinyanye amasezerano n’ibigo by’abikorera ateganya uburyo bwo kuyacunga no kuyabyaza umusaruro, bayakoresha mu bikorwa byabo bitandukanye. Ariko bafite n’inshingano zo gutera ibindi biti mu rwego rwo kwirinda ko atemwa agashira.”

Bimwe muri ibyo bigo by’abikorera bimaze gusinyana amasezerano na Guverinoma harimo Inganda z’icyayi, ibigo bikora imirimo yo gusatura no gutunganya imbaho birimo icyitwa New Forest Company, gikorera muri Afurika y’Iburasirazuba.

Harimo kandi ikigo kitwa Sawmill East Africa cyo muri Lithuania gikora ibikorwa byo gusatura imbaho zifashishwa n’ibigo by’ubwubatsi n’ububaji.

Ngabonziza yavuze ko bari gushakisha n’abandi bashoramari bagaragaje ko bifuza gukora impapuro mu biti n’abandi.

Umuyobozi wa Sawmill East Africa, Agnis Magelinskas, aheruka gutangaza ko bahumbitse ingemwe nyinshi z’ibiti ku buryo biteguye gutera miliyoni zabyo.

Ati “Dutekereza ko gutera ibiti ari iby’agaciro gakomeye ku hazaza h’u Rwanda kugira ngo ruzabe rufite amashyamba menshi kandi meza. Ni iby’agaciro ku hazaza h’urwego rw’ababyaza umusaruro ibiti, twiyemeje kubyitaho.”

Yavuze ko nk’ikigo mpuzamahanga cya mbere kigiye gutangira gutunganya umusaruro w’amashyamba mu Rwanda, bashoye imari mu guhanga udushya mu ikoranabuhanga ryo kumisha ibiti n’imiti yo kubibungabunga.

Agnis yavuze ko ikigo ayobora gifite imashini zigezweho kandi zijyanye n’ibyo urwego rw’inganda mu Rwanda no mu Karere rwifuza.

Ati “Mu gihe kiri imbere, turateganya gukomeza gushora imari mu kugura ibikoresho bigezweho, guhugura abakozi no kwifashisha ikoranabuhanga rigezweho.”

Ngabonziza yavuze ko ibyo bitanga icyizere ko kwegurira amashyamaba abikorera bizateza imbere gahunda y’ibikorerwa mu Rwanda.

Ati “Bizafasha mu kongera umusaruro, turi kuzana mu gihugu ibikoresho bikoze mu mbaho. Kubyegurira abakorera bizateza imbere gahunda y’ibikorerwa mu Rwanda, byongere agaciro k’urwego rw’amashyamba, byongere ibyo u Rwanda rwohereza mu mahanga kandi bifashe kugabanya ingano y’imbaho rukura mu mahanga.”

Abafite amashyamba bibumbire mu makoperative

Ngabonziza yavuze ko hari na Gahunda yo guhuza amashyamba yahereye mu Turere twa Rwamagana, Gakenke, Rulindo na Gicumbi, aho abayafite bashishikarizwa kwibumbura mu makoperative kugira ngo arusheho gucungwa neza no kubyazwa inyungu.

Ati “Dushaka ko amashyamba agirira umumaro ba nyirayo aho kuyatema atarakura, twizeye ko ibi byashoboka igihe abafite amashyamba bibumbuye mu makoperative.”

Yakomeje ashishikariza abafite amashyamba barimo abatayacunga neza, kwibumbira mu makoperative kandi ko Guverinoma igiye kubibakangurira kugira ngo babone abashoramari bayabyaza umusaruro.

Yavuze ko 30% by’ubuso bugizwe n’amashyamba kandi ko hakenewe kuguma guterwa ibiti byinshi mu gihugu, cyane cyane mu bice by’inzuri, impande y’imigezi, ku mihanda no guteza imbere ubuhinzi bw’amashyamba.

Mu Rwanda 27% by’amashyamba ahari ni aya Leta hatabariwemo aya pariki z’igihugu. Ateye ku buso busaga hegitari ibihumbi 65.

Urwego rw’amashyamba kandi ni rumwe mu zifatiye runini ubukungu bw’u Rwanda kuko nko mu 2017 rwinjije miliyari zisaga 67Frw. Biteganyijwe ko nyuma yo kuyegurira abikorera azinjiza asaga miliyari 200Frw ku mwaka.

Amashyamba ya Leta y’u Rwanda yatangiye kwegurirwa abikorera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza