Kwamamaza

Amatora ya 2017: Hafi miliyoni 7 bazatora, 95% by’amafaranga bituruke mu Rwanda

Yanditswe kuya 14-11-2016 saa 07:24' na Ntakirutimana Deus


Muri Kanama 2017, abanyarwanda hafi miliyoni zirindwi bazitabira amatora ya Perezida wa Repubulika azaba aba ku nshuro ya gatatu nyuma ya Jenoside yakorewe Abatutsi mu 1994.

Imyiteguro y’icyo gikorwa irarimbanyije nkuko Umunyamabanga Nshingwabikorwa wa Komisiyo y’Igihugu y’Amatora, Munyaneza Charles yabitangaje.

Munyaneza yavuze ko abakorerabushake hirya no hino mu gihugu bashatswe, bakanahugurwa ndetse n’Abanyarwanda muri rusange bagahabwa inyigisho z’uburere mboneragihugu.

Iyo myiteguro kandi irakomeza uyu munsi ku wa Mbere tariki ya 14 Ugushyingo kugeza mu mpera z’uku kwezi, ku gikorwa kireba Abanyarwanda bose muri rusange.

Munyaneza ati “Ku wa Mbere turatangira kuvugura lisiti y’itora, buri mwaka iyo dufite amatora iba igomba kuvugurwa ngo ijyanye n’ibihe.”

Iryo vugururwa rirabanziriza irindi rizakorwa mu gihe gito amatora yegereje. Iyi komisiyo kandi irateganya ko ayo matora azitabirwa n’Abanyarwanda basaga
6,900,000, abazatora bwa mbere nabo buri mwaka bagera ku bihumbi 250.

Abagize icyo cyiciro baba bagomba gushyirwa kuri lisiti y’itora ndetse no kwigishwa uko amatora akorwa ndetse no kubakangurira kuyitabira. Amatora ya 2003 yitabiriwe n’Abanyarwanda basaga 3,900,000.

Muri aya matora Leta y’u Rwanda izakoreshamo ingengo ingana na 95% by’amafaranga yishatsemo aturuka imbere mu gihugu; ni ukuvuga ko inkunga iturutse hanze iba ingana na 5%.

Munyaneza yavuze ko kuba u Rwanda rwishakamo hafi amafaranga yose yifashishwa muri ayo matora, atari ugutinya ko abayatanga bayivangamo, ahubwo ni politiki yo kwigira, igihugu kigenderaho irimo kugenda ishyirwa mu bikorwa, kandi ko amatora yakagombye kuba ikimenyetso gikuru kiranga ubusugire bw’igihugu no kwigira.

Iyo ngengo yariyongereye kuko mu 2003, u Rwanda rwishatsemo 63% by’amafaranga yakoreshejwe. Kuba ubu bigeze kuri 95% ngo ni intambwe yatewe igora ibindi bihugu biri mu nzira y’amajyambere.

Amafaranga azifashishwa muri iki gikorwa asaga miliyari 5.5 z’amafaranga y’u Rwanda, ni ukuvuga ko ugereranyijwe y’ayifashishijwe muri 2010, ay’a 2017 azaba yagabanutseho miliyoni zigera kuri 500.

Aya matora kandi azifashishwamo ikoranabuhanga rigenda rikura umunsi ku wundi, kuko abantu bashobora kwiyimura kuri lisiti y’itora bakoresheje telefoni ndetse na mudasobwa, bakanareba amakuru y’imyirondoro yabo, uburyo butari buhari mu matora yabaye muri 2003 na 2010.

Bimenyerewe ko ubwitabire bw’abitabira amatora mu Rwanda butajya bujya hasi ya 98%.

Umunyamabanga Nshingwabikorwa wa Komisiyo y’Igihugu y’Amatora, Munyaneza Charles

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved