Amb.Kayonga yakiriwe na Perezida Quang wa Vietnam,amwizeza imikoranire n’u Rwanda

Yanditswe na Philbert Girinema
Kuya 12 Mutarama 2017 saa 10:30
43 29

Perezida Trần Đại Quang wa Vietnam yakiriye ba ambasaderi bashya bagiye guhagararira ibihugu byabo muri icyo gihugu, barimo Charles Kayonga w’u Rwanda, Wendy Irene Matthews wa New Zealand, Dosso Adama wa Côte d’Ivoire n’abandi.

Muri uwo muhango wabaye kuri uyu wa 11 Mutarama 2017, Perezida Quang yashimye umubano urangwa hagati ya Viet Nam n’ibi bihugu, ndetse asaba ko impande zombi zigenda zigena inzego z’ibanze zishobora kwitabwaho by’umwihariko mu bufatanye hagati y’ibyo bihugu na Vietnam.

Lt Gen Charles Kayonga asanzwe ahagarariye inyungu z’u Rwanda mu bihugu birimo u Bushinwa, Cambodia, Leos, Koreya ya Ruguru na Vietnam, ku rwego rwa Ambasaderi.

Ikinyamakuru Vietnam News cya guverinoma ya Vietnam cyatangaje ko “mu gushimira ambasaderi w’u Rwanda Charles Kayonga ku nshingano nshya yahawe, Perezida Quang yashimangiye ko Vietnam iha agaciro ubucuti igihugu cye gifitanye n’inshuti zo muri Afurika zirimo u Rwanda, by’umwihariko mu bijyanye no kwita ku buzima, uburezi n’ubuhinzi.”

“Ambasaderi Kayonga yavuze ko yizeye ko Vietnam izasangiza u Rwanda urugendo rwayo mu iterambere, yongeraho ko igihugu cye gihaye ikaze abacuruzi bo muri Vietnam bashaka kugishoramo imari.”

Perezida Quang kandi yanakiriye ambasaderi Pascoela Barreto dos Santos wa Timor-Leste na Janez Premoze wa Slovenia, impande zombi zigaragarizanya uko zifuza kurushaho gukorana mu gihe kiri imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE