Kwamamaza

Amb.Masozera yahawe umukoro wo kuzana impinduka mu Ngoro Ndangamurage z’u Rwanda

Yanditswe kuya 25-10-2016 saa 20:36' na Philbert Hagengimana


Nubwo yatumwe impinduka mu mikorere no mu miyoborere by’Ikigo cy’Ingoro Ndangamurage z’u Rwanda (INMR) kandi atarigeze akora imirimo isa n’iyo ashinzwe, Ambasaderi Robert Masozera ngo nta mpungenge bimuteye kubera uburambe n’ubunararibonye afite mu bya Dipolomasi.

Ibi yabitangaje kuri uyu wa Kabiri tariki ya 25 Ukwakira 2016, mu muhango w’ihererekanyabubasha hagati ye na Isidore Ndikumana wari Umuyobozi w’agateganyo w’iki kigo kuva muri Gicurasi uyu mwaka.

Ubwo yagarukaga ku mirimo yagiye akora mbere yo gushingwa kuyobora Ikigo cy’Ingoro Ndangamurage z’u Rwanda, Amb.Masozera yamaze impungenge abashobora kwibaza uburyo azabishobora kandi nta kindi kigo gisa na cyo yigeze ayobora, anagaragaza ko uburambe afite mu bya Dipolomasi ari intwaro ikomeye.

Ati “Ndagira ngo mbabwire ko iyo umuntu akora iriya mirimo ya Dipolomasi iri ku rwego nari maze kugeraho, avanamo uburambe n’ubunararibonye byamufasha kuyobora ikigo nk’iki cyacu. Jye naje gusanga harimo ubwuzuzanye bwinshi, ku buryo ntakwibwira ko nzahura n’ikibazo.”

Ambasaderi Masozera yagaragaje uburyo yanejejwe n’inshingano zikomeye yahawe, ati “Gushingwa kuyobora ikigo nk’iki, ni ukugirirwa icyizere gikomeye cyane. Jye bakibimbwira nabyikiriye neza, kuko bambwiraga inshingano zihari n’uburyo ikigo giteye, icyangaragariye ni uko gikomeye cyane kandi gifite inshingano ziremereye.”

Ambasaderi Masozera yatumwe impinduka

Ambasaderi Masozera yabwiye Abanyamakuru ko yatumwe impinduka mu bucuruzi bw’Ingoro Ndangamurage, ndetse ngo leta ishaka Ingoro zisobanutse, zikora neza, zihesha icyubahiro n’agaciro igihugu, ariko kandi ngo zitagarukira gusa ku bucuruzi, ahubwo zikaba n’ahantu heza ho gutoreza ababyiruka umuco nyarwanda.

Mu bindi Amb.Masozera yitezweho, hari gutuma icyo kigo gikurura ba mukerarugendo mu by’umuco, dore ko raporo yamurikiwe yamugaragarizaga ko Ubukerarugendo bw’amapariki bwinjiza miliyoni zisaga 31 z’amadolari,bukaba bukubye inshuro zisaga ijana ubw’umuco bwo bwinjiza 220.000$ gusa.

Ibyo kandi ngo bizanajyana no kuzamura umubare w’abasura Ingoro Ndangamurage z’u Rwanda, ariko cyane cyane abanyarwanda, dore ko abazisura ku mwaka bangana na 164.000, aho 70% baba ari Abanyarwanda naho 30% bakaba abanyamahanga, ibi bikaba bitandukanye no mu bukerarugendo bwa za pariki, aho usanga abanyarwanda baba ari 30%.

Amb.Masozera yibukije ko mu 1999 u Rwanda rwari rufite ingoro ndangamurage imwe gusa y’i Huye, mu Ntara y’Amajyepfo, none mu myaka iyingayinga 17 ishize, rugize ingoro 7 ndetse n’iya munani iri hafi kuzura, ibyo bikagaragaza ko INMR ari ikigo gikomeye kandi kirimo gukura cyane, dore ko hari n’izindi site ndangamateka zitarabarurwa.

Ati “Naganiriye n’abagize inama y’ubutegetsi, bambwiye byinshi banyitezeho, bangaragariza imiterere y’ikigo, ndetse banambwira ibibazo nzahura na byo, ariko banangaragariza cyane ibisubizo bihari. Ngira ngo bari bazi ko ndibugire ubwoba, ariko babumaze, ubu ndi umuntu winjiye mu kigo nishimiye.”

Dr.Yvan Twagirashema, Umuyobozi w’inama y’ubutegetsi y’Ingoro Ndangamurage z’u Rwanda, yakomeje avuga ko biteze ko Amb.Masozera aje gutuma babasha kwesa imihigo bahigiye imbere ya Minisiteri y’Umuco na Siporo.

Ubwo Umukuru w’Igihugu, Paul Kagame yavugururaga Guverinoma ndetse n’abayobozi ku rwego rw’Intara, ku wa Kabiri tariki ya 4 Ukwakira 2016, ni bwo Ambasaderi Masozera Robert yagizwe Umuyobozi Mukuru w’Ikigo cy’Ingoro Ndangamurage z’u Rwanda.

Yashyizwe kuri iyo mirimo nyuma y’igihe yari amaze asohoje ubutumwa yari arimo nka Ambasaderi w’u Rwanda mu Bubiligi, Luxembourg, Chypres, Turukiya, Umuryango w’Ubumwe bw’u Burayi, n’umuryango w’ibihugu bya Afurika n’ibyo muri Caraïbes na Pacifique.

Iyo mirimo yayishinzwe kuva mu mwaka wa 2011 nyuma y’igihe yari amaze muri Minisiteri y’Ububanyi n’Amahanga, aho yari ashinzwe imiryango y’Abanyarwanda baba hanze.

Ambasaderi Masozera azitwaza intwaro y'ubunararibonye mu bya dipolomasi mu kuyobora Ikigo cy'Ingoro Ndangamurage z'u Rwanda
Isidore Ndikumana wari Umuyobozi w'agateganyo wa INMR kuva muri Gicurasi uyu mwaka
Umuhango w'ihererekanyabubasha wayobowe na Dr Twagirishema
Isidore Ndikumana ahererekanya ububasha na Ambasaderi Masozera Robert
Abagize Inama y'Ubutegetsi ya INMR babanje kugirana inama n'Umuyobozi mushya Ambasaderi Masozera
Abakozi muri INMR baje kwakira ku mugaragaro Umuyobozi wabo

Amafoto:Kazungu Armand


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved