Ambasaderi Chali yemeje ko nta Munyarwanda ugifatwa nk’impunzi muri Zambia

Yanditswe na Cyprien Niyomwungeri
Kuya 10 Ukwakira 2017 saa 08:02
Yasuwe :
0 0

Ambasaderi mushya wa Zambia mu Rwanda, Benson Keith Chali, yatangaje ko mu gihugu cye nta mpunzi z’Abanyarwanda zikihaba mu gihe habura amezi abiri ngo hakurweho sitati y’ubuhunzi.

Kuri uyu wa Kabiri ubwo Amb. Keith Chali yari amaze gushyikiriza Perezida Kagame impapuro zimwemerera guhagararira igihugu cye mu Rwanda afite icyicaro i Dar es Salaam muri Tanzania, yabwiye itangazamakuru ko nta mpunzi z’Abanyarwanda zikiri muri Zambia kuko bamaze kuba abaturage basanzwe batanga umusanzu mu iterambere.

Yagize ati “Twakiriye impunzi z’Abanyarwanda muri Zambia ariko ntabwo bakiri impunzi, abenshi bakora ubucuruzi, babaho nk’abaturage basanzwe. Bamwe bashakanye n’Abanya-Zambia bahafite abavandimwe benshi, ‘iyo uvuze impunzi z’abanyarwanda ziba muri Zambia sinzi icyo uba uvuga kuko twakiriye Abanyarwanda baje muri Zambia nk’impunzi ariko ubu ntibakiri impunzi bamaze kwihuza n’abandi baturage.”

Akomeza avuga ko ntawe basaba gutahuka kuko impunzi ziba mu nkambi arizo zisabwa gusubira iwabo.

Yagize ati “Nibashaka kugaruka bazifatira icyemezo ntabwo tugiye kubirukana, abo dusaba gutahuka ni ababa mu nkambi z’impunzi kandi ntabwo nzi Umunyarwanda uba muri izi nkambi, hafi ya bose ni abaturage basanzwe nkatwe.”

Imibare iheruka igaragaza ko muri Zambia habarurwaga impunzi z’Abanyarwanda zisaga 4000 zirimo 1000 ziba mu murwa mukuru Lusaka.

Ku Banyarwanda bakiri impunzi mu mahanga bagiye bahamagarirwa gutaha, abatabishaka bakaka ibyangombwa by’ibihugu barimo ariko batitwa impunzi.
Abatazabigenza batyo biteganyijwe ko bazatakaza iyo sitati y’ubuhunzi bitarenze kuwa 31 Ukuboza 2017 n’Ishami rya Loni rishinzwe impunzi (HCR) ribahagarikire imfashanyo.

Ambasaderi mushya wa Zambia mu Rwanda, Benson Keith Chali

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza