Ambasaderi Ohlsson wasoje ubutumwa mu Rwanda yasezeye kuri Perezida Kagame (Amafoto)

Yanditswe na Rabbi Malo Umucunguzi
Kuya 16 Kanama 2019 saa 11:14
Yasuwe :
0 0

Perezida Paul Kagame, kuri uyu wa Gatanu yakiriye Ambasaderi Jenny Ohlsson wari uhagarariye Suède mu Rwanda, wasoje inshingano yari amazemo imyaka itatu.

Ambasaderi Ohlsson yemejwe n’Inama y’Abaminisitiri ku wa 13 Nzeri 2016 nk’uwa mbere wa Suède ufite icyicaro i Kigali, atangira inshingano mu Ukwakira uwo mwaka.

Mbere y’uko Suède ifungura Ambasade mu Rwanda mu 2016, ibikorwa bireba u Rwanda na Suède byasuzumirwaga muri Ambasade y’i Nairobi na Kampala.

Mu kiganiro yagiranye na IGIHE mu Ukwakira umwaka ushize, Amb. Ohlsson yavuze ko yaryohewe no gukorera no kuba mu Rwanda.

Agaruka ku byamunyuze muri iki gihugu yagize ati “Ni ibihe byiza mu buryo ngereranya u Rwanda mu myaka icumi na none. Iterambere ririgaragaza mu nzego nyinshi. Ni ahantu heza ho gukorera. Birumvikana hari igihe haba n’imbogamizi, tugirana impaka n’abandi ariko nkunda gukorera hano kuko hari icyerekezo kizima.”

Yibuka umunsi wa mbere yahuye na Perezida Kagame, ko hari byinshi byamusigaye ku mutima kubera imikorere ye.

Ati “Byari byiza ariko nari nafite impungenge kuko ari ubwa mbere duhuye. Navuye mu Biro bya Perezida, Minisitiri w’Ububanyi n’Amahanga anyongorera ko yishimira gusangira ifunguro rya saa sita. Sinasobanukiwe! Natunguwe no gusanga nicaye ku meza amwe na Perezida. Byari bishya kuri njye. Ambasaderi mushya w’imyaka 41 yicaranye ku meza mato na Perezida n’umugore we!”

"Ryari ifunguro ridasanzwe. Nta ngingo yihariye nari mfite yo kuganiraho kuko sinari mbizi ariko cyabaye ikiganiro cyiza kuri politiki zacu, ibiduhuza n’ibitandukanya ibihugu byombi."

Bimwe mu byo uyu mudipolomate yishimira bimaze gukorwa mu mubano w’ibihugu byombi harimo ubufatanye mu bikorwa bitandukanye birimo mu bijyanye n’ubushakashatsi muri za kaminuza.

Ubufatanye bwa Kaminuza y’u Rwanda na Suède bumaze gutuma kuva mu 2013, abagera kuri 67 babona impamyabumenyi z’ikirenga (PhD) ndetse 302 babonye Master’s.

Kuva mu 2007 kugera mu 2009, Ambasaderi Jenny Ohlsson yabaye umunyapolitiki wa mbere wa Suède uhawe imirimo akorera mu Rwanda. Ubwo yatwitaga yafashe icyemezo cyo gusubira muri Suède, nyuma aza guhabwa akazi mu Biro bya Minisitiri w’Intebe ashinzwe ibijyanye n’ububanyi n’amahanga n’ingabo.

Gusa kubera ko yashakaga kongera gukorera muri Afurika, yasabye gusubira mu mwanya yahozemo i Kigali kuko wari ugihari, icyo gihe uhita uhindurwa uwa ambasaderi.

Inkuru wasoma: Urwibutso rwa Amb. Ohlsson asangira bwa mbere na Kagame, kwagura umubano n’ibindi- Ikiganiro kirambuye

Perezida Paul Kagame yakiriye Ambasaderi wa Suède mu Rwanda, Jenny Ohlsson wasoje inshingano zo guhagararira igihugu cye yari amazemo imyaka itatu i Kigali
Ohlsson ari muri ba ambasaderi bagaragazaga kwishimira intambwe y'u Rwanda nyuma ya Jenoside yakorewe Abatutsi mu 1994
Ambasaderi Ohlsson yasezeye kuri Perezida Kagame
Ambasaderi Ohlsson yagiriye ibihe byiza mu Rwanda. Mu mwaka ushize yabwiye IGIHE ko azahora azirikana urugwiro yeretswe n'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza