Amerika:Dr Clet Niyikiza yahawe igihembo cyo kurwanya Kanseri

Yanditswe na Kanamugire Emmanuel
Kuya 22 Ukwakira 2016 saa 11:28
Yasuwe :
0 0

Dr Clet Niyikiza, Umunyarwanda uba muri Leta Zunze ubumwe za Amerika ndetse n’itsinda rigamije kuzamura imiryango no kuyongerera ubushobozi (Lifting and Empowering All Families -L.E.A.F.) bahawe igihembo cy’uko bahize abandi mu kurwanya kanseri.

Icyo gihembo bagitsindiye biciye mu guhanga ibishya mu kwita ku buzima muri 2016(2016 Health Care Innovator Award).

Ambasade y’u Rwanda muri Amerika yatangaje ko icyo gihembo gitangwa n’ikinyamakuru cy’ubucuruzi cyo muri Leta ya Philadelphia muri Amerika.

Icyo kinyamakuru gihemba abantu cyangwa sosiyete zakoze ibikorwa byo kwita ku buzima ndetse n’inganda z’iby’ikoranabuhanga bijyanye n’ubuzima, byose bigamije gutuma Philadelphia ikomeza kuba ahantu hahangirwa ibishya.

Dr Niyikiza,Umuyobozi mukuru wanashinze L.E.A.F. Pharmaceuticals, guhera muri 2005 yari umwe mu bagize ihuriro ry’Amerika ryashinzwe na Perezida George Bush rigamije guteza imbere ibijyanye n’ubushakashatsi mu bya kanseri, uko yakwirindwa n’uko yavurwa.

L.E.A.F. Pharmaceuticals ni sosiyete ikora ibijyanye n’imiti iherereye ahitwa Valley Forge muri leta ya Pennsylvania. Iyo sosiyete ifite inshingano zo kureba uko yakomeza gukora ibishya mu bucuruzi bugamije kuvura kanseri.

Dr Niyikiza yishimiye icyo gihembo baheshejwe n’ubushake bwo gukorera hamwe bwaranze iryo tsinda, yizeza ko rizakomeza mu cyerekezo ryihaye ryo gukomeza kuzamura no kongerera ubushobozi imiryango biciye mu gukomeza guhanga ibishya ndetse no guharanira ko abarwayi bahabwa imiti ikwiye.

Yagize ati “Twishimiye kwakira iki gihembo cyerekana ubushake bw’itsinda ryacu mu bijyanye no gushyira imbere ikoranabuhanga mu gushakisha no guteza imbere ibijyanye n’ubuvuzi bwa kanseri muri Philadelphia.”

Dr Niyikiza, umubyeyi w’abana batatu, afite impamyabuhsobozi y’ikirenga(Dogitora) mu mibare yavanye muri kaminuza ya Bloomington iherereye muri leta ya Indiana muri Amerika.

Ubu ni umwe mu bagize itsinda rishinzwe ubujyanama mu biro bya Perezida mu Rwanda.

Niyibizi kandi ni umwe mu bagize umuryango w’Abanyamerika ugamije gukora ubushakashatsi kuri kanseri.

Ambasaderi w’u Rwanda muri Amerika, Mathilde Mukantabana abinyujije ku rubuga rwe rwa Twitter, yashimiye Dr Clet Niyikiza ndetse n’itsinda rye rya L.E.A.F. ku bw’icyo gihembo bahawe kubera kurwanya kanseri,kuva muri 2014.

Dr Clet Niyikiza, wahawe igihembo cyo kurwanya Kanseri mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244