Arabia Saoudite yashyizwe mu majwi guha urwaho ibikorwa by’iterabwoba mu Bwongereza

Yanditswe na Mukaneza M.Ange
Kuya 14 Nyakanga 2017 saa 01:42
Yasuwe :
0 0

Sir William Patey wahoze ari Ambasaderi w’u Bwongereza muri Arabia Saoudite, yatangaje ko iki gihugu gitera inkunga ibikorwa by’ubuhezanguni biganisha ku iterabwoba mu Bwongereza.

Sir William w’imyaka 64, yabaye Ambasaderi w’u Bwongereza muri Arabia Saoudite kuva mu 2006 kugera mu 2010 ndetse yaranayoboye agashami k’Ibiro bishinzwe Ububanyi n’Amahanga kibanda ku bikorwa birebana n’Uburasirazuba bwo hagati.

Mu kiganiro mpaka cyabereye mu Nteko Ishinga Amategeko, Sir William yavuze ko Arabia Saoudite itajya iha agaciro uburyo inkunga iha imiryango itandukanye y’Abayisilamu ikoreshwa n’ingaruka bigira mu bihugu bitandukanye bitari ibyo ku mugabane w’u Burayi gusa.

Ati” Bari gutera inkunga ikindi kintu kizagenda gahoro gahoro gituma abantu baba abahezanguni ndetse bikarangira babaye ibikoresho by’iterabwoba.”

Yakomeje avuga ko atavuga ko kiriya gihugu gitera inkunga iterabwoba ahubwo gishyigikira ibikorwa byigisha ingengabitekerezo y’Abayisilamu bifuza ko isi igendera ku matwara yo mu bihe bya kera (Salafist Wahhabist ideology).

Nk’uko The Independent yabyanditse, ibi Williams yabitangaje mu gihe abatavuga rumwe na Leta mu Bwongereza bayishinja kwanga gushyira hanze raporo igaragaza abatera inkunga ibikorwa by’iterabwoba muri iki gihugu kubera gutinya kuvuga nabi Arabia Saoudite.

Inteko Ishinga Amategeko y’u Bwongereza iherutse gutangaza ko impamvu Minisiteri y’Umutekano itashyize hanze iyi raporo ari uko irimo amakuru menshi ashobora kugira ingaruka ku mutekano w’igihugu.

Minisitiri w’Umutekano, Amber Rudd, we yavuze ko inkunga ihabwa imitwe y’iterabwoba muri Amerika itangwa n’abantu ku giti cyabo biganjemo abatuye mu Bwongereza.

Mu mezi abiri ashize u Bwongereza bwibasiwe n’ibitero by’iterabwoba bitandukanye birimo icyagabwe mu mujyi wa Manchester kigahitana abagera kuri 22.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza