Kwamamaza

Asaga Miliyali ebyiri yashowe mu mishinga yubakira ubushobozi abagore

Yanditswe kuya 16-10-2016 saa 18:24' na Prudence Kwizera


Muri gahunda yawo yo guteza imbere umugore no kumwubakira ubushobozi, Umuryango Mpuzamahanga nterankunga ishami ry’u Rwanda (Action Aid Rwanda), uvuga ko watangiye gushyira mu bikorwa umushinga uzatwara Miliyoni eshatu n’ibihumbi umunani by’Amayero angana n’amanyarwanda 2,600,000,000, akazafasha abagore kwivana mu bukene bakagera ku majyambere arambye.

Uyu mushinga witwa Flow II (Founding Leadership and Opportunities for Women) icyiciro cya kabiri, biteganyijwe ko uzamara imyaka itanu (2016-2020) ukorana n’abagore bo mu cyaro bagera ku 6,000 n’abagabo igihumbi bo mu mirenge 11 yo mu turere dutanu, turimo Gisagara, Nyaruguru, Nyanza, Musanze na Karongi.

Umuyobozi w’Umushinga Flow, Anathole Uwiragiye, avuga ko ibikorwa bari kwibandaho birimo guha abagore amatungo maremare n’amagufi, ibigega bifata amazi, amarerero y’abana, ECD (Early Childhood Development), kubaha imbuto yo guhinga n’ingemwe z’ibiti bivangwa n’imyaka kandi biribwa n’amatungo, kububakira ubuhunikiro, hakiyongeraho no kubaha amahugurwa ndetse no kubahuza n’inzego zifata ibyemezo.

Ibi byose ngo bizafasha umugore kuva mu bukene ndetse n’inzego zifata ibyemezo zibe zakomeza gushyiraho uburyo n’amategeko birengera umugore, binamuha amahirwe yo kwiteza imbere.

Ati “Intego nyamukuru ni ukubakira abagore ubushobozi bakayoka imishinga ibyara inyungu, kuko iyo umugore ateye imbere umuryango wose uba uteye imbere. Ikindi dukora ni ukwigisha abashakanye gufatanya imirimo yose kandi bakareka guhohoterana, kuko n’ubushakashatsi bwakozwe bwerekana ko umugore ashoboye.”

Kugira ngo uyu mushinga ushyirwe mu bikorwa neza, abagore n’abagabo bagenda bashyirwa hamwe mu matsinda abafasha guhabwa inyigisho no kungurana ibitekerezo, kandi bagatozwa no gukorana n’ibogo by’imari.

Muri utwo turere dutanu uyu mushinga uzakoreramo, hamaze gushingwa amatsinda 200 abumbiye hamwe abagore n’abagabo, aho buri tsinda rigizwe n’abantu 30.

Action Aid yafashije kandi mu gikorwa cyo koroza abagore bo mu Murenge wa Kibirizi inka 28 ziza zisanga izindi 49 zatanzwe mu Mirenge ya Gishubi na Muganza.

Bamwe mu bagore bo mu Karere ka Gisagara baganiriye na IGIHE bavuga ko ibyiza by’umushinga Flow byatangiye kubageraho.

Liberatha Nyirarenzaho utuye mu Murenge wa Muganza ati “Bampaye inka y’imbyeyi, ngiye kuzajya mbona ifumbire n’amata, kandi turishimira ko batwubakiye ishuri ry’incuke abana bacu bagiye kujya biga hakiri kare.”

Marie Gorette Niyonsaba utuye mu Murenge wa Gishubi ati “Bampaye inka, ariko icyo nishimira gikomeye ni uko Action Aid na Duhozanye baduhaye inyigisho, njyewe n’umugabo wanjye tukaba tubanye neza kandi yari yaramparitse akishakira undi, ubu uwo murundikazi yari yarashatse yaramwirukanye, tubanye neza.”

Depite Gahondogo Athanasie ubwo yifatanyaga n’abaturage bo mu Karere ka Gisagara mu kwizihiza Umunsi Mpuzamahanga w’umugore wo mu Cyaro ku wa 15 Ukwakira 2016, yashimye uruhare Action Aid igira mu kubakira umugore ubushobozi, asaba ubufatanye bwa buri wese mu bikorwa nk’ibi.

Depite Gahondogo yagarutse ku kibazo cy’abagore bagihohoterwa bazizwa ko birirwa mu mirimo yo mu rugo itinjiza amafaranga, asaba ko bihagarara.

Umuyobozi wa Action Aid mu Rwanda, Josephine Uwamariya, avuga ko ibikorwa bakora byo gushyigikira umugore biba bigamije guteza imbere urugo rwose ndetse n’umuryango, ariko asobanura ko kugira ngo iterambere rigerweho ari uko abashakanye bagomba gutahiriza umugozi umwe bafatanya muri byose ntawe uvunishije undi.

Ati “Umuryango ugizwe n’umugore, umugabo n’abana babo, nta wundi uzaza kububakira umuryango, ni mwe mugomba gufata iya mbere mukiteza imbere kandi mufatanyije ntawe uvunisha undi. Twebwe iyo tuje tugatanga ubufasha ni ubufasha nyine, ariko uwifasha ni wowe ubwawe.”

Action Aid ivuga ko imirimo ikorwa n’abagore nko gutora inkwi, kurera umwana, kwita ku murwayi, kumesa imyenda, guteka, ari imirimo ifata igihe ariko idahemberwa, ariko umugabo n’abandi bakavuga ko nta kintu uwo mugore akora, bityo ngo abagabo bagomba guhindura imyumvire kandi n’abagore bakubakirwa ubushobozi butuma bakora imishinga ibyara inyungu z’amafaranga.

Ubushakashatsi bwakozwe na Action Aid Rwanda mu 2015, bwagaragaje ko abagore 91% bo mu Rwanda bakora imirimo idahabwa agaciro, itanahemberwa (unpaid care works) nk’akazi ka buri munsi.

Ubu bushakashatsi kandi bwerekanye ko 41% by’igihe cya buri munsi cy’abagore bakimarira mu mirimo irimo gutora inkwi no kuvoma amazi, ibintu bigaragaza ko hakiri umubare munini w’abanyarwandakazi bakora imirimo idahabwa agaciro kandi nyamara itwara umwanya wagakozwemo indi ibyara inyungu rusange mu iterambere ry’igihugu.

Ikibonwa nk’umuti urambye wagabanya imirimo ivuna abagore, hagaragajwe ko abagabo n’abagore bakwiye kujya bafatanya igihe bibaye ngombwa, ndetse hagashakwa n’uburyo bwo guteka bakoresheje Gazi (Gaz), kwegerezwa amavomero ndetse hagashyirwaho n’irerero ry’abana muri buri mudugudu.

Umuryango Action Aid umaze imyaka isaga 30 mu Rwanda ufasha Abanyarwanda kwiteza imbere cyane abo mu byaro, no kugabanya umubare w’Abanyarwanda baba mu murongo w’ubukene.

Depite Gahondogo asaba ko guhohotera abagore bitewe n'uko birirwa mu mirimo iciriritse bihagarara
Muri uyu mushinga abaturage bazorozwa amatungo arimo inka
Abagore bakorana na Action Aid bemeza ko yabigishije kwihangira imirimo
Uwiragiye ukuriye umushinga FLOW avuga ko bagamije gukura abagore mu bukene
Josephine Uwamariya asaba ko umugore n'umugabo bakwiye gufatanya muri byose
Abagore bo mu Murenge wa Muganza bishimira ibyo bagejejweho n'umuryango ActionAid

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved