Asaga miliyari 135Frw ni yo akenewe ngo politiki irebana n’isuku ishyirwe mu bikorwa

Yanditswe na Mukaneza M.Ange
Kuya 19 Mata 2017 saa 04:24
Yasuwe :
0 0

Mu gihe inzego zitandukanye zikomeje guhuza imbaraga ngo gahunda zirebana n’isuku zigererweho, Minisiteri y’Ibikorwaremezo, itangaza ko hakenewe miliyari 135,115 z’amafaranga y’u Rwanda kugira ngo politiki irebana n’izi gahunda ibe yamaze gushyirwa mu bikorwa bitarenze 2020.

Mu nama yahuje inzego zitandukanye zifite aho zihuriye n’ibijyanye n’isuku kuri uyu wa 19 Mata 2017, hagaragajwe ko hari byinshi bimaze gukorwa kugera ku kigero kiri hejuru ya 80% ariko urugendo rukaba rukiri rurerure.

Umuyobozi w’ishami rishinzwe igenamigambi muri MININFRA, Eng. Aimé Muzola yavuze ko baherutse gushyiraho politiki itanga umurongo w’uburyo imyanda ikomeye n’iyoroshye igomba kubyazwa umusaruro, kandi n’aho yari iri hagasigara hasa neza, kugira ngo igerweho hakaba hakewe amafaranga.

Ati” Amafaranga mwagiye mubona ni akenewe kugira ngo tugere ku byo twiyemeje. Icyiza ni uko ubuyobozi bw’igihugu bushyize imbaraga muri ibi bijyanye n’isuku. Muri gahunda ya guverinoma bagiye bongera umubare w’amafaranga ajya mu bijyanye n’isuku. Uko tugenda tubyongera ni na ko tugenda dukorana n’abaterankunga ndetse n’abashoramari.”

Umunyamabanga Nshingwabikorwa w’Umujyi wa Kigali, Didier Sagashya, na we yavuze ko hari gahunda zigamije guteza imbere isuku, nko kuvugurura ikimoteri cya Nduba, gutunganya za ruhurura no kuganira n’inzego zitandukanye ngo harebwe uburyo n’abatishoboye bajya batwarirwa ibishingwe bitabaye ngombwa ko bishyura.

Hari kandi gahunda yo gushyiraho inganda zitunganya amazi mabi, zizatwara miliyoni 150$, Umuyobozi w’Ikigo gishinzwe Amazi n’Isuku, James Sano akaba yatangaje ko zizubakwa mu gihe cy’imyaka itageze kuri itatu kandi bigakorwa ku bufatanye n’abikorera.

Umuyobozi ushinzwe ibijyanye n’amazi n’isukura mu Muryango BMGF (Bill &Melinda Gates Foundation), Dennis Mwanza yavuze ko nubwo mu Rwanda 80% by’abaturage usanga bafite ubwiherero n’isuku, hakiri imbogamizi ku bijyanye no gutunganya imyanda, bakaba biteguye gukora na Leta ngo nabyo bigerweho.

Kwihutisha ishyirwa mu bikorwa rya gahunda yo kunoza uburyo bwo gutunganya imyanda (waste management) mu Mujyi wa Kigali no mu Mijyi itandatu iwunganira; ni umwe mu myanzuro yafatiwe mu mwiherero wa 14 w’abayobozi.

Umunyamabanga Nshingwabikorwa w'Umujyi wa Kigali, Didier Sagashya
Umuyobozi Ushinzwe amazi, isuku n'isukura muri RURA, Eng. Jacques Nzitonda
Umuyobozi ushinzwe ibijyanye n'amazi n'isukura mu muryango BMGF, Bill Melinda Gates Foundation, Dennis Mwanza
James Sano yahoze ayobora WASAC
Umuyobozi ushinzwe igenamigambi muri Mininfra, Eng. Aim Muzola
Bamwe mu bari bitabiriye iyi nama

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza