Australia yavuze icyatumye ituza mu ibanga abanyarwanda bashinjwa kwica ba mukerarugendo

Yanditswe na Evariste Nsengimana
Kuya 20 Gicurasi 2019 saa 12:13
Yasuwe :
0 0

Minisitiri w’Intebe wa Australia, Scott Morrison, yavuze ko abanyarwanda babiri bashinjwe kwica ba mukerarugendo umunani b’Abanyaburayi mu 1999, bemerewe gutuzwayo nyuma yo kugenzura bagasanga ari abere.

Aba bagabo bari bamaze imyaka 15 bafungiwe muri Leta Zunze Ubumwe za Amerika, harimo umwe witwa Leonidas Bimenyimana na Gregoire Nyaminani.

Bashinjwe kugira uruhare mu kwica ba mukerarugendo umunani bakoresheje imihoro n’amashoka, ubwo barimo basura ingagi muri Uganda mu 1999.

Aba ba mukerarugendo barimo babiri bo muri Leta Zunze Ubumwe za Amerika, babiri bo muri Nouvelle-Zélande n’abandi bane bo mu Bwongereza.

Babishe babavanye muri Pariki ya Bwindi iri muri Uganda, babikora bagamije gutanga ubutumwa ku bihugu by’i Burayi ko batishimiye kuba ibi bihugu byari bishyigikiye icyo bitaga leta y’Abatutsi yari imaze kujyaho mu Rwanda.

Nyuma yo gutabwa muri yombi boherejwe muri Leta Zunze Ubumwe za Amerika kuburanishwa ariko mu 2006 iki kirego cyaje kuvanwaho nyuma y’aho umucamanza avuze ko bemeje icyaha nyuma yo gukorerwa iyicarubozo.

Nyuma yo kugirwa abere bakomeje kuba muri Leta Zunze Ubumwe za Amerika kuko leta itashakaga kubarekura ariko nabo ntibashake kugaruka mu Rwanda kuko ngo batinyaga ko bashobora gukurikiranwa n’inkiko.

Byavuze ko kubera amasezerano yasinywe hagati ya Malcolm Turnbull wabaye Minisitiri w’Intebe wa Australia kuva mu 2015-2018 na Barack Obama , byatumye aba bantu bajyanwa muri iki gihugu baguranywe n’abandi.

Amakuru avuga ko abo banyarwanda babiri bajyanywe muri Australia umwaka ushize gusa umuntu wa gatatu muri aba banyarwanda aracyari muri muri Amerika.

Ubwo Perezida Donald Trump yajyaga ku butegetsi yamaganye aya masezerano y’impunzi yasinywe hagati y’aba bayobozi babiri.

Mu kiganiro yaherukaga kugirana n’itangazamakuru, Minisitiri w’Intebe, Morrison yasobanuye ko umuntu wese winjira muri icyo gihugu kubera amasezerano ayo ari yo yose abanza gukorerwa igenzura ariko ntiyagira icyo avuga ku birego bashinjwa.

Star Tribune yanditse ko ku wa Gatanu w’icyumweru gishize Minisitiri w’Intebe, Morrison yatangaje ko abo banyarwanda batujwe mu gihugu cye umwaka ushize bahanaguweho ibyaha.

Ati “Biriya byaha bashinjwa byasesenguwe n’inzego z’umutekano n’ibiro bishinzwe abinjira n’abasohoka byacu zisanga bitabahama, bahita bemererwa kuza muri Australia.”

Minisitiri w’Intebe Morrison yavuze ko bakomeje gukorwaho iperereza niba hari uruhare baba baragize mu bindi byaha by’intambara.

Imiryango ya ba mukerarugendo bishwe yarakajwe n’icyo cyemezo Australia yafashe cyo gutuza abo bantu bakoze ibyaha bikomeye.

Haubner Norton ufitemo umuvandimwe yabwiye ibiro ntaramakuru bya Australia, ko icyemezo cyo kubatuza ari kibi, kigaragaza ugutsindwa.

Haubner avuga ko kuba abo abanyarwanda baragize ubwoba bwo kugaruka mu Rwanda, bavuga ko bazabazwa nyamara n’umuvandimwe we baramubabaje.

Ati “Baravuze ngo sinshaka kujya mu Rwanda, sinshaka ko bazambabaza. Umuvandimwe wanjye nawe buriya ni kuriya yavugaga bamushyizeho imbunda.”

Umunya- Écosse ufite umubyeyi wahiciwe, David Robert, yasabye ko Australia yisubiraho ku mwanzuro yafashe wo gutuza abo banyarwanda.

Avuga ko bitumvikana ukuntu icyo gihugu cyemeye kubatuza kandi bashinjwa ibyaha bikomeye ndetse bagatuzwa ku kirwa kitigeze giturwaho n’abanyabyaha.

Minisitiri w'intebe wa Australia Morrison yavuze ko basesenguye ibyo abanyarwanda batuje bashinjwa bagasanga ari abere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza