Ba rwiyemezamirimo biganjemo urubyiruko beretswe amahirwe ahishe mu bukerarugendo

Yanditswe na Evariste Nsengimana
Kuya 30 Mata 2019 saa 08:59
Yasuwe :
0 0

Ba rwiyemezamirimo mu rwego rw’amahoteli n’ubukerarugendo, biganjemo urubyiruko rwarangije muri Kaminuza yigisha iby’amahoteli, ubukerarugendo, ikoranabuhanga n’ubucuruzi(UTB-Alumni), basobanuriwe uko babyaza umusaruro amahirwe agaragaramo n’uko bazamura impano babifitemo.

Ibi ni mu rwego rwo gutera ingabo mu bitugu Leta mu guhanga akazi no guhanga udushya mu bikorwa byabo by’ubucuruzi.

Ni mu kiganiro bahawe n’inzobere mu ishoramari rishingiye ku bukerarugendo n’amahoteli ku wa 26 Mutarama 2019.

Cyateguwe n’Ikigo cy’imari gitanga inguzanyo n’ubufasha buhoraho bwo gukurikirana imishinga y’ubucuruzi, GroFin, ku bufatanye n’Umuryango Mastercard Foundation, binyuze mu mushinga Hanga Ahazaza ugamije guteza imbere ubukerarugendo.

Umuyobozi wa GroFin Rwanda, Christian Bugabo, yavuze ko mu mbogamizi zikomeye ba rwiyemezamirimo bakiri bato bagira harimo kubura igishoro, kutagira igenamigambi riboneye n’ubumenyi budahagije mu ishoramari n’icungamutungo.

Bugabo yabagiriye inama yo gutegura imishinga myiza kandi igaragaza uko izunguka mu buryo burambye, ku buryo abaterankunga n’ibigo by’imari byayibenguka bakayitera inkunga kugira ngo yunguke kandi igere ku ntego.

Ati “Twifuje guhura na ba Rwiyemezamirimo barangije muri UTB, bafite ibikorwa by’ubucuruzi mu bukerarugendo kugira ngo twige inzitizi bafite ariko n’amahirwe ari mu rwego rw’amahoteli n’ubukerarugendo, tunashaka uburyo twabafasha kugira ngo ubushobozi bwabo bukomeze buzamuke.”

Yavuze ko iyo ubushobozi bwa rwiyemezamirimo buzamutse “Batera imbere, bagateza imbere ibigo byabo n’igihugu bahanga imirimo ariko banishyura imisoro ifasha Leta kubaka ibikorwa remezo nk’imihanda, amavuriro, amashuri, amazi n’amashanyarazi.”

Umuyobozi mukuru wa Kaminuza y’amahoteli, ubukerarugendo, ikoranabuhanga n’ubucuruzi(UTB), Dr. Kabera Callixte, uri mu batanze ikiganiro. Yavuze ko urwego rw’ubukerarugendo rurimo amahirwe adakwiriye kubapfana ubusa.

Guverinoma yihaye intego ko mu 2024 inyungu u Rwanda ruvana mu bukerarugendo igomba kwikuba kabiri ikagera kuri miliyoni 800$ zivuye kuri miliyoni 404$ yinjiye mu mwaka ushize.

Ati “Ibyo bivuze ko urwo rwego ruzakomeza gukura! Uko ruzakomeza gukura, ntabwo rwakura rwonyine, rukeneye abantu bo kurufasha gukomeza gukura, kandi ni mwebwe nka ba rwiyezamirimo mugomba kubishyira mu bikorwa.”

Yavuze ko bamwe mu bagomba kugira uruhare mu gukomeza gukura kwarwo ari abiga mu mashuri yigisha iby’amahoteli n’ubukerarugendo.

Ati “Kwihangira umurimo niryo pfundo ryo kubigeraho, cyane cyane duhereye ku banyeshuri ba UTB batozwa kwihangira umurimo bakiri mu myaka ibanza, bakagera mu mwaka wa gatatu barateye imbere mu gutegura ubucuruzi.”

Yagiriye inama abakirangiza kwiga ko gushaka akazi ari byiza ariko ibyiza kurushaho ari ukukihangira nabo bakagatanga.

Dr. Kabera yavuze ko intego ya UTB ari uko byibuze 60% barangijeyo bagomba guhanga akazi aho kujya kugashaka, kandi imyingishirize bafite iganisha kuri iyi ntego.

Umuyobozi w’ishami rishinzwe kugenzura iby’amahoteli n’ubukerarugendo mu kigo cy’Igihugu gishinzwe iterambere(RDB), Nsabimana Emmanuel, yavuze ko Leta ikora ibishoboka byose mu gukorana no korohereza abashoramari kugira ngo babyaze umusaruro amahirwe ahari.

Yerekanye mu buryo bwimbitse ingamba n’ingufu Leta ishyira mu guteza imbere uru rwego rufatiye runini igihugu mu kwinjiza amadovize menshi, abizeza ko RDB, nk’ikigo gishinzwe kureshya abashoramari, izakomeza gukora ubuvugizi kugira ngo uru rwego rukomeze kwitabirwa na ba rwiyemezamirimo benshi, barimo n’abakiri bato.

Umuyobozi ushinzwe guteza imbere ubucuruzi mu Kigo cy’Ubukerarugendo cya Horwath, Ngabo Ronald, yavuze ko ibigo byigisha iby’amahoteli n’ubukerarugendo bikwiye gushyira imbaraga mu kubatoza gufata no kwakira neza abakiliya kuko ari ingirakamaro.

Yanavuze ko bidakwiriye kugarukira aho gusa atanga inama ko n’abakozi bakorera ibigo by’amahoteli n’ubukerarugendo, bakwiriye gufatwa neza kuko nabyo bibafasha kwakira ababigana.

Abo bashoramari bagiye bagaragaza imbogamizi ziri mu rwego rw’ubukerarugendo ariko nyuma yo kuzunguranaho ibitekerezo, bagaragaje ko ibyo biganiro ari ingenzi nk’uko Nshimiyeyezu Albert ufite ikigo gicuruza amacumbi, Wailers Ltd yabisobanuye.

Ati “Bidufitiye akamaro cyane cyane mu rwego rwo guhanahana amakuru kuko akenshi usanga hari ubwo umuntu aba yifungiranye muri business atazi andi mahirwe yaboneka , ariko iyo ubashije kubona abantu nk’aba bagufasha mu buryo bw’amafaranga n’ubumenyi bw’abakozi ni ingenzi.”

GroFin itanga inguzanyo zihera kuri miliyoni 90 Frw kugeza kuri miliyari 1.35Frw. Kuva muri Werurwe 2007, GroFin yatanze inguzanyo zirenga miliyoni $20 kuri ba rwiyemezamirimo bakorerera mu Bukerarugendo, Ubuvuzi, Uburezi, Inganda, Ubuhinzi, Ubwikorezi, Ubwubatsi n’ibindi.

Muri Hanga Ahazaza hazibandwa ku mishinga ifite abakozi batarenze 50. Yinjiza atarenze miliyoni 1.5$ (miliyari 1.3 Frw) ku mwaka , ifite umutungo utarenze miliyoni 1.25$ (miliyari 1 Frw).

Inguzanyo zihariye ku bukerarugendo zizaba ziri hagati y’ibihumbi 100$ (miliyoni 90 Frw) n’ibihumbi 400$ (miliyoni 360 Frw).

Binyuze muri Hanga Ahazaza yatewe inkunga na Mastercard Foundation, intego ni ugufasha guhanga akazi ku barenga ibihumbi 30 gashamikiye ku bukerarugendo mu myaka itanu.

Abashoramari biganjemo abize muri kaminuza ya UTB
Abashoramari bitabiriye batanga ibitekerezo
Abashoramari bato beretswe amahirwe ahishe mu bukerarugendo n’uko bazamura impano babufitemo
Byari ibiganiro byo kungurana ibitekerezo ku mpande zombi
Umwe mu bashoramari atanga igitekerezo
Ibiganiro byatanzwe ku wa 26 Mata 2019
Ngabo Ronald yavuze ko ibigo byigisha iby’amahoteli n’ubukerarugendo bikwiye gishyira imbaraga mu gutoza abanyeshuri gufata abakiliya neza
Umuyobozi mukuru wa Kaminuza y’amahoteli, ubukerarugendo, ikoranabuhanga n’ubucuruzi(UTB), Dr. Kabera Callixte ubwo yatangaga ikiganiro
Umuyobozi wa GroFin Christian Bugabo yatanze inama zo gushaka imishinga myiza y'ubukerarugendo izunguka
Umuyobozi wa GroFin Rwanda, Christian Bugabo, yavuze ko mu mbogamizi zikomeye abashoramari bagitangira bagira harimo kubura igishoro ariko abagira inama yo gutegura imishinga myiza
Umuyobozi w'ishami rishinzwe kugenzura iby'amahoteli n'ubukerarugendo mu kigo cy’Igihugu gishinzwe iterambere(RDB), Nsabimana Emmanuel na we yatanze ikiganiro
Umuyobozi wa UTB, Dr. Kabera Callixte n'umuyobozi wa GroFin Christian Bugabo bari kuganira
Nyuma y'ibiganiro bifotoje ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza